Leviticus 19 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlib ᴋitorngangita ilagêktoksôningit tamaita oᴋarvigikit, oᴋautilugillo: Ivsornaituksauvose, Uvanga Nâlegaujunga Gûdise ivsornainama.

³ Ilûnase atunit ilerasuktuksauvose anânapsingnik atâtapsingniglo, sabbateᴋotikkalo ivlerilugit; Uvanga Nâlegauvunga Gûdise.

⁴ Sâniarase inungoarnut, auktisimajuniglo Gûdingoaliorniarase pivluse; Uvanga Nâlegauvunga Gûdise.

⁵ Tunerguseromagupselo tunergutiksamik ᴋujaliutiksamik Nâlekamut tunijaksarivase nâmagijauᴋovluse.

⁶ Nerrijaujuksauvok uvlorme tunergusertauvingane ᴋaunganalo; amiakoᴋarpallo uvluk pingajuak tikidlugo, ôtitaujuksauvok ikomamut.

⁷ Nerrijokarpallo tâpsomangat uvluk pingajuangne, maᴋojungnarpok; idluarijauniangilak;

⁸ Ilûnatigle nerrijut tagvangat nangmarniarput idluinermingnik, Nâlekab ivlernartoᴋotinga ivsornartingmago; inuglo tâmna avitaujuksauvok inôᴋatiminit.

⁹ Kibluigupselo nunapse perutsianginik, kibluijuksaungilatit perorsêviub kiglinganumarik, katersijuksaungilatillo kibluijut katarartanginik.

¹⁰ Nungutsimariktuksaungilatillo vaineliksakotivit paunganginik, katersijuksaungilatillo vaineliksakotivit paunganginik kataksimajunik; ᴋemagaksarivatille piksauᴋovlugit aklujunut tujormijanullo; Uvanga Nâlegauvunga Gûdise.

¹¹ Tigliktuksaungilase; nalangaitomiglo piniartuksaungilase, saglôtijuksaunaselo.

¹² Saglovluselo attera taivlugo angermariktuksaungilase, Gûdipse atinga naggonartilugo; Uvanga Nâlegauvunga.

¹³ Inôᴋatit oᴋumaiksartitaksaringilat, aᴋsârnagolônêt; ikajortûblo akkiliutiksanga ilingnêtuksaungilak unnuak nâvlugo uvlâk tikidlugo.

¹⁴ Tusângitok oᴋarnerlutijaksaringilat, aporviksamiglo ilijijuksaungilatit tautungitûb sânganut, Gûdîlle koksasugvigijaksarivat; Uvanga Nâlegauvunga.

¹⁵ Idluarsainerme idluitulijuksaungilatit; aklujûb kinauninga naggogijaksaringilat, pitsartujûblo kinauninga opiginago; idluarnermele inôᴋatit idluarsaraksarivat.

¹⁶ Arvertartuksaungilatit mangatsilutit inôᴋativit akorngane; nangertuksaungilatillônêt inôᴋativit aunga kigligiutjilukautigilugo; Uvanga Nâlegauvunga.

¹⁷ ᴋatangutit ômigijaksaringilat ômatingne; inôᴋatit inerteraksarigaloarpat, nangmartuksaungilatille ajornermik tâmna pitjutigilugo.

¹⁸ Inôᴋativit ᴋitornganga akkiniarvigijaksaringilat ilulugviginagolônêt, inôᴋatille nagligijaksarivat iliktut; Uvanga Nâlegauvunga.

¹⁹ Perᴋojakka maligaksarivase. Nergjuteᴋotit nuliortitaksarilungilat ômajomut adsigilungitanganut; perorsêvit karngasorvigijaksaringilat karngasutinik adsigêngitunik; annorâlijartuksaungilatillo annorâksajângnik maggûngnut adsigêngitûngnut sanamajomik.

²⁰ Angutiblo arnak kivgaujok, angerutaujok uiksamut, satôrtaungitorlo, ᴋelarudjârtaungitorlo kivgaunermit, tutikpago uvineᴋatigêngnermut, pidlartaujuksauvok; toᴋotaujuksaungilak arnak kivgaujungnaititaungimat.

²¹ Tunergutiksanalo pasijaungijutiksak ᴋaitaksarivâ Nâlekamut, ilagêktut tupingata upkoanganut, tagva saugak angusâlok tunergutiksak pasijaungijutiksak.

²² Angusâlok tunergutiksarilugo pasijaungijutiksamik ajoᴋertuijûb ulapᴋoseraksarivâ Nâlekab sângane idluininga idluitulinerijanga pitjutigilugo; isumagijungnaivioniarporlo idluitulinerijanganit.

²³ Tikisimagupselo nunamut, ilijivluselo napârtunik sunatuinarnik paungaᴋarpaktunik nerrijausônik, paungangit isumagijaksarivase kipimanginingititut; jârit pingasut nâvlugit kipimangitutitut ilingajuksauvut ilipsingnut; nerrijaujuksaungilat.

²⁴ Jârille sitamangane paungangit ilûnatik ivsornaituksauvut, ᴋujaliutiksautitauvlutik Nâlekamut.

²⁵ Jârillo tallimangane paungangit nerᴋiksarilârpase, sakᴋertangit ilipsingnut ilingalârput; Uvanga Nâlegauvunga Gûdise.

²⁶ Aulingmik sumiglônêt nerrijuksaungilase; angakoktortuksaungilaselo, nalautainerluktuksaunaselo.

²⁷ Niaᴋupse nujangit angmaloᴋitautilugit salijaksaringilase, umipselo terreᴋungit sujugaksaringilase.

²⁸ Kilertuksaungilase uvinipsingnik toᴋungajut pivlugit, tumneliortuksaunaselo ilipsingne; Uvanga Nâlegauvunga.

²⁹ Panît ivsornartiniarnago anguniarpaktungortilugo; nunamiut sittorᴋonagit assiniarnermut, nunalo nâmaᴋonago maᴋojungnartulinermik.

³⁰ Sabbateᴋotikka ivlerijaksarivase, ivsornaitoviᴋotigalo kuksasugvigilugo; Uvanga Nâlegauvunga.

³¹ Sanguniarase torngaᴋuteᴋartunut angakonullônêt; ᴋenerniarase taimaitunik sujuktaudlalârapse tâpkonunga; Uvanga Nâlegauvunga Gûdise.

³² Nikovilerit ᴋêrtojûb sângane, ittôjûblo kênanga opigiuk, Gûdîllo koksasugvigiuk; Uvanga Nâlegauvunga.

³³ Takorngartarlo nunaᴋarpat nunapsingne idluitulivigijaksaringilase.

³⁴ Takorngartak nunaᴋartok akunapsingne ilingavigijaksarivase nuname inûlertotut, iliktullo nagligijaksarivat; ilipse takorngartaulaurapse nuname Egipteneme; Uvanga Nâlegauvunga Gûdise.

³⁵ Idluitulijuksaungilase ôktortiluse takinermik, oᴋumainermiglônêt, ilutonermiglônêt.

³⁶ Kiktitautinik nalautsijunik, oᴋumailutanik nalautsijunik, ôktûtimik efamik nalautsijomik, ôktûtimiglo hinemik nalautsijomik, pitaᴋartuksauvose; Uvanga Nâlegauvunga Gûdise; tikiutjilauktoᴋ ilipsingnik nunamit Egiptenemit.

³⁷ Perᴋojakkalo ilûnaita, ilusioᴋojakkalo ilûnaita kamagijaksarivase piniarlugillo; Uvanga Nâlegauvunga.