Lukase 11 - Labrador Inuttitut Heritage Bible

Tuksiartuksaunermik ᴋanok. Jêsusib akkiorninganik anititsinek Sâtanasinik pivlugo. Farisêerit suartauninginik Jêsusemut, nerrimârtilugit.

¹ Iniminelo tikitamine tuksiarpok. Sorairmallo, ilinniartingita ilangata oᴋautivâ: Nâlegak, tuksiarnermik ajoᴋertortigut, sorlo Johannesib ilinniartine ajoᴋertormagit.

² Oᴋautivaille: Tuksiarupse, imâk oᴋaritse: Atâtavut ᴋilangme! Atît nertortaule. Nâlegauvît ᴋailaule. Pijomajat piniartaule nuname sorlo ᴋilangme.

³ Uvlome piksaptingnik tunitjivigitigut.

⁴ Idluinivut issumagijungnaikit, sorlo uvagut idluitulivigijivut issumagijungnaivigigaptigik. Oktortaulungnermut pitinata. Piulitigulle ajortunit.

⁵ Oᴋautivaillo: Akunapsingnêtut naliat ilannârijaᴋartok, tâpsomunga unnuab ᴋeterarningane ainajarpat oᴋautivlugolo: Nagliktara ilannârijara, tauktiliksarsilaunga niaᴋôjanik pingasunik;

⁶ Ilannârijama apᴋosinermit tikingmanga, pitaᴋangilangalo manijaksamik tâpsomunga;

⁷ Kamanêtorlo kionajarpat oᴋarlunelo: Ulapitaujomangilanga, upkuak parngnanairsimangmat, ᴋitorngârsukkalo ilangivlunga sinigvingmêngmatta; taimâk pivlugo makitsungnangilanga tunitjivigivlutit:

⁸ Oᴋaupapse: Makitsomangiᴋalloarune tunitjivigilugo ilannârigamiuk; tagva makilârpok, iktôriktailune tuksiarvigingmago sorairane, pijomajanganiglo ajortanganik tunitjivigilârpâ.

⁹ Oᴋaupapsetauk: Tuksiaritse, tunitjivioniarpose tagva: ᴋeneritse, nennisiniarpose tagva; avilortaritse, upkuêrutjauniarpose tagva.

¹⁰ ᴋenujok tigusiniarmat, ᴋenâjok nagvârniarmat, avilortartorlo upkuêrutjauniarmat.

¹¹ Kia illapse, atâtane erningata ᴋakᴋôjamik tuksiarvigikpago, ujarᴋamik tunitijiviginajarpaûk? Mingeriamiglônêt tuksiarvigikpago, mingeriangongitomik ᴋuglugiamik tunitjiviginajarpaûk?

¹² Manningmiglônêt tuksiarvigikpago, kingupaujârtimik tunitjiviginajarpaûk?

¹³ Ilipse ajoralloartose ᴋitorngase tunergutinik ajungitunik tunitjivigijungnarapsigik, piluardlune ilâ Atâtab ᴋilangmêtub tuksiarvigijine tunitjiviginiarpait Anernermik ajunginermik.

¹⁴ Sâtanasemiglo oᴋarungnangitomik anititsivok. Sâtanaselo aningmat, oᴋarungnangitok oᴋalerpok. Inuillo tataminialerput.

¹⁵ Tâpkoale ilangit oᴋarput: Sâtanasit anitipait Beelzebubekut, Sâtanasit ataningatigut.

¹⁶ Assingitale ôktorpât, takotitserᴋojomavlugolo nalunaikutamik ᴋilangmit.

¹⁷ Jêsusible issumangit ᴋaujigamigit, oᴋautivait: Ataniovît naliat ingminut illagêgungnairune, nunguniarpok, iglolo ingminut akkerartortok ochoniarpok.

¹⁸ Sâtanasetaûk ingminut akkerartorune, ᴋanok atanioninga soᴋosinginajarᴋâ? Oᴋarapse, sâtanasit anitikapkit Beelzebubekut.

¹⁹ Uvangale sâtanasit anitikupkit Beelzebubekut, kinakut ᴋitorngapse anitipatigîk? Tamanna pivlugo erᴋartortigijomârpase.

²⁰ Sâtanasit Gûdib aggangitigut anitikupkit, Gûdib nâlegauvingata tagva tikipâse.

²¹ Sangijoksûb sakkuliub iglune saputikpago, perᴋutingit pijauniatsangilat.

²² Sanginersable tikikuniuk, sâlagiguniuglo, sakkunginik tatigijanginik aᴋsâdlarpâ, aᴋsârnigavinîllo aitûtigivait.

²³ Ilagijigingitima akkerartorpânga; katersoiᴋatigingitaralo siamartitsivok.

²⁴ Anernerle maᴋojungnartok inungmit anigame, ingergavok sunaᴋangitoᴋut, merngoerserviksarsiorlune, nagvâranelo; oᴋarpok tagva: Iglumnut ᴋemalauktamnut uteromavunga.

²⁵ Tikinamiuglo, sannersimajok ânanausijorlo naipipâ.

²⁶ Tagva ailerpok anernernik assiminik 7 nik, ingminit ajornersaujunik illaksarsivlune, iteramiglo, tagvanêtualerput; kingorngagullo inuk taimna ajulualerpok sivornganemit.

²⁷ Jêsuselo taimâk oᴋartilugo, arnak nippeᴋalerpok inuit akurngane, oᴋautivlugolo: Piloridlarpok ilingnik singailauktok ilingniglo amâmaktitsilauktok.

²⁸ Kiovâle: Ila, piloridlarput Gûdib oᴋausinginik tussartut torᴋorlugillo.

