Lukase 15 - Labrador Inuttitut Heritage Bible

Adsiujunik pingasunik: Saugamik tamarsimajomik, kênaujamiglo tamaijaumajomik, ernermiglo assiosimajomik.

¹ Pimaklertit idluitulijullo tikipât, tussaromavlugo.

² Farisêerille aglangniglo ilisimajut avamudlarput oᴋarlutik: Oma ajortulit ilaliorpait nerreᴋatigilugillo.

³ Adsiujomigle mattominga oᴋautivait, oᴋarlunelo:

⁴ Kia ilapse sauganik piliub 100 inik, taipkoa ilangat tamaiguniuk, 99 it ᴋemangniangilagît inuᴋangitomut, tamartorlo ᴋeneriartorniangilauk nennerᴋârnagô?

⁵ Nenniguniuglo tuimikpâ ᴋuviasuklune.

⁶ Tikileramelo, ilane silalinelo ᴋaiᴋovait, oᴋautivlugit: ᴋuviasuᴋatigisinga, saugara tamalauktok nennigapko.

⁷ Oᴋaupapse: Taimâktauk ᴋilangme ᴋuviasutaugivok idlui tulijok atausek ᴋaᴋialertok, 99 nit idluartunit ᴋaᴋialeriaᴋangitunit.

⁸ Arnablônêt kia tallimaujortunik kênaujaliub, tâpkoa ilangat assiojiguniuk, nennergoamik ikitsiniangilâᴋ iglo sanerdlugo, katsungaitomiglo ᴋenerajangilaûk nennerᴋârnagô?

⁹ Nenniguniuglo, ilannârijane silalinelo arnat ᴋaiᴋovait, oᴋautivlugit: ᴋuviasuᴋatigisinga, kênaujara assiojilauktara nennigapko.

¹⁰ Oᴋaupapse: Taimâktauk, idluitulijok ᴋaᴋialerangat, Gûdib Engelingita ᴋuviasûtigivât.

¹¹ Oᴋarporlo: Anguteᴋalaukpok maggûngnik ernilingmik.

¹² Nukardliublo atâtane oᴋautivâ: Atâtak, perᴋutingnit pijaksakka pilakka. Perᴋutine tâva avikpait tâpkungnunga.

¹³ Uvlullo ikitut nângmatta, nukardliub perᴋutine tamaita katilerpait, nunamullo ungasiktomut aularpok; tagvanelo perᴋutine nungupait Kuksalaitomik inôseᴋarlune.

¹⁴ Perᴋutine tamaita nungulaungmagit ᴋângnartoksoak pigialerpok nuname taipsomane ilûnâne, tâmnalo ajoksalerpok.

¹⁵ Nunablo taipsoma inungita illanganut tikipok; tâpsoma kivgarilerdlugo aulartipâ perorsêvingminut, kuingêngit mianerilugit.

¹⁶ Aᴋeartoromagalloarporlo kuingêngit nerᴋiksanginik, tunitjivionanelo tâpkoninga.

¹⁷ Tagva issumamigut erᴋailerpok oᴋarlunelo: Unuktunik atâtaga ikajorteᴋarpok nerᴋiksamik ajoksangitunik, uvangale ᴋângmut perlilerpunga.

¹⁸ Parngnaileromavunga, atâtamnullo aijomavlunga oᴋautivlugolo: Atâtak, idluitulilaukpunga Gûdemut ᴋilangmêtomut ilingnullo,

¹⁹ Kingorngane ernernik taijaunermik nelopᴋotivunga; ikajortivît ilangatitut ilingatilaunga.

²⁰ Aulalerporlo atâtaminullo tikilune. Sullele ungasiktomêtilugo, atâtangata takovâ, nâpkuarivlugolo, aᴋpangerdlunelo ᴋongasingagut erᴋipâ kuniklâlo.

²¹ Erningatale oᴋautivâ: Atâtak, idluitulilaukpunga Gûdemut ᴋilangmêtomut ilingnullo; mattoma kingorngane ernernik taijaunermik nelopᴋotivunga.

²² Atâtangale kivgaminut oᴋarpok: Annorâk pinnarnarnerpâk ᴋaisiuk, atitisiuglo, aggangillo ᴋeterdlermingmik pitatsersigik, atitilugolo itigâlungnik.

²³ Nocharmigloᴋoinijomik ᴋaitsigitse toᴋotsiluselo, nerrilutalo ᴋuviasukta!

²⁴ Ernera tâmna toᴋolauralloardlune ama ômarmingmat; assiosimalauralloarpok, nagvârtauvorlo. ᴋuviasulerpullo tâva.

²⁵ Erningale angajuklek perorsêvingmêpok; iglolo ᴋaglileramiuk, katimajut imgertoᴋatigêt tussarpait.

²⁶ Kivgallo ilangat ᴋaiᴋovâ, aperivlugolo sunaumangât.

²⁷ Tâpsoma oᴋautivâ: Nukat tikipok, atâtallo nocharmikᴋoinijomik toᴋotauᴋojivok, ernine ᴋanoengitok ama pigamiuk.

²⁸ Angajua tagva anûlerpok iteromananelo. Tagva atâtanga anivok innalâllo.

²⁹ Atâtanele kiovâ oᴋautivlugo: Jârinik unuktunik kivgartulaukpagit, perᴋojatillo ilûnaita nâlelaukpakka; saugamiglo angutsoarmik ᴋaitsilaungimarikpotit uvamnut, ᴋuviasuᴋovlunga ilannârijakka ilagivlugit.

³⁰ Ernîlle tâmna tikingmat, perᴋutiminik nungutsijok arnarniarnermut, nocharmik ᴋoinijomik toᴋotauᴋojivotit tâmna pivlugo.

³¹ Atâtangatale oᴋautivâ: Ernîk, najutsainarparma, perᴋutikkalo tamaita pigivatit;

³² Serrilutillo ᴋuviasuktuksaugalloarpotit; nukat una toᴋungalauktok ama ômarmingmat; assiosimalauktorlo nagvârtaumingmat.