Leviticus 18 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Israêlib ᴋitorngangit oᴋarvigikit, oᴋautilugit: Uvanga Nâlegauvunga Gûdigijase.

³ Nunab Egiptenib nunagilauktapse inungita piniarningit maliklugit piniartuksaungilase; nunablo Kanaanib, tikiutjivigijomajama ilipsingnik, inungita piniarningit maliklugit piniartuksaungilase; tâpkoalo ilusioᴋojangine arvertartuksaungilase.

⁴ Perᴋojakka maligaksarivase, ilusioᴋojakkalo iluserijaksarivase, arvertarvigivlugit; Uvanga Nâlegaugama Gûdigijase.

⁵ Tamanna pivlugo ilusioᴋojakka perᴋojakkalo maligaksarivase; inûblo tamakkoninga piniartûb inôgutiginiarpait; Uvanga Nâlegauvunga.

⁶ Nalise timime ilagijanganut pijuksaungilak ussinganinga mattoêromavlugo; Uvanga Nâlegauvunga.

⁷ Atâtavit kangunarninga, anânavillônêt kangunarninga matoêraksaringilat; tâmna anânagivat; kangunarninga matoêraksaringilat.

⁸ Atâtavit nuliangata kangunarninga matoêraksaringilat; tamanna atâtavit kangunarnerivâ.

⁹ Najarpit, atâtavit paningata, anânavillônêt paningata, angerarme angerarme-ungitorlônêt inûlertûb, kangunarninga matoêraksaringilat; ilâ, tâpkoa kangunarningit matoêraksaringilatit.

¹⁰ Ernivit paningata, panivillônêt paningata, kangunarninga matoêraksaringilat; tâpkoa kangunarningit igvit kangunarnerigangne.

¹¹ Atâtavit nuliangata paningata, atâtarnut ilingajûb, kangunarninga matoêraksaringilat, najagigangne.

¹² Atâtavit najangata kangunarninga matoêraksaringilat; atâtavit auᴋatigingmago.

¹³ Anânavit angajoata nukangatalônêt kangunarninga matoêraksaringilat; anânavit auᴋatigingmago.

¹⁴ Atâtavit angajoata nukangatalônêt kangunarninga matoêraksaringilat, tâpsoma nulianganut pijuksaungilatit; tâmna adsagigangne.

¹⁵ Ukoavit kangunarninga matoêraksaringilat, tâmna ernivit nuliaringmago; tâpsoma kangunarninga matoêraksaringilat.

¹⁶ Angajovit nukavillônêt nuliangata kangunarninga matoêraksaringilat; angajovit nukavillônêt kangunarneringmago.

¹⁷ Arnablo paningatalo kangunarnîgik matoêraksaringilakik; tâpsoma erningata paninga, paningatalônêt paninga tigujaksaringilat kangunarninga matoêromavlugo; ᴋanitomaringmik auᴋationgmatta; tamanna maᴋojungnartoksôvok.

¹⁸ Nuliavillo najanga tigujaksaringilat saniligijomavlugo, kangunarninga matoêromavlugo, nuliat inôtilugo.

¹⁹ Arnaliartuksaungilatillo kangunarninga matoêromavlugo aungmik naliuneᴋarningane.

²⁰ Inôᴋativillo nulianga tutiktaksaringilat uvineᴋatigijomavlugo, ivsornartiniarlutit nangminernik tâpsomunga.

²¹ Tunitjijuksaungilatillo kinguvâkpit ilanganik ikomakôrtitauᴋovlugo Môlekemut, Gûdivit attinga naggonartiniarlugo; Uvanga Nâlegauvunga.

²² Angutimik tutingniktuksaungilatit sôrlo arnarmik; tamanna maᴋojungnarpok.

²³ Omajomiglo uvineᴋateᴋartuksaungilatit ivsornartiniarlutit tâpsomunga; arnarlo nangertuksaungilak ômajub sângane uvineᴋatigijomavlugo; tamanna maᴋojungnartoᴋsôdlarpok.

²⁴ Tamakkoa nalianelônêt ivsornartiniarase ilipsingnik; tamakkonane tamaine inôᴋatigêksuit, ungolartoromajakka sivunarsingnit, ivsornartitaungmatta;

²⁵ Nunalo ivsornartitauvok; taimaimallo idluitoksôningit akkiniarutigijomavakka tâpsomunga; nunablo inuᴋotine merriarpait.

²⁶ Tamanna pivlugo ilipse ilusioᴋojakka perᴋojakkalo piniaraksarivase, maᴋojungnartullo tamakkoa naliat piniaraksaringilase; ilipse nunaliojose; ilagingitaselônêt akunapsingne nunaᴋartut.

²⁷ Maᴋojungnartut tamakkoa tamaita inuit nunamiongolauktut sivunapsingne pinialaungmagit, nunalo ivsornartitauvok;

²⁸ Nuna merriarᴋonago ilipsingniktauk, ivsornartikupsiuk, sôrlo inôᴋatigêksuit sivunapsingnêtut merriarlaungmagit.

²⁹ Maᴋojungnartut tamakkoa nalianik piniartut, ilâ, tarnit piniartut tamakkoninga avitaujuksauvut inôᴋatimik akornganit.

³⁰ Tamanna pivlugo perᴋojakka nâlegaksarivase, piniarᴋonase ilusit maᴋojungnartut makkoa nelianiglônêt, piniarutaulauktut sivunipsingne, ivsornartiᴋonaselo ilipsingnik tamakkonunga; Uvanga Nâlegauvunga Gûdise.