Leviticus 4 - Labrador Inuttitut Heritage Bible

¹ Nâlekablo Mosese oᴋarvigiva, oᴋarlune:

² Israêlib ᴋitorngangit oᴋarvigikit, oᴋarlutillo: Pijarenane idluitulijoᴋarpat Nâlekab inerterutingita nalianik, piniarpallo perᴋojaungitut ilanganik:

³ Ajoᴋertuijok mingoartaumajok idluitulikpat inugasaksuit sinaungajutauninginut; ajornine piniarnerijane pitjutigellugo tunergusertuksauvok tuktuvangmik inôtsungmik ᴋanoêtoᴋangitomik Nâlekamut ajoᴋêrutiksamik.

⁴ Tuktuvaglo âtaksarivâ ilagêktut tupingata upkoangata sânganut Nâlekab sângane; tuktuvaublo niaᴋoa patingmijaksarivâ, tuktuvaglo toᴋolugo Nâlekab sângane.

⁵ Ajoᴋertuijûblo mingoartaumajûb tuktuvaub aungata ilanga tigujaksarivâ tikiutilugolo ilagêktut tupinganut:

⁶ Ajoᴋertuijûblo tikine misugaksarivâ aungmut, aublo ilanga serᴋerautigilugo sevenertorlune Nâlekab sângane, ivsornaitoviub upkoangata sângane.

⁷ Ajoᴋertuijûblo aub ilanga pititaksarivâ isserluanititsiviub tipitsiariksaumik, ilagêktut tupinganêtûb, nakjunginut, Nâlekab sângane: tuktuvaublo aunga ilûnât kovijaksarivâ tunerguserviub tunergutinik ôtaksanik ikkogganganut, ilagêktut tupingata upkoangata sânganêtomut.

⁸ Tuktuvaublo ajoᴋêrutiksab tunnua ilûnât pêjaraksarivâ tâpsomangat; kiksautingit erᴋavingitalo tunnungat ilûnaita.

⁹ Taktûglo, taktûkitalo tunnungit, okpatîkitalo tunnungit, taktûk ilagilugik, pêjaraksarivait.

¹⁰ Sôrlo pêjartaungmat tuktuvangmit tunergutiksamit ᴋujaliutiksamit: ajoᴋertuijûblo ôtitaksarivait tunerguservingme ôtaksanik.

¹¹ Tuktuvaublo aminga, nerᴋingalo ilûnât, niaᴋoalo, niungillo, erᴋavingillo, anangalo,

¹² Ilâ, tuktuvak ilûnât âtaksarivâ tangmârviub avatânut, ipeᴋangitomut, argjaᴋôvingmut, ôtitaksarivâlo ikomamut ᴋejuit ᴋângane: argjaᴋôvingme ôtaujuksauvok.

¹³ Ilagello Israêlikut ilûnatik tammarpatta, piniarnitiglo ijersimakpatta ilagêt ijinginit, pinialaukpattalo Nâlekab inerterutingita ilanginik, pasijaksaukpattalo;

¹⁴ Ajornek idluitulinerijangat ᴋaujijaulerpat, ilagêt tunitjijuksauvut tuktuvangmik inôtsungmik ajoᴋêrutiksamik, âlugolo ilagêktut tupingata sânganut.

¹⁵ Ilagêllo angajoᴋângita tuktuvaub niaᴋoa patingmijaksarivât Nâlekab sângane, tuktuvaglo toᴋotaujuksauvok Nâlekab sângane.

¹⁶ Ajoᴋertuijûblo mingoartaumajûb tuktuvaub aungata ilanga tikiutijaksarivâ ilagêktut tupinganut.

¹⁷ Ajoᴋertuijûblo tikine misugaksarivâ aungmut serᴋerautigilugolo sevenertorlune Nâlekab sângane, upkûb sângane.

¹⁸ Aublo ilanga pititaksarivâ tunerguserviub, Nâlekab sânganêtûb, ilagêktut tupinganêtûb, nakjunginut, auglo ilûnât kovijaksarivâ tunerguserviub tunergutinik ôtaksanik ikkogganganut, ilagêktut tupingata upkoangata sânganêtomut.

¹⁹ Tunnualo ilûnât pêjaraksarivât tâpsomangat, ôtilugolo tunerguservingme.

