Leviticus 27 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlib ᴋitorngangit oᴋarvigikit, oᴋautilugillo: Inuit naliat angermarigune tunijomavlune nangminerminik, igvit inuit akkigijungnartangit Nâlekab sângane oᴋautigijaksarivatit.

³ Imâglo akkeᴋariaᴋarneraraksarivatit; jâreᴋarninganit 20nik jâreᴋarninganut 60nik akkeᴋariaᴋarneraraksarivat sekelenik silberenik 50nik, ivsornaitoviub sekelinga ôktûtigilugo;

⁴ Arnaukpalle sekelinik 30nik akkitotigineraraksarivat.

⁵ Jâreᴋarninganillo tallimanik jâreᴋarninganut 20nik, angut sekelenik 20nik, arnarlo sekelenik 10nik akkitutigineraraksarivatik.

⁶ Takᴋeᴋarninganit atautsemik jâreᴋarninganut tallimanik angut sekelenik silberenik tallimanik, arnarlo sekelenik silberenik pingasunik akkitotigineraraksarivatik.

⁷ Jâreᴋarpallo 60nik ununersaniglo, angut sekelenik 15nik arnarlo sekelenik 10nik akkitotigineraraksarivatik.

⁸ Sukkôluarpalle akkeᴋariaᴋarnerartarnit, ajoᴋertuijûb sânganut pititaujuksauvok, ajoᴋertuijûblo akkigijungnartanga oᴋautigijaksarivâ; angermariktûb akkigijungnartanga maliklugo ajoᴋertuijûb akketotigineraraksarivâ.

⁹ Nergjuteokpallo inûb tunergutigijomajanga Nâlekamut, tunijaujûb Nâlekamut ilûnanga ivsornaipok.

¹⁰ Asserᴋotsititaksaringilâ tauᴋsiutinagolônêt, ajungitok piungitomut, piungitorlônêt ajungitomut, tauᴋsiutjipallo nergjutemik nergjutemut, tagva tamarmik tunijaujok tauksiutijaujorlo ivsornaituksauvuk.

¹¹ Nergjuteokpalle tunijauvalungitok Nâlekamut, nergjute pititaksarivâ ajoᴋertuijûb sânganut;

¹² Ajoᴋertuijûblo akkigijungnartanga oᴋautigijaksarivâ, ajungitôkpat piungitôkpallônêt; sôrlolo igvit ajoᴋertuijôjotit akkeᴋarᴋogangne, taimailingajuksauvok.

¹³ Pisiarijomalermiguniuglo tappeᴋartitaksarivâ akkeᴋarᴋolauktavit tâpsominga tallimanganik.

¹⁴ Inublo iglune tunergutigikpago ivsornaiᴋovlugo Nâlekamut, ajoᴋertuijûb akkigijungnartanga oᴋautigijaksarivâ piojôkpat piungitôkpallônêt; sôrlolo ajoᴋertuijûb akkeᴋarᴋongmago, taimailingajuksauvok.

¹⁵ Tunitjijûb tâpsominga pisiarijomalermiguniuk, tappeᴋartitaksarivâ akkeᴋarᴋolauktavit tâpsominga tallimanganik; perᴋutigilârpâ tagva.

¹⁶ Inublo perorsêvime kingormgutigilauktame ilanga tunergutigikpago Nâlekamut, tagva akkeᴋarᴋojaksarivat karngasortauvioninga maliklugo, perorsêvik karngasortauviksak sanaugâluksanik ôktûtib homerib nâmanganik akkeᴋarᴋojaksarivat sekelenik silberenik 50nik.

¹⁷ Perorsêvine tunergutigiguniuk jâremit serriviksaujomit, akkitotiginerainit maliklugo akkitotigilârpok.

¹⁸ Jârible serriviksab kingorngane tunergutigiguniuk, ajoᴋertuijûb akkigijungnartanga oᴋautigijaksarivâ jârit kapsiolârningit serriviksak tikidlugo maliklugit; tâpkoalo maliklugit akkeᴋarᴋojaksarivâ.

¹⁹ Tunitjilauktûblo perorsêvingmik pisiarijomalermiguniuk, tappeᴋartitaksarivâ akkeᴋarᴋolauktavit tallimanganik, perᴋutigilârpâlo tagva.

²⁰ Pisiarijomangilermiguniugle perorsêvik, niorvgutigiguniuglônêt assiminut, tagva pisiaksaujungnaimarikpok;

²¹ Perorsêvigle, utilerpat jâreme serriviksarme, ivsornaituksauvok Nâlekamut, perorsêviktut perᴋutaumariktotut; ajoᴋertuijûb perᴋutigijaksarivâ.

²² Naliatalo perorsêvik pisiarilauktane kingormgutigilaungitane tunergutigiguniuk;

²³ Ajoᴋertuijok kititsijuksauvok tâpsomunga akkeᴋarᴋolauktarnik jâre serriviksak tikidlugo; uvlormelo taipsomane tunitjijuksauvok akkeᴋarᴋolauktarnik ivsornaiᴋovlugo Nâlekamut.

²⁴ Jâreme serriviksarme perorsêvik utertuksauvok aulailauktomut tâpsominga, ilâ, tâpsomunga kingormgujilauktomut nunamik tâpsominga.

²⁵ Akkeᴋarᴋojatillo ilûnatik maliktuksauvut ivsornaitoviub sekelinganik; gêrat 20 sekeleojuksauvut atautsemik.

²⁶ Nergjutille pijariorutingit, pijariorutiksautitaujut Nâlekamut, tunergutiksautitaujuksaungilat; tuktuvaumangâllônêt saugaumangâllônêt, Nâlekab perᴋutigivâ.

²⁷ Nergjuteokpallo ivsornartok, pisiarijaksarivâ akkeᴋarᴋojat maliklugo, tappeᴋartilugolo akkigijangata tallimanganik; pisiarijomangipagolo, aulaijaujuksauvok akkeᴋarᴋojat maliklugo.

²⁸ Perkutaumariktorle, inûb perᴋutautitanga Nâlekamut pigijaminit tamainit, inôngmangât nergjuteongmangâllônêt perorsêviongmangâllônêt pigijanganik, aulaijaujuksaungilak pisiarijaujuksaungilarlônêt; perᴋutautitaujut ilûnatik ivsornaitoksôdlarput Nâlekamut.

²⁹ Perᴋutautitaumajok, inûb perᴋutautitanga, pisiarijaujuksaungilak, toᴋotaujuksauvorle.

³⁰ Nunablo sakᴋertangita tallimaujungit ilûnatik, perutsiangongmangât napârtûblônêt paungangit, Nâlekab perᴋutigivait; ivsornaiput Nâlekamut.

³¹ Inûblo perᴋutime tallimaujungita ilanga pisiarijomalermikpago, tappeᴋartitaksarivâ tallimanganik.

³² Tuktuvallo saugallo tallimaujungit ilûnatik, ajaupiab atâgôrtut, ivsornaituksauvut Nâlekamut.

³³ Nautsertortuksaungilak piojôngmangât piungitôngmangâllônêt, tauksiutijaksaringilâlônêt; taukserpagolo tagva tamarmik tauksertaujok tauktingalo ivsornaituksauvuk; pisiarijaujuksaungilak.

³⁴ Tamadja perᴋojat, Nâlekab perᴋojijutigijangit Mosesemut Israêlib ᴋitorngangit pivlugit, ᴋakᴋame Sinaime.