Leviticus 8 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Aron erningillo ilagilugit tigukit, annorâllo, orᴋsôrlo mingoarutiksak, tuktuvâglo tunergutiksak ajoᴋêrutiksak, saugâglo angusâluk maggûk, amargaujarlo pubjusauteᴋangitomik niaᴋojaktalik;

³ Ilagêllo ilûnatik katimatikit ilagêktut tupingata upkoangane.

⁴ Moseselo taimailiorpoᴋ sôrlo Nâlekab perᴋongmago; ilagêllo katimavut ilagêktut tupingata upkoangane.

⁵ Mosesiblo ilagêt oᴋautivait: Tamadja Nâlekab piniartauᴋojanga.

⁶ Mosesiblo Aron erningillo tikiutivait imermullo ubvarpait.

⁷ Atitipâlo ulingmik, tapseruserpâlo tapserutemut, atitipâlo atigiujarmik, ikiarlo pitipâ tâpsomunga, tapseruserlugolo ikiab takosungnaitûb tapserutinganut, nimerpâlo tâpsomunga.

⁸ Sagvingmiutarlo pitipâ tâpsomunga, ᴋaumaᴋûllo idluarᴋûllo ilivâk sagvingmiutarmut.

⁹ Nessarlugarlo ilivâ niaᴋoanut, sivumiutarlo goldeojok, niaᴋote ivsornaidlartok, pitipâ nessarlugab sivuanut; sôrlo Nâlekab Mosese perᴋongmago.

¹⁰ Mosesiblo orᴋsok mingoarutiksak tiguvâ, tuperlo takamanêtullo tamaita mingoarpait ivsornaitilugillo.

¹¹ Ilangalo serᴋerautigivâ sevenertorlune tunerguservingmut, tunerguserviglo pitangillo, ubvarviglo ikkoggangalo mingoarpait ivsornaititauᴋovlugit.

¹² Orᴋsûblo mingoarutiksab ilanga kovivâ Aronib niaᴋoanut, mingoarlugo ivsornaitilugolo.

¹³ Mosesiblo Aronib erningit tikiupait annorârlugillo ulingnut, tapseruserlugillo tapserutinut, nessarlugaillo nimerlugit tâpkonunga; sôrlo Nâlekab Mosese perᴋolaungmago.

¹⁴ Tuktuvaglo tunergutiksak ajoᴋêrutiksak tikiupâ; Aroniblo erningitalo tuktuvaub tunergutiksab ajoᴋêrutiksab niaᴋoa pattikpât aggangmingnut.

¹⁵ Toᴋopâlo; Mosesiblo auk tiguvâ tikerminullo pitipâ tunerguserviub nakjûgingnut avatânut, tunerguservik ivsornaitilugo, auglo kovivâ tunerguserviub tungavinganut, ivsornaitilugo ulapᴋoserlugo.

¹⁶ Tunnorlo ilûnât erᴋavit ᴋânganêtok tiguvâ, kiksautillo, taktûglo, tâpkoalo tunnuat, Mosesiblo ôtipait tunerguservingme.

¹⁷ Tuktuvaglo, amingalo, nerᴋingalo, annangalo, ôtipait ikomamut tupersuit silatâne; sôrlo Nâlekab Mosese perᴋolaungmago.

¹⁸ Saugarlo angusâlok tunergutiksak ôtaksak ᴋaipâ; Aroniblo erningitalo saugab angusâlûb niaᴋoa pattikpât aggangmingnut.

¹⁹ Toᴋopâlo; Mosesiblo auk serᴋerautigivâ tunerguserviub avatânut.

²⁰ Saugarlo angusâlok avgorpâ, Mosesiblo ôtipait niaᴋorlo, avgoallo, tunnorlo.

²¹ Erᴋavingillo niungillo ergortorpait imermut; Mosesiblo saugak angusâlok ilûnât ôtipâ tunerguservingme; tunergutauvok ôtâk tipigiksautiksak; tunergutauvok ikomakut Nâlekamut; sôrlo Nâlekab Mosese perᴋolaungmago.