²⁰ Tuktuvak taimailiorutigijaksarivâ; sôrlo tuktuvak tunergutiksak ajoᴋêrutiksak piniarvigilaungmago taimâk una piniarvigijaksarivâ: ajoᴋertuijûblo ulapirᴋsaraksarivait, isumagijungnaiviolârput tagva.

²¹ Tuktuvaglo âtaksarivâ tangmârviub avatânut ôtilugolo sôrlo tuktuvak sivorlek ôtilaungmago: tunergutauvok ajoᴋêrutiksak ilagêt pivlugit.

²² Angajoᴋaksuit ilangat idluitulikpat, pijarenanalo piniarpat Nâlekab Gûdingata inerterutingita ilanganik, pasijaksaukpallo;

²³ Ajorningalo piniarnerijanga nalonaijartaukpat tâpsomunga, ᴋaitsijuksauvok tunergutiksamik tuktungajomik angusâlormik ᴋanoêtoᴋangitomik;

²⁴ Aggangminullo tuktungajûb niaᴋoa patingmijaksarivâ, toᴋotaksarivâlo tunergutiksat ôtaksat toᴋotauvigivaktangine Nâlekab sângane: tunergutauvok ajoᴋêrutiksak.

²⁵ Ajoᴋertuijûblo tunergutiksab ajoᴋêrutiksab aungata ilanga tigujaksarivâ tikerminut, pitilugolo tunergutit ôtaksat tunerguservingata nakjunginut, aungalo kovijaksarivâ tunerguserviub tunergutinik ôtaksanik ikkogganganut.

²⁶ Tunnungalo ilûnât ôtitaksarivâ tunerguservingme, sôrlo tunnok tunergutiksanit ᴋujaliutiksanit: ajoᴋertuijûblo ulapirᴋsaraksarivâ ajorninga pivlugo, isumagijungnaiviolârpoᴋ tagva.

²⁷ Inuillo erᴋanangitut ilangat pijarenane idluitulikpat, piniarlune Nâlekab inerterutingita ilanganik, pasijaksaukpallo;

²⁸ Ajorningalo piniarnerijanga nalonaijartaukpat tâpsomunga, ᴋaitsijuksauvok tunergutiksamik tuktungajomik arnarmik ᴋanoêtoᴋangitomik, ajornine piniarnerijane pivlugo.

²⁹ Aggangminullo tunergutiksab ajoᴋêrutiksab niaᴋoa patingmijaksarivâ, tunergutiksarlo ajoᴋêrutiksak toᴋotaksarivâ ôtaksanik tunergutiksat inigijangane.

³⁰ Tikerminullo aungata ilanga tigujaksarivâ pitilugolo tunergutit ôtaksat tunerguservingata nakjunginut, aungalo ilûnât kovijaksarivâ tunerguserviub ikkoggangata avatânut.

³¹ Tunnungalo ilûnât pêjaraksarivâ, sôrlo tunnok pêjartaungmat tunergutinit ᴋujaliutiksanit; ajoᴋertuijûblo ôtitaksarivâ tunerguservingme tipitsiariktoᴋutauᴋovlugo Nâlekamut; ajoᴋertuijûblo ulapirᴋsaraksarivâ, isumagijungnaiviolârporlo.

³² Saugârsungmiglo ᴋaitsikpat tunergutiksauᴋovlugo ajoᴋêrutiksamik, arnak ᴋanoêtoᴋangitok ᴋaitaksarivâ.

³³ Aggangminullo tunergutiksab ajoᴋêrutiksab niaᴋoa patingmijaksarivâ, toᴋotaksarivâlo tunergutiksautilugo ajoᴋêrutiksamik tunergutiksat ôtaksat toᴋotauvigivaktangine.

³⁴ Tikerminullo tunergutiksab ajoᴋêrutiksab aungata ilanga tigujaksarivâ pitilugolo tunergutiksat ôtaksat tunerguservingata nakjunginut, aungalo ilûnât kovijaksarivâ tunerguserviub ikkoggangata avatânut;

³⁵ Tunnungalo ilûnât pêjaraksarivâ sôrlo saugârsûb tunnunga pêjartaungmat tunergutiksanit ᴋujaliutiksanit; ajoᴋertuijûblo ôtitaksarivâ tunerguservingme, tunergutit Nâlekamut ikomakut ilusioᴋojangit maliklugit: ajoᴋertuijûblo ulapirᴋsaraksarivâ ajorninga piniarnerijanga pitjutigellugo, isumagijungnaiviolârporlo.