Lukase 1 - Labrador Inuttitut Heritage Bible

Zacharîase Johannesib Baptiterijub inulerninganik oᴋautjaulerpok. Marîalo Jêsusib inulerninganik oᴋautjaulerpok. Marîab Elisabet nelipsarpâ Gudelo nertorpâ. Johannesib inulerninganik, Zacharîasiblo nertordlerninganik Gudemik.

¹ Unuktut aglagasualaungmatta, oᴋautsit unipkausingortilugit pijoᴋalauktut akunaptingne pivlugit;

² Sorlo taipkua tunitjivigilaungmatigut tamakkoninga, pigiarninganit nangminek takolauktamingnik, kivgartorteovlutik oᴋautsinut:

³ Uvangatauk tamanna nâmagidlarpara, tamaita kiglinganit kiglisitigilualaurapkit, ilingnut, nagliktara Teôfiluse, aglaluarlugit;

⁴ Ajoᴋertûtsib ajoᴋertortaujutigijavît tungavinganik tussarᴋovlutit.

⁵ Herodese nuname Judêame ataniotilugo, ajoᴋertuijoᴋalaukpok ajoᴋertuijôᴋatigêt ingmigolingajut Abiakut ilanganik, Zacharîasemik atilingmik; taipsoma nulinga Aronib paningita ilangat, Elisabetemik atilik.

⁶ Tamarmigle idluarpuk Gûdib sângane, Nâlekablo perᴋojangit pijomajangillo tamaita nâletsiarpait.

⁷ ᴋitorngaᴋangilaglo, Elisabet ᴋitorngisuitôngmat, inutoᴋaulerdlutiglo tamarmik.

⁸ Taipsomane Zacharîasib ajoᴋertuijônine atoramiuk Gûdib sângane, (Abiakut) simêningat neliutingmat,

⁹ Ajoᴋertuijullo ilusingat maliklugo, isserluanititsininga neliutingmat, Nâlekab Tempelinganut iterpok.

¹⁰ Inugasaksuillo ilûnatik silatânêput tuksiarlutik isserluanititsitilugo.

¹¹ Nâlekable Engelingita ilangat takotipok tâpsomunga, tunerguserviub isserluanititsiviub talerpiata tungâne nangertok.

¹² Zacharîasiblo tâmna takogamiuk ᴋoaksârlarmelo erᴋsilerpok.

¹³ Engelible oᴋautivâ: Zacharîase, erᴋsinak, tuksiarnitit tussartauvut, nuliallo Elisabet ernijomârpok erniksarnik, taimna Johannesemik atseraraksarivat.

¹⁴ ᴋuviasûtigilugo alliagijomârpat, unuktullo inûlerninga ᴋuviasûtigijomarpât.

¹⁵ Nâlekab sângane angidlaromârmat; vainemik assianiglônêt imiksamik pitsartudlartomik imeromângilak. Anânangatalo timingata iluanêtilugo sulle Anernermik ajunginermik ilumertaulârpok.

¹⁶ Israêliblo ᴋitorngangit unuktut sâtitsomârpait Gûdemut Nâleganganut.

¹⁷ Tâmnalo sivorleromârpâ Eliasetut anerneᴋarlune pitsartuneᴋarlunelo, angajoᴋât ômatingit sâtitsomârlugit ᴋitorngamingnut, okpingitullo idluartut illisimaninginut, taimâk Nâlekamut inungnik opalungairsimajunik âᴋêlune.

¹⁸ Zacharîasiblo Engele oᴋautivâ: Suna neluniakutaksarivigô? itôlerama, nuliaralo ningiungogivok.

¹⁹ Engeliblo kiovlune oᴋautivâ: Gabriêliovunga Gûdib sângane nangertunga, tilijauvungalo oᴋautjauᴋovlutit, tamattomingalo nalojungnaititauᴋovlutit.

²⁰ Ahâglo, nipangerniarpotit oᴋarungnarungnailutillo, uvlok taimna tikilugo pijoᴋarvioniartok tamakkoninga; Oᴋausikka okperinginangne, nalautsiniartut neliutinermingne.

²¹ Inuillo Zacharîase utaᴋivât, tataminiarlutiglo, taimâk sivitutigijomik mulludlarmat Tempeleme.

