Leviticus 7 - Labrador Inuttitut Heritage Bible

¹ Tamadjalo perᴋojak tunergutiksak pasijaksaungijutiksak pivlugo; ivsornaitoksôvok.

² Tunergutiksab ôtaksab toᴋotauvingane, tunergutiksak pasijaksaungijutiksak toᴋotaujuksauvok; aungalo serᴋerautigijaksarivâ tunerguserviub avatânut.

³ Tunnualo ilûnât tunergutigijaksarivâ; pamiunga ᴋoinijôk erᴋavingitalo tunnungat;

⁴ Taktûglo, taktûglo tunnungat, okpatîkitalo tunnungat, kiksautingillo ilûnaita, taktûk ilagilugik, pêjaraksarivait:

⁵ Ajoᴋertuijûblo ôtitaksarivait tunerguservingme tunergutauᴋovlugik ikomakut Nâlekamut: tunergutauvok pasijaksaungijutiksak.

⁶ Angutit ilûnatik ajoᴋertuijut akorngane nerrijuksauvut tâpsomangat; ineme ivsornaitome nerrijaujuksauvok; ivsornaitoksôvok.

⁷ Tunergutiksab ajoᴋêrutiksab ilinganingatut, taimaituksaugivok tunergutiksak pasijaksaungijutiksak: atautsemik perᴋojaᴋarpok tâpkoa pivlugik: ajoᴋertuijûb tâpkoninga ulapirᴋsaijuteᴋartûb pigijaksarivait.

⁸ Ajoᴋertuijûblo inuit naliata tunergutiksanganik ôtaksamik tunergusertûb, ajoᴋertuijûb tâpsoma nangminerijaksarivâ tunergutib ôtâb tunergusertame aminga.

⁹ Tunergutillo nerᴋiksat ilûnaita igajaujut kiaksautib igavingane, ilûnaitalo jarraktaujut jarrauteme, igautemelônêt sâpatâme, ajoᴋertuijûb tunergusertûb tâpkoninga perᴋutigijaksarivait.

¹⁰ Tunergutillo nerᴋiksat ilûnaita, orᴋsumut akusimajut panertullônêt Aronib erningita ilûnatik adsigêktomik pigijaksarivait.

¹¹ Tamadjalo perᴋojak tunergutiksak ᴋujaliutiksak tunergutaujok Nâlekamut pivlugo.

¹² ᴋujaliutautilugo tunikpago, tunergutiksak ᴋujaliutiksak ilagellugo tunitjijuksauvok ᴋakᴋôjanik pubjusauteᴋangitunik orᴋsumut akusimajunik, ᴋakᴋôjârsungniglo sâpatânik orᴋsumut mingoartaumajunik, ᴋakᴋôjaniglo orᴋsumut akusimajunik sanaugatsiarmit kinipajomit.

¹³ Tunergutiksane tunijaksarivâ ilaᴋartilugo ᴋakᴋôja nik pubjusautelingnik, tapiksaujunik tunergutiminut ᴋujaliutiksamik, ᴋujalijutautilugo.

¹⁴ Tunergutinillo tamainit tunitjijuksauvok atautsimik tunergutauᴋovlugo issârutiksamik Nâlekamut: tamanna ajoᴋertuijûb tunergutiksat ᴋujaliutiksat aunganik serᴋeraijûb pigijaksarivâ.

¹⁵ Tunergutingatalo ᴋujaliutiksab ᴋujaliutautilugo nerᴋinga nerrijaujuksauvok uvlorme tunerguserviojome; amiakoᴋartitsijuksaungilak ᴋaupat tikidlugo.

¹⁶ Tunergutingale angerviviksiorutiksaupat, tujûtaukpallônêt, nerrijaujuksauvok tunerguservigijangane; amiakoalo nerrijaujuksauvok ᴋaupat;

¹⁷ Tunergusertaujûble nerᴋinga amiakoᴋarpat uvlut pingajuat tikidlugo, ikomamut nungutaujuksauvok.

¹⁸ Tunergutingatalo ᴋujaliutiksab tunergusertaujûb nerᴋingata ilanga nerrijaukpat uvlut pingajuane, nâmagijaunialungilak, tunergusertûblo idluarsijutiginialungilâ; maᴋᴋojungnautauniarpoᴋ, nerrijûblo tâpsominga idluitulinine nangmalârpâ.

