Leviticus 23 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlib ᴋitorngangit oᴋarvigikit, oᴋautilugillo: Nâlekab uvloksiorvioᴋojangit katimaviksauᴋoniartase opinartunik, tamakkoangovut uvloksiorvioᴋojamnik.

³ Uvlune sixene sanajuksauvose, uvlulle seveningat sabbateovok merngoerservik opinartoᴋsôjak, katimaviksauvok ivlernartok, sunamiglônêt suliaᴋartuksaungilase; sabbateovok Nâlekamut ilingatitak iglupsingne tamaine.

⁴ Tamakkoangovut Nâlekab uvloksiorvioᴋojangit, ilâ, katimaviksat opinartoksuit, ᴋaujijautitaksarijase naliunermingne.

⁵ Takᴋit sivorlerpângane, takᴋiub uvlungita 14ingane unnulertilugo, Nâlekab ᴋângervia naliutivok.

⁶ Takᴋiublo tâpsomatsainaub uvlungita 15inga uvloksiorviovok pubjusauteᴋangitunik ᴋakᴋôjaktorviksak Nâlekamut; uvlut sevenit nâvlugit ᴋakᴋôjaktortuksauvose pubjusauteᴋangitunik.

⁷ Uvlut tâpkoa sivorlerpângane Katimaniksaᴋartuksauvose opinartoksoarmik; oᴋumaitomik suliaᴋartailijuksauvose.

⁸ Tunergusertuksauvosele tunergutiksamik ikomakut Nâlekamut uvlut sevenit kingorlerêklutik; uvlullo seveningane opinadlartomik katimaniksaᴋartuksauvose; oᴋumaitomik suliaᴋartailijuksauvose.

⁹ Nâlekablo Mosese oᴋarvigivâ, oᴋarlune:

¹⁰ Israêlib ᴋitorngangit oᴋarvigikit, oᴋautilugillo: Tikisimagupse nunamut tunijomârtamnut ilipsingnut, katersoigupselo perutsianginik, katersortapse pijariorutit ᴋepitaumajut sivorlerpângat âtaksarivase ajoᴋertuijomut:

¹¹ Tâpsomalo ᴋepitaumajut sanervaiᴋitârtitaksarivait Nâlekab sângane, ᴋuviagijauᴋovlugit pivluse; uvlorme sabbatib ᴋaungane senervaiᴋitârtitaksarivait.

¹² Uvlormelo ᴋepitat senervaiᴋitârtitauviane, tunergusertuksauvose saugârsungmik angutimik jârelingmik atautsemik ᴋanoêtoᴋangitomik tunergutiksamik ôtaksamik Nâlekamut.

¹³ Tâmnalo ilaᴋartuksauvok tunergutiksamik nerᴋiksamik sanaugamik piojomik efab tallimaujoa maggoertorlugo akusimatilugo orᴋsumut, tunergutiksamik ikomakut Nâlekamut tipitsiariksautiksamik; tunergutiksangalo imiksak vaineojuksauvok, hinib sitamanganik.

¹⁴ Nerrijuksaungilaselo niaᴋôjarmik, sanaugaksaniglônêt jarrasimajunik, tungujortaniglônêt, uvlok tâmna tikidlugo, ᴋaitsiᴋârtinase tunergutiksamik Gûdipsingnut: perᴋojak tamanna soᴋosijuitôvok kinguvârêngnipsigut iglupsingne tamaine.

¹⁵ Sabbatiblo ᴋaunganit, uvlormit ᴋaitsivigijapsingnit ᴋepitanik tunergutiksanik sanervaiᴋitârtitaksanik, kititsijuksauvose ilipsingnut; sabbatit sevenit nâmaksijuksauvut.

¹⁶ Sabbatit seveningata ᴋaunganut kititsijuksauvose uvlunik 50nik; tunergusertuksauvoselo tunergutiksamik sanaugamik nutâmik Nâlekamut.

¹⁷ Niaᴋôjângnik sanervaiᴋitârtitaksângnik maggûngnik efab tallimaujoatut maggûktut oᴋumaitigijûngnik ᴋaitsijuksauvose iglupsingnit; sanaugatsiarmit sanajaujuksauvuk, pubjusauteᴋartilugik igajaujuksauvuk, pijariorutiovlutik Nâlekamut.

¹⁸ Niaᴋôjarlo ilagilugo tunitjijuksauvose saugârsungnik sevenenik ᴋanoêtoᴋangitunik jârelingnik atautsemik, tuktuvârarmiglo atautsemik, saugângniglo angusâlûngnik maggûngnik; tamakkoa tunergutiksauvut ôtaksat Nâlekamut, tunergutingit sanaugat imiksallo ilagilugit, tunergutit ikomakut tipitsiariksautiksat Nâlekamut.

¹⁹ Tunergusertuksauvoselo tuktungajomik angusâlormik atautsemik tunergutiksautilugo ajoᴋêrutiksamik, saugârsûngniglo angusâlûngnik maggûngnik atautsemik jârelîngnik tunergutiksautilugik ᴋujaliutiksângnik.

²⁰ Ajoᴋertuijûblo sanervaiᴋitârtitaksarivait niaᴋôjâk pijariorutik ilagilugik tunergutiksautilugit sanervaiᴋitârtitaksak Nâlekab sângane, saugârsûk ilagilugik; ivsornaituksauvut Nâlekamut ajoᴋertuijomut ilingatilugit.

²¹ Uvlormelo tâpsomane ᴋaujititsijuksauvose; opinadlartomik katimaniksaᴋartuksauvok ilipsingnut; oᴋumaitomik suliaᴋartailijuksauvose; perᴋojak tamanna soᴋosijuituksauvok iglupsingne tamaine kinguvârêngnipsigut.