²² Anigamelo, oᴋautijungnangilait. Malugosulerpullo takotitjumik takolaungmat Tempeleme. Nullorarpaillo, oᴋarungnangerdlunelo.

²³ Kivgartorningatalo sorairvia naliutingmat, iglominut angergarpok.

²⁴ Uvlullo tâpkoa kingorngane nulianga Elisabet singailerpok, takᴋiniglo tallimanik ijeriartorlune oᴋarpok:

²⁵ Taimâk Nâlekab pivânga uvlune ukkunane takonâraminga, kangusûtiga inungne uvamnit pêrlugo.

²⁶ Takᴋillo pingasojoane Gûdib Engele Gâbriêl tilivâ iglugasangnut Galilêametunut, Nazaretemik atilingnut,

²⁷ Uigasungmut angersimajomut Dâvidib kinguvângita illanganut, Jôsefemik atilingmut; uigasuglo Marîamik ateᴋartok.

²⁸ Engeliblo itervigivâ oᴋarlune: Salutitaulerit saimartitaujotit! Nâlekab illagivâtit, anerijaunerojotit arnanit tamainit.

²⁹ Mariable takogamiuk, oᴋausingit ᴋoaksârutigivait issumalerlunelo: ᴋanok tagva salutitauvîk?

³⁰ Engeliblo oᴋautivâ: Marîa erᴋsinak, saimartauniksarsivotit Gûdeme.

³¹ Ahâk, singailârpotit timingne, ernermiglo ernijomârpotit, tâmna Jêsusemik atseraraksarivat.

³² Tâmna angidlaromârpok, ᴋotsingnermêtublo erninganik taijaujomârpok, Gûdiblo Nâlekab tunitjivigijomârpâ atâtangata Dâvidib iksivautanganik.

³³ Jâkoblo iglunganut ataniojomârpok issoᴋarniangitomut, atanioningalo naggateᴋaromângilak.

³⁴ Tagva Marîab Engele oᴋautivâ; ᴋanok tamanna pilârᴋâ? angumik ᴋaujimanginama.

³⁵ Engelib kiovlune oᴋautivâ: Anernerub ajunginerub ᴋolangiarniarpâtit, ᴋotsingnermêtublo pitsartuningata ulingniarpâtit; tamanna pivlugo ivsornainek erniarijaksat Gûdib Erninganik taijaujomârpok.

³⁶ Ahâglo, Elisabettauk illat singaigivok ernermik ningiungolerlune; takᴋit pingasojoane, taimna ᴋitorngisuitok ilûnatik oᴋautigijangat.

³⁷ Gûdeme ajornartoᴋangimat.

³⁸ Marîale oᴋarpok: Ahâk Nâlekab kivgarivânga; sorlo oᴋaravit taimailerlanga. Engeliblo ᴋemakpâ tâva.

³⁹ Uvlunele taipkonane Marîa aulalerpok, aisârlune ᴋakᴋanut iglugasait ilanginut Judêamêtunut,

⁴⁰ Zacharîasib iglunganut, iterdlunelo Elisabet salutipâ.

⁴¹ Elisabetiblo tamanna Marîab salutitsininga tussarmago, timingata singainga nerritoralerpok. Tagvainarlo Elisabet ilumertaulerpok Anernermik ajunginermik.

⁴² Nipliadlarlunelo oᴋarpok: Anerijaunerojotit arnanit tamainit, timivîllo singainga anerijaunerogivok.

⁴³ Nakîllo tamanna pivâ, Nâlekama anânangata tikingmangâ?

⁴⁴ Ahâk salutitsinivît nippinga tussarapko, singaiga illumnêtok ᴋuviasungnermut nerritoralerpok.

⁴⁵ Pilorikpotit, okperavit; ilingnut Nâlekab oᴋausingit nâmaksijomârmatta.

⁴⁶ Marîalo oᴋarpok: Tarnima Nâlegak nakoridlarpâ.

⁴⁷ Anernermalo Gûde Piulijiga ᴋuviasugvigivâ.

⁴⁸ Kivgakullungme nikanarsârninga takunârmago. Ahâk, mânamit inuit ilûnatik piloringneraromârpânga.

⁴⁹ Angijoksoarmik pingmanga, ajugaᴋangitûb, hailigemiglo atiliub.

⁵⁰ Nâpkiningningalo nâlektiminêtsainarpok soraijunane.