²² Saugablo angusâlûb aipanga, angusâlok ivsornaititausiut ᴋaipâ; Aroniblo erningitalo angusâlûb niaᴋoa pattikpât aggangmingnut.

²³ Toᴋopâlo; Mosesiblo aungata ilanga tiguvâ pitilugolo Aronib siutingata tallerpiata puvanganut, aggangitalo tallerpiata kubluanut, itigangitalo tallerpiata puttugunganut.

²⁴ Tikiupaillo Aronib erningit, Mosesiblo aub ilanga pitipâ tâpkoa siutingita tallerpingita puvanginut, aggangitalo tallerpingita kublunginut, itigangitalo tallerpingita puttugunginut: Mosesiblo auk serᴋerautigivâ tunerguserviub avatânut.

²⁵ Tunnorlo, pamiungalo ᴋoinijôk, tunnorlo erᴋavinginêtok, kiksautillo, taktûglo, tâpkoalo tunnungat, tallerlo tallerpik, tiguvait;

²⁶ Amârgaujarmillo pubjusauteᴋangitomik niaᴋôjalingmit Nâlekab sânganêtomit, tigusivok niaᴋôjarmik atautsemik pubjusauteᴋangitomik, niaᴋôjarmiglo atautsemik orᴋsulingmik, sâpatâmiglo atautsemik, ililugillo tunnuit ᴋânginut, talliublo tallerpiub ᴋânganut;

²⁷ Ilûnaitalo pitipait Aronib erningitalo agganginut, sanervaiᴋitârtiᴋattarpaillo tunergutautilugit sanervaiᴋitârtitaujut Nâlekab sângane.

²⁸ Mosesiblo tigulerivait agganginit ôtilugillo tunerguservingme tunergutautilugit ôtâk; ivsornaititauvut tipitsiariktut; tunergutauvut ikomakut Nâlekamut.

²⁹ Mosesiblo sakiak tiguvâ sanervaiᴋitârtiᴋattarlugolo tunergutautilugo sanervaiᴋitârtitaujok Nâlekab sângane; tamanna Mosesib ningersiarivâ angusâlormit ivsornaijutaujomit, sôrlo Nâlekab Mosese perᴋolaungmago.

³⁰ Mosesiblo orᴋsûb mingoarutiksab ilanga, aublo tunerguservingmêtûb ilanga tiguvâk serᴋerautigilugiglo Aronemut annorânginullo erninginullo erningitalo annorânginut tâmna ilagilugo; Aronalo ivsornaitipâ annorângit erningillo erningitalo annorângit ilagilugit.

³¹ Mosesiblo Aron erningillo oᴋautivait: Nerᴋe igasiuk ilagêktut tupingata upkoangane; tagvanalo nerrisiuk niaᴋôjarlo amârgaujarme ivsornaijutiksatalingme, sôrlo perᴋojilaurama, oᴋarlunga: Aronib erningitalo nerrijaksarivât.

³² Nerᴋejablo niaᴋôjablo amiakoa ôtitaksarivase ikomamut.

³³ Uvlulle sevenit nâvlugit anijuksaungilase ilagêktut tupingata upkoanganit, ivsornaititauvigijapse uvlungit nâmaksiᴋârtinagit; uvlut sevenit nâvlugit ivsornaititaksaringmase.

³⁴ Sôrlo uvlome piniartoᴋarmat taimâk Nâlegaᴋ piniartauᴋojilaukpok, ulapᴋosertauᴋovluse.

³⁵ Ilagêktullo tupingata upkoangane noᴋangatsainartuksauvose uvlôtilugo unnuarmelo uvlut sevenit nâvlugit, Nâlekablo perᴋojijutigijanga ivlerilugo, toᴋoᴋonase; taimâk perᴋojaugama.

³⁶ Aroniblo erningitalo piniarutauᴋojaujut tamaita piniarpait, Nâlekab piniarutauᴋojangit Mosesib aggangitigut.