Leviticus 25 - Labrador Inuttitut Heritage Bible

¹ Nâlekablo Mosese oᴋarvigivâ ᴋakᴋame Sinaime, oᴋarlune:

² Israêlib ᴋitorngangit oᴋarvigikit, oᴋautilugillo: Tikiutigupse nunamut tunijomajamnut ilipsingnut, nuna merngoerserviksiortuksauvok Nâlekamut.

³ Jârit sixit nâvlugit perorsêvise karngasoivigijaksarivase, jârillo sixit nâvlugit napârtoᴋotise vaineliksat kipisivigijaksarivase akkerᴋungita ilanginik paungangillo katersorlugit.

⁴ Jârille seveningat sabbateojuksauvok nunab merngoerserviksanganik Nâlekamut; perorsêvit karngasoivigijaksaringilat, napârtullo vaineliksat pêjaivigijaksaringilatit akkerᴋunik.

⁵ Ingmingnik perortut katersoraksarilungilatit, napârtoᴋotivillo vaineliksab kipisivigilauktavit paungangit katersoraksarilunginivatit; jâreojuksauvok nunab merngoerserviksanganik.

⁶ Nunablo merngoerserninga ilingajuksauvok nerᴋiksakarniksapsingnut; ilingnut, kivgarnullo, kivgarnullo arnarmut, attartugarnullo takorngartarnullo ilingnêtunut;

⁷ Nergjuteᴋotingnullo, ômajunullo nunangnêtunut, tâpkoa perutsiangit ilûnaita nerᴋiksarijaksarivait.

⁸ Jâriniglo merngoerserviksanik sevenenik kititsijuksauvotit ilingnut, jârit sevenit sevenertorlugit; jâriolârpullo ilingnut jârit merngoerserviksat sevenit uvlunginik, tagva jârinik 49nik.

⁹ Tiliklilârpotit tagva tiptulausijartomik nipperᴋortojomik nunakut takᴋit seveningata uvlungita teningane; uvlorme ulapirᴋsartauviksame tiliklilârpose tiptulausijartomik nunapsigut ilûnâgut.

¹⁰ Jârillo 50ingat opigijaksarivase, jâremiglo ᴋelarudjartauviksoarmik ᴋaujititsijuksauvose nunab inunginut tamainut nunab ilûnangane; serrivigijaksarivase; ilûnaselo utertuksauvose kingormgutijapsingnut, utertuksauvoselo ilûnase ilagijapsingnut.

¹¹ Jârit 50ingat tâmna serrivigijaksarivase; karngasoijuksaungilase, katersijuksaungilaselônêt ingmingnik perortunik tâpsomane, napârtullo vaineliksat kipisivigilaungitapse paunganginik katersijuksaungilase tâpsomane.

¹² Serriviksaudlarmat; ivlernadlartuksauvok ilipsingnut; nerrijuksauvosele perorsêvit perutsianginik.

¹³ Jâreme tâpsomane serriviksarme ilûnase utertuksauvose nunavinigijapsingnut.

¹⁴ Aulaiguvit sunamik inôᴋatingnut, pisiniaruvillônêt inôᴋativit agganginit, terliartigêktuksaungilase;

¹⁵ Jârit, jârib serriviksab kingorngane unurningit maliklugit, pisiniartuksauvotit, jârillo katersiviksaulârtut unurningit maliklugit aulaivigilârpâtit.

¹⁶ Jârit unurningit maliklugit niorvgutigijomajat akkitunersautitaksarivat, jârillo ikiningit maliklugit akkikinersautitaksarivat; katersiviolârtut unurningit maliklugit niorvgutigivait ilingnut.

¹⁷ Terliartigêktuksaungilase, Gûdîlle sivôragijaksarivat; Uvangaugama Nâlegak Gûdise.

¹⁸ Taimaimat maligaksauᴋojakka piniaraksarivase, idluarijakkalo nâleklugit piniarlugillo; terlikluselo inôjuksauvose nuname.

¹⁹ Nunablo perutsiane sakᴋilârpait, akᴋeartorluselo nerrilârpose, inôvluselo tagvane terlikluse.

