Lukase 12 - Labrador Inuttitut Heritage Bible

Ilinniartine udsertorᴋovait takkormôrnermik, inungniglo sivôranermik pijomatudlarnermiglo. Nertornarᴋojaunermik pigârᴋojaunermiglo. Okpertut nangianartomêninginik unangmijauninginiglo. Nelliunerub nelunaikutanginik.

¹ Tagvanêtilugo inugasaksuit tikipât, tausendeoᴋattartullo katimalerput ingmingnut tuttijarᴋattautivlutik. Tagva Jêsusib ilinniartine oᴋautilerpait; Piluartomik Farisêerit ᴋakᴋôjangita pudjusautinganik ilimasugitse, tamadja takkormôrniongmat.

² Sagvangitoᴋangilarle sakᴋertitauniangitomik, angigutjuteᴋangilarlo ᴋaujijauniangitomik.

³ Tamanna pivlugo tâktome oᴋauserilauktase ᴋaumajome tussartaujomârput, iglomelo issibjutigilauktase oᴋautaujomârput iglut ᴋângine.

⁴ Oᴋaupapsele ilannârijakka: Erᴋsiginiarasigik timinik toᴋotsijut, kingornganelo sumik piniarungnarungnaitut.

⁵ Sivôragijaksapsingnigle oᴋautijomavapse: Tâmna erᴋsigisiuk, toᴋotsijarêrune, pitsartuneᴋarmijok egitsinermik ânianartovingmut. Ilâ oᴋaupapse, tâmna erᴋsigisiuk.

⁶ Kutsertat tallimat kênaujârsungnik maggûngnik akkeᴋarpangilât? Gûdible taipkoa ilangallônêt puigungilâ.

⁷ Nujasetauk ilûnatik kitisimagivut niaᴋupsingne. Tamanna pivlugo erᴋsiniarase, kutsertavaksoarnit akkitugijaunersaugapse.

⁸ Oᴋaupapsele: Uvamnik oᴋausilik inungnut, tâmna Inûb Erningata oᴋautigijomârivâ Gûdib Engelinginut.

⁹ Inungnulle misiutilik uvamnik, tâmna misiutaujomârivok Gûdib Engelingita sângane.

¹⁰ Oᴋautsemiglo Inûb Erninganut akkerartortomik oᴋautilik issumaᴋarviojungnairomârpok; Anernermigle ajunginermik oᴋauserlûtilik issumagijaujungnainiangilaᴋ.

¹¹ Katimavingmingnulle, atanersoarnullo ataniojunullo âpase issumajâruteᴋarniarase ᴋanok sumiglônêt oᴋausiksaᴋarniarmangâpse kigusiksaᴋarmangâpselônêt.

¹² Anernerub ajunginerub ajoᴋertorniarmase stundeme taipsomane oᴋauseᴋariaᴋarniksapsingnik.

¹³ Inuille ilangata angutib oᴋautivâ: Ajoᴋertuijok, angajuga oᴋautiuk, kingormgutijaksaptingnik avikserᴋovlunuk.

¹⁴ Oᴋautivâle: Inuk, kia aviksititsijuksautilaukpângâ kingormgutijaksapsingnîk?

¹⁵ Oᴋautivaillo: Akluitsomanermik udjertoritse; inûb perᴋutivaksuit inôgutigingimagit.

¹⁶ Adsiujomiglo pivait oᴋarlunelo: Anguteᴋalaukpok akluitomik, tâpsoma perorsêvinga perorlorigviovok.

¹⁷ Issumaksarsiorporlo oᴋarlunelo: ᴋanok piniarlungâ? Perorsiakka katitaksakka iniksaᴋangimatta.

¹⁸ Oᴋarlunelo: Imailioromavunga; ᴋematulivikka serᴋomitsomavakka, angijorortilugillo, perorsiakkalo tamaita perᴋutikkalo katitsomavakka taᴋamunga.

¹⁹ Tarnimnullo oᴋaromavunga: Nagliktara tarniga, piksaᴋavaksoadlarpotit jârinik unuktunik, ᴋikalerit, nerrilutillo imerlutillo ᴋuviasugit.

²⁰ Gûdible oᴋautivâ: Silaitotit, unnuarme tamattomane tarningilârpotit; kialo katersulauktatit piksariniarpagît?

²¹ Taimâk ilingavut perᴋutinik katersoijut, akluinatiglo Gûdeme.

²² Ilinniartinele oᴋautivait: Tamanna pivlugo oᴋaupapse: Inôsise pivlugo siaklerniarase, nerᴋiksapsingniglônêt, timipselônêt annorâksanginik.

²³ Inôsek ivlernarnersauvok nerᴋiksanit, timelo ivlernarnersauvok annorânit.

²⁴ Tulugat nautsertorsigik: karngasoingilat, katersoinatiglo ᴋematuliveᴋaratiglotauk iliorᴋaveᴋangilallônêt; taimaigalloartilugit Gûdib nerritipait, Ilipsele tingmitjanit ivlernarnersaungijaidlarpose ilâ!

²⁵ Nelise ingminik uiguksarsijungnarᴋâ tallertut atautsetut takitigijomik, siaklerutigigalloaruniûk?

²⁶ Mingnek ajorupsiuk, sôk assia siaklerutigivisiûk?

²⁷ Paunaujaujârtut naternamêtit, ᴋanok perortut takunârsigik; sanangilat, pergaingilallônêt. Oᴋaupapsele, Salomolônêt ânanaunermine ilûnâne annorârsimalaungilak taipkoa ilangatitut.

²⁸ Iviksukat nunamêtut Gûdib taimâk pinnarnarsitinamigit, uvlome perortut, ᴋaupallo kiaksaumut egitaksaujut piluartomik ilipse annorârtitsomavâse, okpernikitose!

