Leviticus 16 - Labrador Inuttitut Heritage Bible

¹ Nâlekablo Mosese oᴋarvigivâ, Aronib ernîkita toᴋôkita kingorngane, Nâlekab sânganôrmanik, toᴋolutiglo.

² Nâlekablo Mosese oᴋautivâ: Aron angajuit oᴋautiuk naliunerne sunatuinarne itertuksaungimat ivsornaitovingmut; upkôb ungatânut, iksivaviub saimarvigijauviub iklerviub kigligiutjinektaliub ᴋânganêtûb sânganut, toᴋoᴋonago; uvanga sakᴋeromagama nuvujarme iksivavingme saimarvigijauvingme.

³ Imaitulijarlune Aron itertuksauvok ivsornaitovingmut: tuktuvârarmik tunergutiksamik ajoᴋêrutiksamik, saugarmiglo angusâlormik tunergutiksamik ôtaksamik.

⁴ Atijaksarivâ ullik ᴋablunâktajatsiak ivsornaitok, ᴋarlillo ᴋablunâktajatsiak uviningmine, tapserutelijartuksauvorlo tapserutemik ᴋablunâktajatsiarmik, nessarlugalijartuksauvorlo; tâpkoangovut annorât ivsornaitut; ubvartuksauvorlo uviningminik imermut, atilugillo.

⁵ Tigusijuksauvorlo ilagênit Israêlib ᴋitornganginit tuktungajûngnik angusâlûngnik maggûngnik tunergutiksamik ajoᴋêrutiksamik, saugarmiglo angusâlormik tunergutiksamik ôtaksamik.

⁶ Aroniblo tuktuvârak tunergutiksak ajoᴋêrutiksak nangminine pivlugo tunijaksarivâ, ulapᴋosêjutigilugolo nangminine iglomioᴋatinalo pivlugit.

⁷ Tuktungajûglo tamarmik tigujaksarivak âlugiglo Nâlekab sânganut ilagêktut tupingata upkoangane.

⁸ Imerautigijaksarivaglo; aipâ Nâlekamut ilingatilugo, aipangalo Azazelemut ilingatilugo (ᴋenugijaksautilugo).

⁹ Aroniblo tuktungajok imerautimut Nâlekamut ilingatitaujok tigujaksarivâ tunergutigilugolo tunergutiksamik ajoᴋêrutiksamik.

¹⁰ Tuktungajorle Azazelemut ilingatitaujok imerautimut, ômavlune Nâlekab sânganôrtitaujuksauvok, ulapᴋoseraksarilugo, aulartilugolo Azazelemut sunaᴋajuitomut.

¹¹ Aroniblo tuktuvârak tunergutiksak ajoᴋêrutiksak, nangminine pivlugo pijok, ulapᴋosêlunalo nangminerminik iglomioᴋatiminiglo, tuktuvâraᴋ, nangminine pivlugo pijok, toᴋotaksarivâ;

¹² Tigusijuksauvorlo pujôrtitsivingmik aumanik tatatomik tunerguservingmit Nâlekab sângane, agganalo tatalugit isserluanerutiksanik mamaktunik serᴋalisimajunik, âlugillo upkôb iluanut;

¹³ Isserluanerutiksallo pititaksarivait ikomamut Nâlekab sângane, isserluanerutiksat issingat uliᴋovlugo iksivavingmik saimarvigijauvingmik kigligiutjineᴋtaliub ᴋânganêtomik, toᴋoᴋonago;

¹⁴ Tuktuvâraublo aungata ilanga tigujaksarivâ tikerminullo serparsautigilugo iksivaviub saimarvigijauviub sânganut ununga sangmijomut; saimarvigijauviublo sângane auk serparsautigijaksarivâ tikerminut sevenertorlune.

¹⁵ Tungânalo tuktungajok tunergutiksak ajoᴋêrutiksak inôᴋatigêksuit pivlugit toᴋotaksarivâ, aungalo upkôb iluanut âlugo, aungalo piniarutigijaksarivâ sôrlo tuktuvâraub aunga piniarutigilaungmago, serparsautigilugolo iksivavingmut saimarvigijauvingmut sânganullo;

¹⁶ Ivsornaitoviglo pivlugo ulapᴋosêjuksauvok, Israêlib ᴋitorngangita ivsornarningit pivlugit, tappatojoksôningillo pivlugit, ilâ, ajorningit ilûnaita pivlugit; taimailiortuksauvorlo ilagêktut tupingat, tâpkonanêtok ivsornartoksôningita akorngane, pivlugo.

¹⁷ Inuᴋartuksaungilarlo ilagêktut tupingane, tâmna iterpat ulapᴋosêjomavlune ivsornaitovingme, aniᴋârtinago, ulapᴋosêjarêrlune nangminine pivlugo, iglomioᴋatinalo pivlugit, Israêlib ilagêktoksôningit pivlugit.

