Leviticus 3 - Labrador Inuttitut Heritage Bible

¹ Tunergutingalo tunergutaukpat ᴋujaliutiksamik; tunikpago tuktuvangnit, angutelônêt, arnarlônêt, tunijaksarivâ ᴋanoêtoᴋangitok Nâlekab sângane.

² Tunergutiksablo niaᴋoa patingmilugo aggangminut, toᴋotaksarivâ ilagêktut tupingata upkoangata sângane: Aroniblo erningita ajoᴋertuijut auk serᴋerautigijaksarivât tunerguserviub avatânut.

³ Tunergutinillo ᴋujaliutiksanit tunergusertuksauvok tunergutinik ikomakut Nâlekamut: kiksautingitalo tunnungit tunnuillo erᴋavinginêtut ilûnatik,

⁴ Taktûᴋita tunnungit okpatîkitalo tunnungit kiksautingillo ilûnaita taktûk ilagilugik, pêjaraksarivait.

⁵ Aroniblo erningita ôtitaksarivait tunerguservingme tunergutib ôtaksab ᴋângane, ᴋejuit ikomamêtut ᴋângane: tunergutauvok ôtâk, tunergut ikomakut, tipitsiariktoᴋutaujok Nâlekamut.

⁶ Tunergutingalo tunergutiokpat ᴋujaliutiksamik Nâlekamut sauganit, angutelônêt, arnarlônêt ᴋanoêtoᴋangitok tunijaksarivâ.

⁷ Saugârsuk tunergutigikpago, tunergutigijaksarivâ Nâlekab sângane.

⁸ Tunergutimelo niaᴋoa patingmilugo toᴋotaksarivâ ilagêktut tupingata sângane, Aroniblo erningita aunga serᴋerautigijaksarivât tunerguserviub avatânut.

⁹ Tunergusertuksauvorlo tunergutimik ᴋujaliutiksamik ikomakut Nâlekamut; tunnua, pamiungalo ᴋoinijôk nakataksarivâk ᴋujapiganginit, kiksautingitalo tunnungit erᴋavingitalo tunnungit ilûnaita,

¹⁰ Taktûglo, taktûkitalo tunnungit, okpatîkitalo tunnungit, kiksautingillo ilûnaita, taktûk ilagilugik, pêjaraksarivait.

¹¹ Ajoᴋertuijûblo ôtitaksarivait tunerguservingme: nerᴋiksauvok tunergusertaujok ikomakut Nâlekamut.

¹² Tunergutingalo tuktungajôkpat tunergutigijaksarivâ Nâlekab sângane:

¹³ Niaᴋoalo patingmilugo toᴋotaksarivâ ilagêktut tupingata sângane: Aroniblo erningita aunga serᴋerautigijaksarivât tunerguserviub avatânut.

¹⁴ Tunergutinalo tunijaksarivâ tâpsomangat, tunergut ikomakut Nâlekamut; kiksautingita erᴋavingitalo tunnungit ilûnaita;

¹⁵ Taktûglo, taktûkitalo tunnungit, okpatîkitalo tunnungit, kiksautingillo, taktûk ilagilugik, pêjaraksarivait.

¹⁶ Ajoᴋertuijûblo ôtitaksarivait tunerguservingme: nerᴋiksauvok tunergusertaujok ikomakut tipitsiariktok: tunnok ilûnât Nâlekab pigivâ.

¹⁷ Ilusioᴋojauvok soraijuitomik kinguvârêngnipsingne iglupsingne ilûnaine, tunnoktortuksaunginapse auktoraselo.