Leviticus 17 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Aron, erningillo, Israêliblo ᴋitorngangit ilûnaita oᴋarvigikit, oᴋautilugillo: Tamadja Nâlekab perᴋojanga, oᴋarlune:

³ Angutit naliat Israêlib ᴋitornganginit toᴋotsijok tuktuvangmik saugârsungmiglônêt tuktungajomiglônêt tupersuit akorngane, toᴋotsijorlônêt tâpsominga tupersuit avatâne,

⁴ ᴋaiᴋârnagolo ilagêktut tupingata upkoangata sânganut, tujutigijomavlugo Nâlekamut Nâlekab tupingata sângane; auk ilingatitauniarpok angutimut tâpsomunga; kovisilaukpok aungmik; angullo tâmna avitaujuksauvok inôᴋatime akornganit;

⁵ Israêlib ᴋitorngangit ᴋaitsiᴋovlugit tunergutiksamingnik, tunergutigijamingnik mânetuinak silame, Nâlekamut, ilagêktut tupingata upkoanganut, ajoᴋertuijomut, tunergutigilugillo tunergutiksautilugit ᴋujaliutiksamik Nâlekamut.

⁶ Ajoᴋertuijûblo auk serᴋerautigijaksarivâ Nâlekab tunerguservinganut ilagêktut tupingata upkoangata sângane, tunnualo ôtitaksarivâ tipitsiariksautiksak Nâlekamut.

⁷ Tunergutiksatik tunijaksaringilait mânamit Satanasingoarnut ajortuligosugvigijamingnut. Perᴋojak tamanna soᴋosijuituksauvok tâpkonunga kinguvânginullo.

⁸ Oᴋautijaksarivatillo, inuit naliat Israêlib ᴋitornganginit, ilagingitapselônêt akunapsingnêtut naliat tunitjijok tunergutiksamik ôtaksamik toᴋotaksamiglônêt,

⁹ ᴋaiᴋârnago ilagêktut tupingata upkoanganut tunergutigijomavlugo Nâlekamut; angut tâmna avitaujuksauvok inôᴋatime akornganit.

¹⁰ Inuillo naliat Israêlib ᴋitornganginit, ilagingitapselônêt akunapsingnêtut naliat auktortok; kênara sâtitsomavara tarnelingmut tâpsomunga auktortomut, avigomavaralo inôᴋatime akornganit.

¹¹ Timib inôsinga aungmêngmat, tunivaralo ilipsingnut tunerguservingme ulapᴋutiksauᴋovlugo tarnipsingnut; inôsek pitjutigivlugo naliat auktortuksaungilak.

¹² Tamanna pivlugo Israêlib kitorngangit oᴋautivakka: Inôᴋatipse nalliallônêt auktortuksaungilak, ilagingitapselônêt akunapsingnêtut nalliat auktortuksaungilak.

¹³ Inuillo naliat Israêlib ᴋitornganginit, ilagingitapselônêt akunapsingnêtut naliat, nergjutimiglônêt tingmiarmiglônêt nerrijausômik pigune ômajoᴋsiornerme; tâpsoma aunga pêjaraksarivâ saulugolo siorᴋanut.

¹⁴ Uvinilit ilûnatik inôsingat pitjutigivlugo, tâpsoma aungata tâpsoma inôsinga adsigivâ; tamanna pivlugo Israêlib ᴋitorngangit oᴋautivakka: Uviniliub sunablônêt aunga nerrijaksaringilase; uvinilit ilûnatik inôsingat aunginêngmat; nerrijok taimaitomik avitaujuksauvok.

¹⁵ Ilûnatiglo nerrijut ingminik toᴋojomik, aliktortaumajomiglônêt ômajomut, ilagijaselônêt ilagingitaselônêt, annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo; tungânalo sujungainiarpok.

¹⁶ Annorânele ergortulungipagit, ubvalungipallo nangminerminik, nangmalârpok idluinerminik.