²⁹ Inuille katimalermatta, tagva oᴋalerpok: Ukkua uivêtôvut; nelunaikutamik takojomavut; tunitsivioniangilalle nalautaijub Jônasib nalunaikutangata assianik.

³⁰ Sorlo Jônase nalunaikutaulaungmat Ninivemiunut, taimâk Inûb Erninga itsomârivok kinguvângoᴋatigênut ukkonunga.

³¹ Uvluksame erᴋartuivingme kinguvângoᴋatigêt ukkua ilagilugit ataniub nulianga ângat pijok sakᴋeromârpok, erᴋartorlugit; nunamit ungasiktomêtomit pigame, Salomonib silatuninga tussaromavlugo. Ahâglo tamânêtoᴋarpok Salomonemit anginersaujomik.

³² Ninivemiut uvluksame erᴋartuivingme kinguvângoᴋatigêt ukkua ilagivlugit sakᴋeromârput, erᴋartorlugillo; Jônasib oᴋâlaningata kingorngagut ᴋaᴋialeramik. Ahâglo, tamânêtoᴋarpok Jônasemit anginersaujomik.

³³ Nennergoamik ikitsijokangilak ijeriartorlugo, ᴋattaujab atânullônêt; nennergoarvingmulle ilivâ, itertunut takojauᴋovlugo nennergoak.

³⁴ Timib ije ᴋaumanerivâ. Ijît taututsiarpat, timît ilûnane ᴋaumaniarpok. Ijît taututsiangipat, timît ilûnane târniarpok.

³⁵ Tamanna pivlugo, udsertorit, ᴋaumajok ilungnêtok tâᴋserᴋonago.

³⁶ Timît ilûnane ᴋaumakpat, mikijomiglônêt tâktoᴋarane, tagva ilûnane ᴋaumaniarpok, ᴋaumarsarniarpâtillo, sorlo ᴋolliub ᴋaumarsarmatit akisungnerminut.

³⁷ Taimâk oᴋartilugo, Farisêerit ilangata innapâ nerreᴋatigijomavlugo ᴋeterarsiumik. Jêsuselo iterpok ingidlunelo nerrimârvingmut.

³⁸ Ubvarsimanane nerrijomangmat, Farisêerib takogamiuk, tataminiarpok.

³⁹ Nâlekable oᴋautivâ: Ilipse Farisêerit, ermgusiarsuit pôgutallo silatingitigut sujungaitikalloarpase, ilusele tattadlarput kassênermik arᴋtaisungunermiglo.

⁴⁰ Silaitose, silatânik sanalauktub, ilua sanalaungilaûk?

⁴¹ Ahâk, perᴋutipsingnit tunijiniaritse (Aklujunut), ilûnatik sujungaijutiksauniarput tagva ilipsingnut.

⁴² Kappianamêgle ilipse Farisêerit, tippitsiariksaullo makpatâvaillo sunatuinait tallimaujungit tunigapsigik, erᴋartuinerle (idluartok) naglingnerlo Gûdemik senerᴋopase (issumaginagiglo). Makkoa piniaraksarivase, ipkoalo iperarnagit.

⁴³ Kappianamêk ilipse Farisêerit, katimavingne issukliovluse iksivajomagapse, salutitaujomavluselo inungnut niuvervingme.

⁴⁴ Kappianamêk ilipse, aglangnik illisimajut Farisêerillo, takkormôrtose, iluvertitut saumajutitun-inapse; inuit ᴋângitigut pisukput ᴋaujimanagit.

⁴⁵ Tagva aglangnik ilisimajut ilangata kiovâ oᴋautivlugo: Ajoᴋertuijok, oᴋautsinut tamakkonunga uvaguttauk suangavaptigut.

⁴⁶ Kiovâle: Kappianamêk ilipsetauk, aglangnik ilisimajut inuit erᴋsugaksanik erᴋsuktaujungnangitunik ilijivigigapsigik, ilipsele nangminek tamakkoa aktoromangilase, aggangmut atautsemullônêt.

⁴⁷ Kappianamêk ilipse; nelautaijut iluviliorpase, angajoᴋâpsele toᴋolaukpait.

⁴⁸ Tagva sakᴋertitsivose, angajoᴋâpse piniarnerilauktangit idluiginginapsigik; ipkoa nelautaijut toᴋolaukpait, ilipsele iluviliorpase.

⁴⁹ Tamanna pivlugo Gûdib silatuninga oᴋarpok: Nelautaijut Apostelillo tilijomavakka tâpkonunga; taipkoa ilangit toᴋotsomârpait, ilangillo unangmivlugit.

⁵⁰ Nelautaijut ilûnarsoangita aungit kinguvângoᴋatigênut tâpkonunga akkiniartaukovlugit, silaksûb tunganilijauninganit kovijaumajut,

⁵¹ Abelib aunganit Zacharîasib aunga tikidlugo toᴋotaujub tunerguserviub tempeliblo akorngangne. Ilâ oᴋaupapse: Kinguvângoᴋatigênut ukkununga akkiniartaujomârput.

⁵² Kappianamêk ilipse, aglangnik ilisimajut, ilisimanartub pêrutânik peᴋarapse. Ilipse iterniangilase, iteromajullo agviarpase.

⁵³ Taimagle oᴋautingmagit, aglangnik ilisimajut Farisêerillo piniarpalliadlarpât, aperᴋusiksanut sunatuinarnut oᴋausiksairutsomavlugo,

⁵⁴ Nautsertorpâllo, oᴋausinginit pasitiksaᴋaromavlutik tâpsomunga.