²⁰ Oᴋarupselo: Sumik nerrilârᴋitâ jârit seveninganê? Ahâk, karngasoijuksaungilagut katersoijuksaunatalônêt;

²¹ Tagva saimarsainera perᴋojomavara ilipsingnut jârit sixingane, sakᴋêlârporlo perutsianik jârinut pingasunut nâmalârtunik.

²² Jârillo 8ingane karngasoilârpose nerriluselo perutsianik torᴋortaumajunik; jârit 9ingat tikidlugo, perutsiangit nutât inerᴋârtinagit, torᴋortausimajut nerrijaksarivase.

²³ Nunalo aulaijaksaringilase issoᴋangitomut; nuna perᴋutigigapko, ilipselo takorngartauvluselo tujormiogapse uvamne.

²⁴ Nunamelo ilûnâne perᴋutigijapsingne angiᴋatigêktuksauvose nuna aulaijak pisiangojuksaungmat.

²⁵ ᴋatangutit akludlalerpat, perᴋutimelo ilanga niorvgutigikpago, ilanga ᴋaninerpâk ᴋaijuksauvok ᴋatangutimelo niorvgutigijanga pisiaringmilugo.

²⁶ Inuglo ilaᴋangikune pisijungnartomik, nangminerlo akluilinajarune nagvârlunalo pisiniutiksamik nâmaktomik,

²⁷ Kititsile jârinik niorvgutigijauninganit, akkigilauktangatalo amiakoa utertiliuk pisilauktomut tâpsominga; taimaglo utertuksauvok perᴋutigisimajaminut.

²⁸ Nangminerle pisiaringmilugo saperune, niorvgutigijanga pisilauktûb tâpsominga agganginêtsainartuksauvok jâre serriviksak tikidlugo; jâremelo serriviksarme utertuksauvok, inualo utilârpoᴋ perᴋutigisimajaminut.

²⁹ Inublo iglo inigijaksak iglugasaksoarne avaluliorsimajune niorvgutigikpago, pisiarijungnarivâ jâre iluitok niorvgutigijauninganit nâᴋârtinago; jâre iluitok nâvlugo pisiviksakarungnarpoᴋ tâpsominga.

³⁰ Pisiarijaulungipalle jâre iluitok nâᴋârtinago, iglo iglugasaksoarnêtok avaluliorsimajune, nangmineriliutijaujuksauvok issoᴋarniangitomik pisilauktomut tâpsominga, kinguvârêngitigut; utertuksaungilak jâreme serriviksaujome.

³¹ Iglulle iglugasangnêtut avaluliorsimangitune nunab perorsêvingititut ilingajuksauvut; pisiarijaungmijungnarput, jâremelo serriviksarme utertuksauvut inugilauktanginut.

³² Levitille iglugasaksoangit, iglut iglugasaksoarnêtut tâpkoa perᴋutigijangine, Levitit pisiarijungnarivait ᴋangatuinak.

³³ Pisijokarpallo Levitinit, iglo niorvgutigijaujok, iglugasaksuillo perᴋutigijangit, utertuksauvut jâreme serriviksarme, iglut Levitit iglugasaksoangine tâpkoa perᴋutigingmagit Israêlib ᴋitorngangita akorngane.

³⁴ Perorsêville nerrinasugvit iglugasaksuit avatâne aulaijaujuksaungilat; tâpkoa perᴋutigingmagit soraijuitomik.

³⁵ ᴋatangutillo akludlalerpat, aggangillo ajulerpatta ilipsingne, tagva patangaititaksarivat; takorngartartut tujormiojotullo inôjuksauvok akunapsingne.

³⁶ Akkituterijutiksamik tapiksamiglônêt tigusiniarnak tâpsomangat; Gûdîlle sivôragiuk; ᴋatangutit inôjungnarᴋovlugo ilingne.

³⁷ Tunitjivigijaksaringilat kênaujarnik akkituterinermut, nerᴋiksatillo tuniniarnagit tâpsomunga tapiksakarnermut.