¹⁹ Nerᴋelo aktuajok ivsornartomik nerrijaujuksaungilak; ikomamut nungutaujuksauvok. Ivsornaitut ilûnatik nerrijuksauvut nerᴋemik mattominga;

²⁰ Nerijulle tunergutaujûb ᴋujaliutiksab nerᴋinganik Nâlekamut tunijaujomik, najorteᴋarlune ivsornarnerminik, tâmna avitaujuksauvok inôᴋatiminit.

²¹ Aktuijokarpallo ivsornartomik, inûb ivsornarninganiglônêt, ômajomiglônêt ivsornartomik, maᴋᴋojungnartomiglônêt sumik ivsornartomik, nerrilunalo tunergutaujûb ᴋujaliutiksab nerᴋinganik, Nâlekamut tunijaujomik, tâmna avitaujuksauvok inôᴋatiminit.

²² Nâlekablo Mosese oᴋarvigivâ, oᴋarlune:

²³ Israêlib ᴋitorngangit oᴋarvigikit, oᴋarlutit: Tunnoktortuksaungilase, tuktuvaub saugablônêt tuktungajublônêt tunnuanik.

²⁴ Ingminiglo toᴋojûb tunnua, ômajunullo aliktortaujûb tunnua, atoraksauvok sunatuinarnut: nerrijaksaritsangilasele.

²⁵ Nerrijorlo nergjutib tunnuanik, ilanga tunijaumatilugo ikomakut Nâlekamut, ilâ, nerrijok tâpsominga avitaujuksauvok inôᴋatiminit.

²⁶ Aungmiglo nerrijuksaungilase, tingmiablônêt nergjutiublônêt aunganik iglupsingne nalianelônêt.

²⁷ Auktortoᴋ kinaugaloarpat, tâmna avitaujuksauvok inôᴋatiminit.

²⁸ Nâlekablo Mosese oᴋarvigivâ, oᴋarlune:

²⁹ Israêlib ᴋitorngangit oᴋarvigikit, oᴋarlutit: Tunitjijomajok tunergutiksaminik ᴋujaliutiksamik Nâlekamut, tâpsoma tunergutine Nâlekamut ᴋaitaksarivâ tunergutiksaminit ᴋujaliutiksamit;

³⁰ Aggangme nangminerijame Nâlekab tunergusiaksangit ikomakut ᴋaitaksarivait; sakiak tunnoᴋartilugo ᴋaitaksarivâ, sakiak senervaiᴋitârtitauᴋattarᴋovlugo tunergutauvlune sanervaiᴋitârtitaujok Nâlekab sângane.

³¹ Ajoᴋertuijûblo tunno ôtitaksarivâ tunerguservingme; sakiagle Aronib erningitalo pigijaksarivât.

³² Tallerle tallerpik tunijaksarivase ajoᴋertuijomut tunergutauᴋovlugo issârutiksamik tunergutipsingnit ᴋujaliutiksanit.

³³ Aronib erningita ilangata tunergusertûb tunergutiksat ᴋujaliutiksat aunganik tunnuaniglo tallek tallerpik ningersiarijaksarivâ.

³⁴ Sakiak sannervaiᴋitârtitaksak tallerlo issârutiksak tigugapkit Israêlib ᴋitorngangita tunergutiksanginit ᴋujaliutiksanit tunilugillo ajoᴋertuijomut Aronemut erninginullo soᴋosijuitomik perᴋutauᴋovlugit tâpkonunga Israêlib ᴋitornganginit.

³⁵ Tamadja Aronib mingoartaumajûb erningitalo mingoartaumajut ningersiarijaksangit Nâlekamut ikomakut tunijaumajunit uvlorme annerijauvigilauktangine ajoᴋertuijôvlutik kivgartorᴋovlugit Nâlekamik;

³⁶ Nâlekab tunijauᴋojangit tâpkonunga Israêlib ᴋitornganginut uvlorme mingoarvigilauktangane tâpkoninga. Soᴋosijuitomik pigijaksaritsainarpait kinguvarêngningine tamaine.

³⁷ Tamadja perᴋojat tunergut ôtaksak, tunergullo nerᴋiksak, tunergullo ajoᴋêrutiksak, tunergullo pasijaksaungijutiksak, mingoartaumanerlo, tunergullo ᴋujaliutiksak, pivlugit;

³⁸ Nâlekab perᴋojijutigilauktangit Mosesemut ᴋakᴋame Sinaime uvlorme perᴋojivigilauktangane Israêlib ᴋitornganginik tunitjiᴋovlugit tunergutiksanginik Nâlekamut Sinaib inuᴋajuitungane.