²⁹ Tamanna pivlugo erᴋaginiarasiuk sumik nerᴋiksaᴋarniarmangâpse, sumiglônêt imiksaᴋarniarmangâpse, issumajârniaraselo.

³⁰ Makkoa tamaita silaᴋsûb inungita okpingitut nelojullo pinasuagatuarivait: Atâtapsele ᴋilangmêtub ᴋaujimavâse taimaitomik ajoᴋsarapse.

³¹ Gûdible nâlegauvinga pinasuarᴋârsiuk, tagva tamakkoa tamaita pilârpase.

³² Erᴋsiniarase, ilagêktuarsuit: Atâtapse idluaringmago tunitsivigivluse nâlegauvingminik.

³³ Perᴋutise niorvgutigisigik tunergutigivlugillo. Pôksiniaritse pitoᴋauniangitunik, perᴋutitârniardluselo ᴋilangme asserojuitunik, tigliguillo sapertanginik, ᴋaurulillo asserorungnangitanginik.

³⁴ Perᴋuteᴋarvipsingne ômatise tagvanêniarivut.

³⁵ Makitipsigut tapserusijaritse nennergoaselo ikomaᴋarlit.

³⁶ Inuit adsigisigik nâlekamingnik neriuktut, nuliarêlitainartut nerrimârvinganit ᴋailerpat; tikipat avilortalerpallo upkuêrutisâlârpât.

³⁷ Kivgat taimaitut piloridlarput, Nâlekab tikipagit, pigârtut. Âhamarik oᴋaupapse: nerrimârvingme iksivaᴋojomârpait, sailitserlunelo, nangminerlo kivgartoromarpait.

³⁸ Pigârviub aipangane, pigârvîllônêt pingajuangne tikipagit taimailiortut, kivgat tâpkoa piloridlarput.

³⁹ Tamannale nalojungnairaksarivase: Iglub inuata tigliktub tigligiartorvia ᴋaujimaguniuk, pigârajarpok, iglominut itertoᴋarᴋonago.

⁴⁰ Tamanna pivlugo ilipsetauk opalungaisimatitse; Inûb Erninga tikitsomârmat uvlub stundingane neriugvigingitapsingne.

⁴¹ Pêtrusible oᴋautivâ: Nâlegak, adsiujomik mattominga kissipta pivitigût, tâpkoalônêt tamaita pivigît?

⁴² Nâlegarle oᴋarpok: Pimaklertok silatovlunelo nertornartok pijariaᴋortojok, Nâlekab pairsijungortitanga kivgaᴋotiminut, tunijerᴋovlugo piksanginik naliutijarangat.

⁴³ Kivgak taimna pilorikpok, taimailiortok, Nâlegangata tikipago.

⁴⁴ Âhamarik oᴋautivapse: Perᴋutiminik tamainik pimaklertungortitsomârpâ.

⁴⁵ Kivgarle taimna ômamigut issumalerpat: Nâlegara tagvainak tikiniangilak; kivgallo angutit arnallo annaudlalerpagit, nangminek nerrilune imilarmelo taladlarlune,

⁴⁶ Kivgab taipsoma nâleganga tikitsomârpok uvlorme ipsoma neriugvigingitangane, stundemelo ᴋaujimangitangane, asserorlugolo piniarpâ, okpingitullo ilaliudlugit âkᴋivigijomârpâ.

⁴⁷ Kivgarle nâlekame perᴋojanganik ᴋaujimajok, pinialauranelo, perᴋojangalo malingnago, unuktunik annaujaujomârpok.

⁴⁸ Perᴋojanganigle ᴋaujimangitok, pinialauralloarame annaujaujutiksamik, ikitunik annnaujaujomârpok, Unuktunik tinitjiviojok, tâmna unuktunik ᴋenerviojomârpok; unuktuniglo perᴋojaujok, tâmna unuktunik ᴋaitserᴋojaujomârpok.

⁴⁹ Ikomamik ikitsijartorpunga nunamut; suna pijomanersarivigô ikoalajarêrninganît?

⁵⁰ Sivorngagulle baptijumut baptitaujariaᴋarpunga; sivôradlarpungale nâmakserᴋârtinago.

⁵¹ Ulapirsaumik ᴋaitsilunga nunamut tikinasugivisingâ? Oᴋarpunga: Aukak, akkerartortigêngnermigle.

⁵² Mattoma kingorngagut tallimat iglome atautseme ingmingnut akkerartûtijomârput; pingasut maggûngnut, maggûglo pingasunut.

⁵³ Atâta akkerartoromârpok ernerminut, ernerlo atâtaminut; anânalo paningminut, paniglo anânaminut; sakke ukoaminut, ukuarlo sakkiminut.

⁵⁴ Oᴋarporle inungnut: Nuvujamik takojarangapse unangat nikovitomik, oᴋarsaraipose: Silarnerludlarniarpok; taimailerporlo.

⁵⁵ Uarngniluamik takojarangapse oᴋarpose: Kitjidlarniarpok; taimailerporlo.

⁵⁶ Takkormôrtose, nunalo ᴋilaglo ᴋanoeniarmangângnik ilisimavase; sôkle neliutok tamanna ilisimangipisiûk?

⁵⁷ Sôkle nangminipsingnik erᴋartungipisê idluartomîk?

⁵⁸ Ilingnulle akkerartortok aiparigungne atanermut, ingergarlutik saimarsarniaruk, pititauᴋonak erᴋartuijomut; erᴋartuijomullo unertûtauᴋonak pitlarniktomut, pitlarniktomullo egitauᴋonak parngnanairsimavingmut.

⁵⁹ Oᴋaupagit: tagvangat anititauniangilatit, akkiliksarpît kingorlerpârâsunganik akkilêrᴋârtinak.