Leviticus 6 - Labrador Inuttitut Heritage Bible

¹ Nâlekablo Mosese oᴋarvigiva, oᴋarlune:

² Idluitulijoᴋarpat, Nâlegak idluiluktomik piniarvigivlugo, inôᴋatimelo torᴋortauᴋojanga satoraksautitangalônêt nalangaijutigivlugo, aᴋsârnikpallônêt, inôᴋatinelônêt oᴋumaiksartikpago;

³ Nagvârpallônêt assiomajomik misiarutigilugolo oᴋauseludlarlune saglûtigivlugo; tamakkoa naliat inûb piniarpago, idluitulijutigivlugo:

⁴ Idluitulikpat pasijaksaukpallo, utertitsijuksauvok aᴋsârnigarijaminik, pijaminiglônêt oᴋumaiksartitsinekut, satoraksautitaulauktomiglônêt, nagvârtaminiglônêt,

⁵ Misiarutigilauktaminiglônêt oᴋauseludlarlune saglûtigijaminik, ilûnanga utertitaksarivâ tappeᴋartilugo tallimanganik: tunijaksarivâ inuanut uvlorme pasijaksaunime nalonaijartauviane.

⁶ Tunergutiksanalo pasijaksairutiksak ᴋaitaksarivâ Nâlekamut, angusâlok ᴋanoêtoᴋangitok katimgajunit nâmagijat maliklugo, tunergutiksautilugo pasijaksaungijutiksamik, ajoᴋertuijomut;

⁷ Ajoᴋertuijûblo ulapirᴋsaraksarivâ Nâlekab sângane, isumagijungnaiviolârporlo idluitulinerilauktanganit, pasijaksaujutigilauktanga sunaugaloarmangât.

⁸ Nâlekablo Mosese oᴋarvigivâ, oᴋarlune:

⁹ Aron erningillo perᴋokit, oᴋarlutit: Tamadja perᴋojat tunergutiksak ôtaksak pivlugo; tunergut ôtâk tunerguserviub ᴋânganêtuksauvok unnuak nâvlugo uvlâk tikidlugo; tunerguserviublo ikomanga ᴋamituksaungilak.

¹⁰ Ajoᴋertuijûblo annorâne ᴋablunâᴋtajatsiak atijaksarivâ, ᴋarlîngnalo ᴋablunâktajatsiak atijaksarivâk uvininginut; argjallo tunergutab ôtâb tunerguservingmêtut ôtauninganit pijut tigujaksarivait, nâvilugillo tunerguserviub sanianut.

¹¹ Annorânalo pêraksarivait assinginiglo atisilune, argjallo âtaksarivait tupersuit silatânut ipeᴋangitomut.

¹² Ikomalo tunerguservingmêtok ikoâlatitautsainartuksauvok, ᴋamituksaungilak; ajoᴋertuijûb ᴋejugiaraksarivâ uvlât tamât; tunergutiksarlo ôtaksak âkᴋiksoraksarivâ ᴋângane, tunergutiksallo ᴋujaliutiksat tunnuat ôtitaksarivâ ᴋângane.

¹³ Ikoma ikoâlatitautsainartuksauvok tunerguservingme; ᴋamituksaungilak.

¹⁴ Tamadjalo perᴋojat tunergutiksak nerᴋiksak pivlugo: Aronib erningita tunerguseraksarivât Nâlekab sângane, tunerguserviub sângane.

¹⁵ Tigusijuksauvorlo sanaugatsiarmik tigumiaramik tunergutimit nerᴋiksamit, orᴋsunganillo, tipitsiariksautiksanganiglo ilûnânik, ôtitaksarivaillo tunerguservingme naimaᴋutiksautsiarᴋovlugo, erᴋaumajutauᴋovlugo Nâlekamut.

¹⁶ Amiakoalo Aronib erningitalo nerrijaksarivât; pubjusauteᴋarane nerrijaujuksauvok ineme ivsornaitome; ilagêktut tupingata avatâne avaluliorsimajome nerrijaksarivât.

¹⁷ Pubjusauteᴋartilugo igajaujuksaungilak. Tunivara ilangiusiarijangat tunergusiarijamnit ikomakut; tunergutauvlune ajoᴋêrutiksamik, tunergutauvlunalo pasijaksaungijutiksamik ivsornaidlartoᴋsôvok.

¹⁸ Angutit ilûnatik Aronib ᴋitorngangita akornganêtut nerrijuksauvut tâpsomangat, piksarijaksarivât soraijuitomik kinguvâksapsingne tunergutaujunit Nâlekamut ikomakut; ilûnatik aktuijut tâpkoninga ivsornaituksauvut.

¹⁹ Nâlekablo Mosese oᴋarvigivâ, oᴋarlune:

²⁰ Tamadja tunergut Aronib erningitalo tunijaksarijangat Nâlekamut uvlorme mingoartauvigijangine; êfab tallimaujoanik sanaugatsiarmik tunergutiksauᴋovlugo nerᴋiksamik soraingitomik, abvanga uvlâkut, abvangalo unnukut.

²¹ Igauteme sâpatâme sanajaujuksauvok orᴋsumut: igasimakpat iteraksarivât; avgoangotilugolo tunergutiksak nerᴋiksak tunergutigijaksarivât naimaᴋutiksautsiarᴋovlugo Nâlekamut.

²² Ajoᴋertuijûblo mingoarsimajûb tâpsoma inangertingata Aronib erningita akornganit tunergutigijaksarivâ; perᴋojakut soᴋosijuitokut nungutaumariktuksauvok ikomakut Nâlekamut.

²³ Ajoᴋertuijûblo tunergutingit nerᴋiksanik ilûnaita nungutaujuksauvut ikomamut: nerrijaujuksaungilat.

²⁴ Nâlekablo Mosese oᴋarvigivâ, oᴋarlune:

²⁵ Aron erningillo oᴋarvigikit, oᴋarlutit: Tamadja perᴋojak tunergutiksak ajoᴋêrutiksak pivlugo: tunergutiksab ôtaksab toᴋotauvingane tunergutiksak ajoᴋêrutiksak toᴋotaujuksauvok Nâlekab sângane; ivsornaitoksôdlarpok.

²⁶ Ajoᴋertuijûb tunergusertûb tâpsominga ajornek pivlugo nerrijaksarivâ; nerrijaujuksauvok ivsornaitovingme, ilagêktut tupingata avatâne avaluliorsimajome.

²⁷ Ilûnatik aktuijut tâpsoma nerᴋinganik ivsornaituksauvut; aungatalo ilanga serparsartaukpat annorânut, serparsartaujok ergortortaujuksauvok ivsornaitovingme.

²⁸ Ukkusigle nerᴋit igamavigijangat maggaukpat serᴋomitaujuksauvok; igamajaukpalle ukkusingme ᴋaᴋorlerme, tâmna salumarsârtaujuksauvok, ergortortauvlunalo imermut.

²⁹ Angutit ilûnatik ajoᴋertuijut akorngane nerrijuksauvut tâpsomangat: ivsornaidlartoᴋsôvok.

³⁰ Tunergutiksalle naliallônêt, aungata ilanga âtaukpat ilagêktut tupinganut ulapirᴋsautiksauᴋovlugo ivsornaitovingme, nerrijaujuksaungilak: ikomamut nungutaujuksauvok.