⁵¹ Sôngogame, talerminut siamartipait ômatimingne piojorijut.

⁵² Pitsartujoksuit iksivautanginit ochotipait, nikanartullo angijorortipait.

⁵³ Kâktut tunitjivigiluarpait piksanginik, akluitullo piksaᴋartinagit kikipait.

⁵⁴ Nâpkigosungnermik erᴋaimavok, kivganelo Israêle ikajorpâ,

⁵⁵ Sorlo angilaurame atâtaptingnut Abrahamut kinguvânginullo issoᴋangitomut.

⁵⁶ Marîalo takᴋinik pingasunik tâpsomanêlauᴋârdlune, angergarivok iglominut.

⁵⁷ Elisabetible erniviksanga naliutingmat, ernermik ernivok.

⁵⁸ Silalingitalo ilangitalo tussaramitsuk, Nâlekab napkigingmago, ᴋuviasuᴋatigivât.

⁵⁹ Uvlullo sitamaujoane nutarârsuk tikipât kipilâllo, atâtangatullo Zacharîasemik ateᴋartipât.

⁶⁰ Anânangatale kiovait oᴋarlune: Aukagle, Johannesemik ateᴋartuksauvok.

⁶¹ Oᴋautivâllo: Ilaᴋangilatille taimaitomik atilingmik.

⁶² Atâtangalo Zacharîase nullorarpât, ᴋanok ateᴋarᴋojomangmangâgo.

⁶³ Aglagaksamiglo ᴋaitauᴋojivok, aglaklunelo oᴋarpok: Johannesemik ateᴋarpok. Ilûnatiglo tataminialerput.

⁶⁴ Tagvainarlo Zacharîasib ᴋaninga oᴋangalo angmartitauvuk, oᴋalerdlunelo Gûde nakoridlarpâ.

⁶⁵ Silalingillo ilûnatik erᴋsilerput. Kakᴋamiullo ilûnatik Judêame tamakkoa tamaita tussaumalerpait.

⁶⁶ Tussartullo tamakkoninga ilûnatik ômamigilerpait oᴋarlutik: ᴋanok ilingajomârasugiviûk nutarârsuk unâ? Nâlekable aggangita illagivât.

⁶⁷ Atâtangalo Zacharîase Anernermik ajunginermik ilumertaulerpok, oᴋarlunelo nelautsilertunik:

⁶⁸ Nakoridlartaule Nâlegak, Israêlib Gûdinga, inuᴋotine nelipsarlugillo piulingmagit.

⁶⁹ Nuilertitsivigingmatigut nagjumik puiliklertiksamik kivgame Dâvidib iglungane,

⁷⁰ Itsaksoak taimâk oᴋarame nelautaijut idluartut ᴋaningitigut:

⁷¹ Piulijomavluta akkerartortiptingnit, ômigigijiptalo ilûnatik agganginit;

⁷² Nâpkigosungnermiglo sakᴋertitsilune angajoᴋâptingnut, angerninelo hailigiojok erᴋaumavlugo,

⁷³ Oᴋarmaringnine, angernerilauktane Abrahamut atâtaptingnut imaitok: tunitjivigijomâramitigut,

⁷⁴ Piulijauvluta akkerartortipta agganginit kivgartorᴋovluta tâpsominga inôtiluta sivôranata,

⁷⁵ Ivjornainermelo idluarnermelo tâpsoma sângane.

⁷⁶ Igvillo nutarak, taijaujomârpotit ᴋotsingnermêtub nelautaijokotinganik; Nâlegak sivorleromârangne, apᴋotiksanga âᴋiksorlugo,

⁷⁷ Inuᴋotingillo illitarsitilugit puilijiksamik, ajornermingnit issumangnarungnaitomik,

⁷⁸ Gûdipta ômatingata nâpkiningningagut. Tâpsomûna nuijub ᴋotsingnermit nelipsarmatigut,

⁷⁹ Sakᴋertuksauvlune taipkonunga tâᴋtomêtunut, toᴋublo tachalininganêtunut, itigavullo torârtilugit apᴋomut ullapirsartauvionartomut.

⁸⁰ Nutarârsuglo aglisilerpok, sangidlalarmelo anernerme, inuᴋangitomêdlunelo, sakᴋerviksanga Israêlib kinguvânginut neliutilerᴋârtinago.