Leviticus 9 - Labrador Inuttitut Heritage Bible

¹ Uvlullo sitamaujortungane Mosesib ᴋaiᴋovait Aron erningillo Israêlikullo angajoᴋaunerojungit;

² Aronalo oᴋautivâ: Tigusilerit tuktuvârarmik angutimik tunergutiksamik ajoᴋêrutiksamik, saugarmiglo angusâlormik tunergutiksamik ôtaksamik, ᴋanoêtoᴋangitûngnik, tunerguserlutillo Nâlekab sângane.

³ Israêliblo ᴋitorngangit oᴋautijaksarivatit, oᴋarlutit: Tigusileritise tuktungajomik angusâlormik tunergutiksamik ajoᴋêrutiksamik; tuktuvârarmiglo saugârarmiglo, atautsemik jârelingmik, ᴋanoêtoᴋangitûngnik, tunergutiksângnik ôtaksângnik;

⁴ Tuktuvangmiglo saugarmiglo angusâlornik tunergutiksângnik ᴋujaliutiksângnik, tunergutauᴋovlugik Nâlekab sângane; tunergutiksamiglo sanaugamik orᴋsumut akusimajomik; uvlome Nâlekab sakᴋervigilârmase.

⁵ Mosesiblo perᴋojijutigijangit âpait ilagêktut tupingata sânganut; ilagêllo ilûnatik katimavut nangerlutiglo Nâlekab sângane.

⁶ Moseselo oᴋarpok: Tamadja Nâlekab piniarutauᴋojanga ilipsingnut: Nâlekablo ânanauningata sakᴋerviginiarpâse.

⁷ Mosesiblo Aron oᴋautivâ: Tunerguserviliarit, tunerguserlutillo tunergutiksarnik ajoᴋêrutiksamik, tunergutiksarniglo ôtaksamik, ulapiksailutillo pivlutit inuillo pivlugit; inuillo tunergutiksangat tunergutigiuk, tâpkoalo ulapᴋoserkit; sôrlo Nâlegaᴋ perᴋojilaungmat.

⁸ Aronalo tunerguserviliarpoᴋ, toᴋotsivorlo tuktuvârarmik tunergutiksamik ajoᴋêrutiksamik nangminine pivlune.

⁹ Aroniblo erningita auk manivât tâpsomunga, tâpsomalo tikine misukpâ aungmut pitilugolo tunerguserviub nakjunginut, auglo kovivâ tunerguserviub tungavinganut;

¹⁰ Tunnorle, taktûglo, kiksautillo tunergutiksamit ajoᴋêrutiksamit ôtipait tunerguservingme, sôrlo Nâlekab Mosese perᴋolaungmago.

¹¹ Nerᴋelo amerlo ôtipâk ikomamut tupersuit avatâne.

¹² Tunergutiksarlo ôtaksak toᴋopâ; Aroniblo erningita auk tunivât tâpsomunga, tâpsomalo serᴋerautigivâ tunerguserviub avatânut.

¹³ Tunergutiksarlo ôtaksak tunivât tâpsomunga, avgoat nalleᴋârlugit niaᴋorlo; tâpsomalo ôtipait tunerguservingme.

¹⁴ Erᴋavillo niullo ergortorpait, ôtilugillo tunergutautipait ôtâk tunerguservingme.

¹⁵ Inuillo tunergutingat tâpsoma manivâ, tuktungajorlo tunergutiksak ajoᴋêrutiksak inuit pivlugit tiguvâ toᴋolugolo, tunergutigilugolo ajornek pivlugo, sivorlertut.

¹⁶ Tunergutiksarlo ôtaksak manivâ tunergutigilugolo ilusioᴋojak maliklugo.

¹⁷ Tunergutiksarlo sanaugak manivâ, agganalo tatalugit tagvangat ôtipâ tunerguservingme, tapiutilugo tunergutaujomut ôtârmut uvlâkut.

¹⁸ Toᴋotsivoktauk tuktuvangmik saugarmiglo angusâlormik, tunergutiksângnik ᴋujaliutiksângnik inuit pivlugit; Aroniblo erningita auk tunivât tâpsomunga, tâpsomalo serᴋerautigivâ tunerguserviub avatânut,

¹⁹ Tuktuvaublo tunnua angusâlublo tunnua, pamiorlo ᴋoinijok, erᴋavingitalo tunnungit, taktullo, kiksautillo;

²⁰ Tunnorlo ilivât sakiâk ᴋânganut, tunnorlo ôtipâ tunerguservingme:

²¹ Sakiâglo tallerlo tallerpik Aronib sanervaiᴋitârtiᴋattarpait tunergutautilugit sanervaiᴋitârtitaujok Nâlekab sângane; sôrlo Mosese perᴋojilaungmat.

²² Aroniblo aggane ᴋolangiutitipait inungnut, saimartipaillo; attersârporlo tunerguserêrame tunergutimik ajoᴋêrutiksamik, tunergusermiglo ôtaksamik, tunerguserniglo ᴋujaliutiksanik.

²³ Moseselo Aronalo iterpuk ilagêktut tupinganut, anigamiglo inuit saimarsarpait; Nâlekablo ânanauninga sakᴋerpok inungnut ilûnainut.

²⁴ Ikomalo anivok Nâlekab sânganit nungutsilunalo tunergutiksamik ôtaksamik tunnomiglo tunerguservingmêtunik; inuillo ilûnatik tamanna takogamitsuk ᴋaggûdlarput pâmangalutiglo.