²² Nunapselo perortungit kiblorupsigik perorsêvipse terreᴋungit kiblorvigimariklugit pijuksaungilase, katersijuksaungilaselo katarartunik; tâpkoa ᴋemagaksarivase aklujunut takorngartanullo; Uvangauvunga Nâlegak Gûdise.

²³ Nâlekablo Mosese oᴋarvigivâ, oᴋarlune:

²⁴ Israêlib ᴋitorngangit oᴋarvigikit, oᴋarlutit: Takᴋit seveningata uvlungita sivorlerpângane merngoerserviksiortuksauvose ivlernadlartomik, tiptulausijarvigivlugo, katimaniksakarluselo kuksasungnartomik.

²⁵ Oᴋumaitomik suliaᴋartailijuksauvose; tunergusertuksauvoselo tunergutinik ikomakut Nâlekamut.

²⁶ Nâlekablo Mosese oᴋarvigivâ, oᴋarlune:

²⁷ Takᴋille seveningata uvlungita teningane uvlok ulapirᴋsartauviksak naliutivok; opinadlartomik katimaniksaᴋartuksauvose, tarniselo manigôtititaksarivase; tunergusertuksauvoselo tunergutimik ikomakut Nâlekamut.

²⁸ Uvlormelo tâpsomane sumiglônêt suliaᴋartuksaungilase; uvlôngmat ulapirᴋsartauviksak, ulapᴋosertauᴋovluse Nâlekab Gûdipse sângane.

²⁹ Inuglo manigôtilungitok nangminerminik uvlorme tâpsomane, tâmna pêjartaujuksauvok inôᴋatiminit.

³⁰ Inuglo sunamiglônêt suliaᴋartok uvlorme tâpsomane, inuk tâmna pêjaromavara inôᴋatingita akornganit.

³¹ Sumiglônêt suliaᴋartuksaungilase: perᴋojak tamanna soᴋosijuitôvok kinguvârêngnipsigut iglupsingne tamaine.

³² Sabbateojuksauvok merngoerserviksak kuksasungnartok ilipsingnut, tarniselo manigôtititaksarivase: takᴋiub uvlungita 9ingane unnungme, unungmit unungmut sabbatesiortuksauvose.

³³ Nâlekablo Mosese oᴋarvigivâ, oᴋarlune:

³⁴ Israêlib ᴋitorngangit oᴋarvigikit, oᴋarlutit: Takᴋit seveningata uvlungita 15ingane uvloksiorvik tupeᴋarvingmik akkerᴋunik milukatalingnik naliutivok uvlut sevenit tuglerêklutik Nâlekamut.

³⁵ Uvlut sivorlerpângane katimaniksaᴋartuksauvose ivlernadlartomik; oᴋumaitomik suliaᴋartailijuksauvose.

³⁶ Uvlut sevenit nâvlugit tunergusertuksauvose tunergutimik Nâlekamut; uvlut 8ingane katimaniksaᴋartuksauvose ivlernadlartomik ilipsingnut; tunergusertuksauvoselo tunergutimik ikomakut Nâlekamut; katimaniksauvok sorairutiksak; oᴋumaitomik suliaᴋartailijuksauvose.

³⁷ Tamakkoangovut Nâlekab uvloksiorvioᴋojangit, katimaviksauᴋojaksarijase ivlernadlartunik, tunerguserᴋovluse tunergutinik ikomakut Nâlekamut, tunergutimik ôtaksamik, tunergutimiglo nerᴋiksamik, tunergutimiglo toᴋotaksamik, tunergutimiglo imiksamik, atunit nelleᴋârdlutik uvlungata naliuningane;

³⁸ Nâlekab sabbateᴋotingit, tunergutiselo, angerutigijaselo tamaita, tunergutiselo opigosutiksat pijariutigijase tunivaktase Nâlekamut, tapilugit.

³⁹ Taimâktauk takᴋit seveningata uvlungita 15ingane, ᴋematuliutjijarêrupse nunab perutsianginik, Nâlekab uvloksiorvioᴋojanga uvloksioraksarivase uvlunik sevenenik; uvlut tâpkoa sivorlerpângat merngoerserviksaudlarpok kuksasungnartok, uvlullo tâpkoa 8ingat merngoerserviksaudlarpok kuksasungnartok.

⁴⁰ Uvlullo sivorlerpângane tigusijuksauvose napârtutsiat paunganginik, napârtullo palmit akkerunginik, napârtullo tungujortanik milukatalit akkerunginik, ukpiganiglo kôb sanianit, serrijuksauvoselo Nâlekab Gûdipse sângane uvlunik sevenenik.

⁴¹ Uvloksiorvigijaksarivaselo Nâlekamut uvlut sevenit nâvlugit jârine tamaine; perᴋojauvok soraijuituksak kinguvârêngnipsigut; takᴋit seveningane uvloksioraksarivase.

⁴² Uvlut sevenit nâvlugit akkerᴋulingnik milukatalingnik igloᴋartuksauvose; Israêlib nunangane inûlertut ilûnatik akkerᴋulingnik igloᴋartuksauvut;

⁴³ Kinguvâse ᴋaujiᴋovlugit Israêlib ᴋitorngangit igloᴋartilaurapkit akkerᴋulingnik tikiutilaurapkit nunamit Egiptenemit; Uvangauvunga Nâlegak Gûdise.

⁴⁴ Mosesiblo Israêlib ᴋitorngangit ᴋaujitipait Nâlekab uvloksiorvioᴋojanginik.