¹⁸ Anijuksauvorlo tunerguservingmut Nâlekab sânganêtomut ulapᴋoserlugolo; tigusijuksauvorlo tuktuvâraub aungata ilanganik, tuktungajûblo aungata ilanganik, pitilugolo tunerguserviub nakjunginut avatânêtunut.

¹⁹ Aublo ilanganut serparsaraksarivâ tikkerminut sevenertorlune, sujungaitilugolo ivsornaitilugolo Israêlib ᴋitorngangita ivsornarninginit.

²⁰ Ulapᴋosêjarêrpallo ivsornaitovik pivlugo, ilagêktullo tupingat pivlugo, tunerguserviglo pivlugo, tuktungajok ômajok tigujaksarivâ;

²¹ Aroniblo aggane iglotut ilijaksarivait tuktungajûb ômajûb niaᴋoanut, tâpsomalo ᴋângane kigligiutjijuksauvok Israêlib ᴋitorngangita idluininginik tamainik, tappatoninginiglo tamainik, ila, ajorninginik tamainik; ilijaksarivaillo tuktungajûb niaᴋoanut, tâmnalo aularutijaksarivâ angutib tamattomunga ilingatitaujûb aggangitigut sunaᴋajuitomut;

²² Tuktungajûblo nangminermine nangmaraksarivait tâpkoa idluitulininginik tamainik; tuktungajorlo aulartitaksarivâ sunaᴋajuitome.

²³ Aronalo itertuksauvok ilagêktut tupinganut, annorânalo ivaloksajat, atilauktangit iterame ivsornaitovingmut, pêraksarivait ᴋemaklugillo tagvunga;

²⁴ Uvininalo ubvaraksarivâ imermut ivsornaitovingme, annorânalo atilugit, anilunalo, tunergutiksanalo ôtaksak, inôᴋatigêksuillo tunergutiksangat ôtaksak tunergutigilugik, nangmininalo inôᴋatigêksuillo ulapᴋoserlugit.

²⁵ Tunergutiksablo ajoᴋêrutiksab tunnua ôtitaksarivâ tunerguservingme.

²⁶ Ipsomalo aularutjijûb tuktungajomik Azazelemut annorâne ergortoraksarivait, uvininalo ubvarlugo imermut, taimailiorᴋârdlunalo tangmartervingmut aijungnarpok.

²⁷ Tuktuvârarlo tunergutiksak ajoᴋêrutiksak, tuktungajorlo tunergutiksak ajoᴋêrutiksak, tâpkoa aungat itertitaulauktok ulapᴋosêjutigilugo ivsornaitovingme, âtaujuksauvok tupersuit avatânut; ôtitaksarivaillo ikomamut amîgik nerᴋîgiglo anangillo.

²⁸ Otitsijûblo tâpkoninga annorâne ergortoraksarivait, uvininalo ubvarlugo imermut, taimailiorᴋârdlunalo aijungnarpok tangmartervingmut.

²⁹ Tamadjalo iluserijaksarivase soᴋosijuitomik, takᴋit seveningita uvlungita teningane tarnise nikanarsartitaksarivase suliaᴋartaililuselo sunamiglônêt, mânemiorlônêt tujormijarlônêt akunapsingnêtok;

³⁰ Uvlorme tâpsomane ulapᴋosertauniarapse sujungaititauᴋovluse; ajornipsingnit tamainit sujungaititaujuksaugapse Nâlekab sângane.

³¹ Sabbateovok merngoerserviksak erᴋarnadlartok ilipsingnut, tarniselo nikanarsartitaksarivase; perᴋojak tamanna soᴋosijuituksauvok.

³² Ajoᴋertuijorlo, mingoartaujok ilijaujorlo ajoᴋertuijingorᴋovlugo atâtane inangerlugo, ulapᴋosêjuksauvok, annorâllo ivaloksajat, ila, annorât ivsornaitut atijaksarivait;

³³ Tâmnalo ulapᴋosêjuksauvok ivsornaidlartovik pitjutigilugo, ulapᴋosêjuksauvorlo ilagêktut tupingat pivlugo, tunerguserviglo pivlugo, ulapᴋosêjuksauvorlo ajoᴋertuijut pivlugit ilagêktoᴋsuillo inungit ilûnaita pivlugit.

³⁴ Tamannalo ilusiojuksauvok soᴋosijuitok ilipsingnut, ulapᴋosêᴋovluse Israêlib ᴋitorngangit pivlugit atausiarluse jâreme ajorningit tamaita pitjutigilugit. Taimailiortoᴋarporlo sôrlo Nâlekab Mosese perᴋolaungmago.