Lukase 13 - Labrador Inuttitut Heritage Bible

Sâgiartuksaunermik. Adsiujunik napârtok paungatannaᴋarpaktok Gudiblo nâlegauvia pivlugik. Arnab âᴋiktauninganik Sabbateme. Iternermik itervikitoᴋut. Jêsusib kigusinganik Herôdese pivlugo, kiksarninganiglo Jêrusalemiut pivlugit.

¹ Taipsomane najûtijut ilangita oᴋautivât Galilêamiunik, Pilatusib taipkoa aungit akkulaungmagit tunergutinginut (toᴋodlugit).

² Jêsusiblo kiovait oᴋautivlugillo: Galilêamiut ipkua idluitulinersaunasugivisigîk Galilêamiunit assinginit tamainit, taimâk pidlartaungmattâ?

³ Aukârpunga; sâgiarniangikupsele, tamapsetauk taimâk asseroromârivose.

⁴ Ipkoalônêt 18 it nuvugoseksûb Siloamêtub ochovigijangit toᴋodlugillo, inungnit assinginit tamainit Jerusalemêtunit ajornersaunasugivisigîk?

⁵ Aukârpunga; sâgiarniangiᴋupsele tamapsetauk taimâk asseroromârivose.

⁶ Adsiujomigle mattominga oᴋautivait: Napârtoᴋoteᴋartoᴋalaukpok paungatannaktaliksamik ilijaumajomik perorsêvingminut vaineliksatalingmut; paungaksioriartoramiuglo, nagvângilak.

⁷ Tagva vaineliksatalingmik perorsêvilerijomut oᴋarpok: Ahâk, jârine pingasune jârit tamaita napârtok tâmna nelipsaᴋattardlugo paungaksioriatulaukpara, nagvârnangalo; kipiuk, sôk nunamik agviarᴋâ?

⁸ Taipsomale kiovâ oᴋautivlugo: Nâlegak, taimailingalaule sulle jâreme tamattomane; ivjo avatânnêtok poagijarᴋârlugo perorsaijuksalijomavara,

⁹ Kingorngagut paungaᴋarniangimangât, peᴋangipalle, tâva kipiuk.

¹⁰ Ajoᴋertuivorlo katimavît ilangane Sabbateme.

¹¹ Ahâglo, arnak tagvanêpok, ᴋanimanartomik anernilik jârit 18 it nâvlugit, oᴋungainarlune isivijungnangitok.

¹² Jêsusible takogamiuk, ᴋaiᴋovâ oᴋautivlugo: Arnak, ᴋanimanernit pijungnairit!

¹³ Aggangminullo patingmivâ; tagvainarlo isivilerpok Gûdelo nakoridlarpâ.

¹⁴ Tagva katimaviub angajoᴋânga ningalerpok, Jêsuse Sabbateme pijungnaititsingmat, inuillo oᴋautivait: Uvlut pingasojortôvut senaviksaujut; uvlune taipkonane âᴋiktaujartoritse sabbatemeungitorle.

¹⁵ Tagva Nâlekab kiovâ oᴋarlune: Takkormôrtotit, ilipse tamapse tuktuvaᴋotise, siuterᴋortojullo pitûdjârpangilasê nerᴋevinginit, aluktitsartorlugillo sabbatemê?

¹⁶ Tagva tâmna, Abrahâb panigigalloarmago, pitûdjârtaujariaᴋangilâᴋ pitûtamit tamattomangat, Sâtanasib ᴋelaksulauktanga jârine 18 inê?

¹⁷ Taimâk oᴋautingmagit akkerartortingit ilûnatik kangusuktitaulerput; inuit ilûnatik tatamnartitangit ânanaudlartut tamaita ᴋuviasûtigivait.

¹⁸ Jêsusele oᴋarpok: Gûdib nâlegauvingata suna adsigivaûk? Sumullônêt adsiutitaksarivigô?

¹⁹ Mustardib karngasûtiksatangatut-ipok; inuk tâpsominga tigusivok egidlugolo perorsêvingminut; perolerporlo napârtôlerdlunelo angijok, tingmitjallo ᴋilaub atânêtut ineᴋalerput akerungita akorngane.

²⁰ Ama oᴋarivok: Sumût Gûdib nâlegauvia adsiutitaksarivigô?

²¹ ᴋakᴋôjat pudjusautingatun-ipok; arnak tâpsominga tigusivok akkudlugolo sanaugarmut, ôktût pingasuertorlugo, pudjutipâlo ilûnât.

²² Mattoma kingorngagut iglugasaksoatigut iglugasaktigullo ingergavok ajoᴋertuivlunelo, ingergarlarmelo Jerusalemut.

²³ Inuille ilangata oᴋautivâ: Nâlegak, ikitut piulijauniarasugivigît? Oᴋautivaille:

²⁴ Ilungertoritse, itervikitoᴋut iterniarᴋovluse; oᴋaupapse: unuktut pinasuarniarput iteromavlutik, iterungnarniaratiglo.

²⁵ Taimangat, iglub inuata nikovidlune upkuak parngnanairpago, tagva ilipse silatâne nangernialerivose, avilortarluselo upkuamut, oᴋarluselo: Nâlegak, upkuêrutitigut! Kiojomârpâsele oᴋautivluse: Nakit pingmangâpse, ilitaringilapse.

²⁶ Tagva oᴋaleromârpose: Nerreᴋatigivlutillo imeᴋatigilaukpaptigit, apᴋosiniâluptingnelo ajoᴋertulaukpaptigut.

²⁷ Kiojomârporlo; Oᴋaupapse, ilitaringilapse, nakit pingmangâpse; tamapse ᴋemaksinga, idluitulijose!

²⁸ Tagvane ᴋeavaksoadlarneᴋaromârpok aglerulârneᴋarlunelo; Abrahalo, Isaarlo, Jâkolo, nalautaijullo tamaita Gûdib nâlegauvingane takojomârapsigik, ilipsele silatânut pingujartaumajose.

²⁹ Inuillo unangat, pângallo, ângallo, avangallo tikitsomârput, Gûdib nâlegauvingane nerrimârvingme iksivajomârtut.

³⁰ Ahâglo, kingorliojoᴋarpok sivorliojomârtunik, Sivorliojoᴋarlarmelo kingorliojomârtunik.

³¹ Uvlorme taipsomane Farisêerit ilangita oᴋautijartorpât: Aularit, tamanna ᴋemaguk; Herôdesib toᴋotsomangmatit.

³² Oᴋautivaillo: Terrianiak taimna oᴋautijartorsiuk: Ahâk, sâtanasit anitipakka, inûlikleriartorlarmalo uvlome ᴋaupallo, uvluglo pingajuangne naggaserniarpunga.

³³ Uvlomelo, ᴋaupallo, ungardlinganelo arvertariaᴋarpunga; nalautaijok Jerusalemib assiane toᴋotaulerpangimat.

³⁴ Jerusalem, Jerusalem, nalautaijunik toᴋotsijotit, ilingnullo tilijanik ujarᴋanut milorniktotit: ᴋitorngatit katititsomaᴋattalauralloarpakka, sorlo arnaungub piarᴋane katitingmagit esarᴋominut; pijomalaungitosele!

³⁵ Ahâk igluse (katimavise) inuêrutjaujomârpok. Oᴋaupapse: Takoniangilapsinga, neliuterᴋârtinago oᴋarvise: Nakoridlartaule Nâlekab atingane tikitok!