Lukase 14 - Labrador Inuttitut Heritage Bible

Imarojoliub âᴋiktauninganik. Adsiujomik nerrimârviksoak unnuksiut pivlugo. Jêsusib oᴋâlaninganik maliktaunine idluartok pivlugo.

¹ Mattoma kingorngagut Farisêerit angajoᴋângita ilangata iglunganut nerrijartorpok sabbateme; taipkoalo nautsertorpât.

² Ahâglo, imarojolingmik anguteᴋarpok tagvane.

³ Jêsusiblo kiovlune, aglangnik ilisimajut Farisêerillo oᴋautivait oᴋarlunelo: Sabbateme pijungnaititsinek idluarᴋâ?

⁴ Tâpkoale niplingilat. Aktorpâlo âᴋiklugolo, aularᴋovâlo.

⁵ Kiovlunelo oᴋautivait: Ilapse kia tuktuvaᴋotine Siuterᴋortojoᴋotinelônêt, imeᴋtarvingmut nakkarpat, sabbateme mânakut ᴋaᴋisârasuarniangilaûk?

⁶ Tamattomungalo kionermik saperivut.

⁷ Adsiujomigle nerrimârtut oᴋautivait, malugosugame, isukliovlutik iksavajomangmatta nerrimârvingme, oᴋautivaillo:

⁸ Nuliarêlitainartuk nerrimârvingangnut nerrijartorᴋojauguvit, isukliovlutit inginiarnak, ilingnit nertornarnersamik nerrijartorᴋojauᴋoᴋarajarmat.

⁹ Tâpsomingalo ilingniglo nerrimârtitsijub tikipatit, oᴋautikpatillo: Tamna agvairuk, kangusulerlutit ingitsariaᴋarniarpotit ungardliovlutit.

¹⁰ Nerrijartorᴋojauguville, ungardliovlutit ingitsartorit; ilingnik nerrijartorᴋojijok tikipat oᴋautikpatillo: Ilannâk, isukliovlutit ingitsartungârit; nerrimârᴋativît ilûnatik tagva nertorniarpâtit.

¹¹ Ingminik angijorortitok miklilertitaksauvok; ingminiglo miklilertitok angijorortitaksauvok.

¹² Nerrijartorᴋojiminullo oᴋarpok: Nerᴋiksamik ᴋeterarsiumik unuksiumiglônêt âᴋiksoiguvit, tagva ilannârijarnik, ᴋatangutingniglônêt, ilangniglônêt, silalingniglônêt akluitunik nerrijartorᴋojiniarnak, taipkonunga ama nerrijartorᴋojauᴋonak, akkiniartaulerdlutit.

¹³ Nerrimâraksamigle âᴋiksoiguvit, aklujut, tusiaktullo, illakungortullo, tautungitullo nerrijartorᴋolaukit.

¹⁴ Piloridlarpotit tagva; ilingnut akkiksaᴋangimatta, akkilertaujomârpotille idluartut makiviane.

¹⁵ Nerrimârtut ilangata tamanna tussaramiuk, oᴋautivâ: Piloridlarpok ᴋakᴋôjaktortok Gûdib nâlegauvingane.

¹⁶ Oᴋautivâle: Anguteᴋalaukpok nerrimâraksarsoarmik unnuksiumik âᴋiksoijomik, unuktuniglo nerrijartorᴋojivok.

¹⁷ Nerriviat neliutingmat, kivgane oᴋariartorᴋovâ nerrijartortuksanut: ᴋaititse, ilûnane âᴋiksimangmat.

¹⁸ Ilûnatiglo kingordlerêklutik pasijaksaujungnaitilerdlutik oᴋarput. Sivorliub oᴋautivâ: Perorsêviksilaurama, takojartoriaᴋarpara; tuksiarpagit, pasijauᴋoniarnanga!

¹⁹ Aipangatale oᴋautivâ: Tuktuvait tallimaiksat ᴋemuktuksat pisiarigapkit mâna takojartorpakka; tuksiarpagit, pasijauᴋoniarnanga!

²⁰ Pingajuatalo oᴋautivâ: Nulianiᴋama, tamanna pivlugo tikitsungnangilanga.

²¹ Kivgablo tâpsoma angajoᴋâne oᴋautijartorpâ taipkoninga. Angajoᴋâk ningarpok tagva, kivganelo oᴋautivâ: Katsungailutit ailerit iglugasaksuit akornganut, apᴋosinernullo: aklujullo, tusiaktullo, illakungortullo, tautungitullo tagvunga itertikit.

²² Kivgarlo oᴋarpok: Angajoᴋâk, sorlo oᴋaravit, taimaipok, sullele iniksaᴋarpok.

²³ Angajoᴋâblo kivgane oᴋautivâ: Nunab apᴋosininginut, avalunullo ailerit, iterᴋolugit, igluga tattaᴋovlugo.

²⁴ Oᴋaupapsele, angutit nerrijartorᴋojaugalloat Nerrimâraksaᴋotikka ôngniangilait.

²⁵ Inugasaksuille ingergaᴋatigivât. ᴋeviarpaillo oᴋautivlugit:

²⁶ Uvamnut tikitub, atâtane, anânanelo, nulianelo, ᴋitornganelo, ᴋatangutinelo, nangminerlo inôtsine ômigingipagit, tâmna ilinniartigijungnangilara.

²⁷ Saningajoliksaminiglo (kappiasûtiksaminiglônêt) nangmangitok, malingnangalo, tâmna ilinniartigijungnangilara.

²⁸ Kia akunapsingne nuvuguseksoarmik sanajomajub akkitûjarianga issumaksarsiorutigerᴋârniangilaûk, innerniarungnarmangârmiûk?

²⁹ Tungaviksanganik senajarêrdlune, ᴋalliksanganik ajoᴋsalerpat ilûnatik tamattominga tautuktut mitauteᴋarnialerᴋonagit tâpsominga,

³⁰ Oᴋarlutik: Inuk tâmna sanagialauralloarpok innerlugolo ajorpâ.

³¹ Atanîllônêt naliata, sorsugiartoromajub atanermut assiminut, sivorngagut sorsuktuksame 10,000 it unurningit issumaksarsiorutiginiangilagît, sivôraginiangimangâgit sorsuktuksat nelipsaraksat 20,000 ît?

³² Sivôragigunigille, imna sulle ungasiktomêtilugo, oᴋautjaujartorᴋoniarpâ kivgaminut, sorᴋsugungnairᴋovlugit.

³³ Taimâktauk ilase pijaminik tamainik kamajungnairomangitok, tâmna ilinniartigijungnangilara.

³⁴ Sioraujak ajungidlarpok; sioraujarle tarriornitsungnairpat, sumût tarriornititaunajarivâ?

³⁵ Nunamullônêt perorsaijomullônêt suksaujungnairpok; egitaksatuinauvorle. Tussâjungnik siutilik tussarle!