³⁸ Uvangauvunga Nâlegak Gûdise, tikiutitilauktise nunamit Egiptenemit, nuna Kanaan tunijomavlugo ilipsingnut, Gûdeojomavlunga ilipsingnut.

³⁹ ᴋatangutillo akludlalerpat ilingne, niorvgutiksangortilunalo nangminerminik ilingnut, kipalotut nangminerijaujotut kivgautitaksaringilat;

⁴⁰ Kivgauvlune akkilertaujok tujormiovlunalo ilingnêtuksauvok; kivgartoraksarivâtit jâre serriviksaujok tikidlugo;

⁴¹ Taipsomanele anijuksauvok ilingnit, tâmna ᴋitorngangillo ilagilugit, utertuksauvorlo ilaminut, atâtagilauktamelo kingormgutijanginut utertuksauvok.

⁴² Tâpkoa kivgarigapkit, tikiutitilauktakka nunamit Egiptenemit; niorvgutaujuksaungilat kipalogijauniarlutik nangminerijaujunik;

⁴³ Sôngosârnermut angajoᴋausivigijaksaringilat; Gûdîlle sivôragijaksarivat.

⁴⁴ Kipalogijatit nangminerijatit angutit arnallo pijomajatit pitjutigilugit, taimaitut pisiarijungnarpatit inôᴋatigêksoarnit avatipsingnêtunit.

⁴⁵ Taimâktauk takorngartat ᴋitornganginit tujormiojunit ilipsingne, tâpkoalo ᴋitorngarêngninginit inûlertunit nunapsingne, pisiniarungnarpose, tâpkoalo nangminerilârpase.

⁴⁶ Kingormgutijaksautilârpaselo ᴋitorngapsingnut kingunipsingne, perᴋutauᴋovlugit tâpkonunga; tâpkonangat tigusijuksauvose kipalogijomajapsingnik nangminerijaksanik soraijuitomik; ᴋatangutisele Israêlib ᴋitorngangit sôngosârnermut angajoᴋausivigijaksaringimarikpase.

⁴⁷ Takorngartaujorlo tujormiojorlônêt ilingne akluilinajarune, ᴋatangutîllo aklulinajarune tâpsoma saniane, niorvgutigigunalo nangminerminik takorngartarmut tujormiojomullônêt ilingnêtomut, takorngartablônêt ilangita ilanganut;

⁴⁸ Niorvgutigiᴋârdlune nangminerminik, pisiarijaujungnarivok; ᴋatangutime ilangata pisiarijungnarpâ;

⁴⁹ Akkamelônêt angamelônêt, tâpkoalônêt erningita ilangata pisiarijungnarpâ, ilamelônêt ᴋanitut ilangata pisiarijungnarpâ; akluinajarunelônêt nangminerminik pisiarijungnarpok.

⁵⁰ Pisilauktorlo tâpsominga kititsiᴋatigijaksarivâ jârit kapsiomangâta jâremit aulaivigilauktaminit tâpsomunga jâremut serriviksarmut; pisiarijungnarminingalo akkeᴋartuksauvok jârit unurningit maliklugit; akkiliutiginajartane kivgaugune akkilertaujok maliklugo.

⁵¹ Jârit sutaijarpatta sulle, tâpkoa unurningit maliklugit utertitsijuksauvok pisiarijaungminime akkinganik kênaujanit akkiliutaulauktunit taipsomane pisiarijaugame.

⁵² Jârille ikitôkpatta sulle jâre serriviksak tikidlugo, kititsiᴋatigijaksarivâ, akkilêvlunalo pisiarijaunime akkinganik.

⁵³ Kivgatut akkilertaujotut jâremit jâremut tâpsomanêtuksauvok; tâpsomale sôngosârnermut angajoᴋausivigijaksaringilâ sângne.

⁵⁴ Taimaitulle nalianut pisiarijaungmilungikune, ᴋelarudjârtaujuksauvok jâreme serriviksarme, tâmna ᴋitornganalo ilagilugit.

⁵⁵ Israêlib ᴋitorngangit kivgaungmatta uvamnut; kivgarivakka tikiutitilauktakka nunamit Egiptenemit; Uvangauvunga Nâlegak Gûdise.