Leviticus 24 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlib ᴋitorngangit perᴋokit, âtsiᴋovlugit ilingnut napârtûb orᴋsuliub orᴋsuanik ilaᴋangitomik katjuksimajomik ikomaksamik, ᴋolleᴋartilugo ikimatsainartomik.

³ Kigligiutjinektaliub upkoangata silatâne, tupersoarme katimavingme, Aronib âᴋiksoraksarivâ sorairᴋonago unungmit ulûb ᴋaulerninga tikidlugo Nâlekab sângane; perᴋojak tamanna soᴋosijuituksauvok kinguvângoᴋatigêngnipsigut.

⁴ Kollit âᴋiksoraksarivait nanneroaᴋarvingme piojome Nâlekab sângane soraingitomik.

⁵ Sanaugatsiarmiglo tigusijuksauvotit ᴋakᴋôjaliorlutillo 12nik tâpsomangat; efab tallimaujûgik maggûk ᴋakᴋôjarmut atautsemut ilingajuksauvuk.

⁶ Aᴋiksoraksarivatillo avilugit ingmikut maggoililugit, atunit sixotilugit, sâme ivsornaitome Nâlekab sângane.

⁷ Ingmigolingajûngnalo tamangne ilijijuksauvotit tipitsiariksautiksamik ilaᴋangitomik, ᴋakᴋôjauᴋovlugit erᴋaumajutiksanik, tunergutiksanik ikomakut Nâlekamut.

⁸ Sabbatine tamaine âᴋiksoraksaritsainarpait Nâlekab sângane; angiᴋatigêngniovok soraijuitok Israêlib ᴋitorngangit pivlugit.

⁹ Aroniblo erningitalo perᴋutigijaksarivait; nerrijaksarivaillo ivsornaitovingme; ivsornainerpaungmat tâpsomunga, tunijaujunit tamainit Nâlekamut ikomakut perᴋojamut soᴋosijuituksaujomut.

¹⁰ Arnablo Israêlitiojûb erninga, Egiptenemiomik atâtalik, anivok Israêlib ᴋitorngangita akornganut: arnablo Israêlitiojûb erninga angullo Israêlitiojok aivautivuk tangmârvingme;

¹¹ Arnablo Israêlitiojûb erningata Atek oᴋarnilutigivâ mittautigilugolo; âpâlo Mosesemut. Anânangalo ateᴋarpok Selomitemik, Dibrib paninganik, kinguvârêt Danekut ilanganik.

¹² Parngnanairsorpâlo, nalojungnaititaujomavlutik Nâlekab ᴋaninganut.

¹³ Nâlekablo Mosese oᴋarvigivâ, oᴋarlune:

¹⁴ Oᴋarnilutjijok tikiutisiuk tupersuit avatânut; ilûnatiglo tusalauktut tâpsominga patingmilitsuk niaᴋoagut, ilagêllo ilûnatik milorlitsuk ujarᴋanut.

¹⁵ Israêliblo ᴋitorngangit oᴋarvigijaksarivatit, oᴋarlutit: Oᴋarnilutjijok Gûdiminik nangmartuksauvok ajornerminik.

¹⁶ Nâlekablo atinganik mitauteᴋartok, tâmna toᴋotaksauvok; ilagêt ilûnatik miloraksarivât ujarᴋanut; takorngartaumangâllônêt takorngartaungimangâllônêt, Nâlekab atinganik mitauteᴋartok toᴋotaujuksauvok.

¹⁷ Toᴋotsijorlo inungmik, tâmna toᴋotaujuksauvok;

¹⁸ Toᴋotsijorlo nergjutemik, tâmna akkileraksarivâ, inôsek inôsermik.

¹⁹ Inûblo inôᴋatine akᴋunakpago, sôrlo pinialaurame taimâk piniarviojuksauvok;

²⁰ Killeᴋ killermik, ije ijemik, kigut kigumik, sôrlo tâpsoma inuk akᴋunarlaungmago, taimâk piniarviojuksaugivok.

²¹ Nergjutemiglo toᴋotsijok, tâmna akkileraksarivâ; toᴋotsijorlo inungmik, toᴋotaujuksaugivok.

²² Tâpsomingatsainak maligaksaᴋartuksauvose takorngartamut takorngartaungitomullo; Uvangaugama Nâlegak Gûdise.

²³ Mosesiblo Israêlib ᴋitorngangit oᴋarvigivait, imnalo oᴋarnilutjijok âpât tupersuit avatânut milorlugolo ujarᴋanut. Israêliblo ᴋitorngangit piniarput sôrlo Nâlekab Mosese perᴋongmago.