Leviticus 21 - Labrador Inuttitut Heritage Bible

¹ Nâlekablo Mosese oᴋautivâ: Ajoᴋertuijut Aronib erningit oᴋarvigikit, oᴋautilugillo: Ivsornartitoᴋarniarane nangminerminik toᴋungajut inôᴋatime akorngane pivlugit;

² Kisiane ilane ᴋanigijane pivlugit anânane, atâtanalo, erninalo, paninalo, angajunalo, nukanalo;

³ Najanalo uigasuk ilaluatsiarijane, uiᴋalaungitok, tâpkoa pivlugit ivsornartitsungnarpok nangminerminik.

⁴ Ivsornartituksaungilak nangminerminik, erᴋarnartôgame inôᴋatime akorngane, naggonartiᴋonago nangminerminik.

⁵ Niaᴋomingne nujairsimajoᴋartuksaungilat, umingmiglo isungit kipjaraksaringilait, kilertuksaungilallo uviningmingnik.

⁶ Ivsornaituksauvut Gûdimingnut, Gûdimiglo atinga naggonartitaililugo; tunergusermatta tunijaumajunik Nâlekamut ikomakut, Gûdimik nerᴋinganik; tamanna pivlugo ivsornaituksauvut.

⁷ Nulianiktuksaungilat arnamik anguniarpaktomik ilusitsiariktôngitomiglônêt; arnamiglônêt avitaumajomik uiminit nulianiktuksaungilat; ivsornaidlarmatta Gûdimingnut.

⁸ Taimaimat ivsornaititaksarivat, Gûdivit nerᴋinga tunergutigingmago; ivsornaitokutigijaksarivat; Uvanga Nâlegaujunga ivsornaititise ivsornaidlarama.

⁹ Ajoᴋertuijullo naliata paningata, naggonartigune nangminerminik anguniarnermut, atâtane naggonartigivâ; ikomamut ôtaujuksauvok.

¹⁰ Ajoᴋertuijersoangojublo ᴋatangutime akorngane, niaᴋokut koverijaulauktûb orᴋsumik mingoarutiksamik, ingmikôrtartitaujûblo annorâlijarᴋovlugo (ajoᴋertuijoksûb) annorânginik, tâpsoma niaᴋome nujangit palangatigijaksaringilait, annorânelônêt aliktoraksaringilait.

¹¹ Toᴋungajûblo timinganut itertuksaungilak, atâtanelônêt anânanelônêt pivlugo ivsornartituksaungilak nangminerminik;

¹² Anijuksaungilarlo ivsornaitovingmit, Gûdimelo ivsornaitoviᴋotinga naggonartitaksaringilâ; orᴋsumut mingoarutimut ingmigolingatitaungmat Gûdiminut; Uvangaugama Nâlegak.

¹³ Nulianiktuksauvok uigasungmik angutimik ᴋaujilauksimangitomik.

¹⁴ Uigarnermik, avitaumajomiglônêt uiminit, arnarmiglônêt iluseluktomik, anguniarpaktomiglônêt nulianiktuksaungilak; uigasungmigle (angutimik ᴋaujilauksimangitomik) inôᴋatime akornganit nulianiktuksauvok.

¹⁵ Naggonartitsijuksaungilarlo kinguvângminik inôᴋatime akorngane; Uvangaugama Nâlegak ivsornaititsijok tâpsominga.

¹⁶ Nâlekablo Mosese oᴋarvigivâ, oᴋarlune:

¹⁷ Arone oᴋarvigiuk, oᴋarlutit: Kinguvâksavit naliat kinguvârêngningine ᴋanoetoᴋarpat, tâmna najorniktuksaungilak Gûdime nerᴋiksanga tunergutigijomavlugo.

¹⁸ Kinaugaloarune ᴋanoetoᴋarune najorniktuksaungilak; tautungitok, tusiaktorlônêt, ᴋingaᴋartorlônêt sêksimajomik, ilutseluktorlônêt,

¹⁹ Itigaᴋartorlônêt aggaᴋartorlônêt ilakungortomik,

²⁰ Pikingajorlônêt, erᴋilarlônêt, nakkungajorlônêt, kalaktorlônêt, uttoviluktorlônêt, ijuluktorlônêt;

²¹ Kinalônêt Aronib ajoᴋertuijoksûb kinguvânginit ᴋanoetoᴋartok najorniktuksaungilak tunerguseromavlune tunergutinik Nâlekamut ikomakut; ᴋanoetoᴋarpok; najorniktuksaungilak Gûdime nerᴋinga tunergutigijomavlugo.

²² Nerrijuksauvok Gûdime nerᴋiksanganik, tamarmik ivsornainerpaujomiglo ivsornaitomiglo.

²³ Itertuksaungilarle upkôb ungatânut, tunerguserviublônêt najugânut pijuksaungilak, ᴋanoetoᴋarame; naggonartitsiᴋonago ivsornaitoviᴋotimnik; Uvangaugama Nâlegak ivsornaititsijok tâpkoninga.

²⁴ Taimaimallo Mosesib Aronalo erningillo Israêlikullo ilûnaita oᴋarvigivait.