Leviticus 15 - Labrador Inuttitut Heritage Bible

¹ Nâlekablo Mosese Aronalo oᴋarvigivâk, oᴋarlune:

² Israêlib ᴋitorngangit oᴋarvigitikik, oᴋautilugillo: Angutit naliat ipteâluᴋarpat korliartomik uviningminut, ivsornarpok korliartok pivlugo.

³ Tamakkoangovuk tagva ivsornautigijâgik korliartoᴋarnerminut; uvininganit korliarmangâllônêt, uviningalônêt nukkeᴋarungnaipat; ivsornautigivâ.

⁴ Iglit ilûnatik korliartoᴋartûb inangavigijangit ivsornarput; ilûnatiglo iksivavigijangit ivsornarput.

⁵ Aktoajûblo tâpsoma iglinganik annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

⁶ Iksivajûblo korliartoᴋartûb iksivavigilauktangane annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

⁷ Aktoajûblo korliartoᴋartûb uvininganik annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

⁸ Korliartoᴋartûblo sujungaitok ᴋesserpago, tâpsoma annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

⁹ Iksivaviglo korliartoᴋartûb ikimavigijanga ivsornarniarpok.

¹⁰ Aktoajorlo tâpsoma allerarilauktanganik ivsornarniarpok unnuk tikidlugo; akjarsijorlo tâpkoninga annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

¹¹ Korliartoᴋartûblo, aggane ubvarᴋârnagit imermut, aktortanga, tâpsoma annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

¹² Maggarlo, korliartoᴋartûb aktortanga, serᴋomitaujuksauvok; porlo ᴋejuk ergortortaujuksauvok imermut.

¹³ Korliartoᴋartorlo âᴋikpat korliarutigijaminit, kititsijuksauvok uvlunik sevenenik sujungaititaunerminut, annorânalo ergortoraksarivait; uvininalo ubvaraksarivâ imermut ômanartomut, sujungainiarlunalo.

¹⁴ Uvlullo 8ingane tigusijuksauvok aᴋigeojârtûngnik mikijûngnik maggûngnik, aᴋigearaujârtûngniglônêt maggûngnik, ᴋailunalo Nâlekab sânganut ilagêktut tupingata upkoanganut, tunilugiglo ajoᴋertuijomut;

¹⁵ Ajoᴋertuijûblo tunergutigijaksarivâk, aipâ tunergutiksautilugo ajoᴋêrutiksamik, aipangalo tunergutiksautilugo ôtaksamik; ajoᴋertuijûblo ulapᴋoseraksarivâ Nâlekab sângane korliartoᴋarninga pivlugo.

¹⁶ Angutiblo kenakoa pêjarpat tâpsomangat, angutib uvinine ilûnât ubvaraksarivâ imermut, ivsornarniarlunalo unnuk tikidlugo.

¹⁷ Annorâllo ilûnatik ᴋissillo ilûnatik kenakolit ergortortaujuksauvut imermut, ivsornarniarlutiglo unnuk tikidlugo.

¹⁸ Arnarlo, angutib tutiktanga, ipaktaukpat tâpsoma kenakoanut, tamarmik ubvartuksauvuk imermut, ivsornarniarlutiglo unnuk tikidlugo.

¹⁹ Arnarlo pêjaiviksiorpat, aungmiglo pêjaikpat, uvlunik sevenenik ingmigolingajuksauvok; aktoajorlo tâpsominga ivsornarniarpok unnuk tikidlugo.

²⁰ Inangavigijangillo ilûnatik nalliuneᴋsiortilugo ivsornarniarput; iksivavigijangillo ilûnatik ivsornarniarput.

²¹ Aktoajûblo iglinganik annorâne ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

²² Aktoajûblo iksivavigijangita nalianik annorâne ergortoraksarivait, ubvarlunalo nangminerminik, imermut, ivsornarniarlunalo unnuk tikidlugo.

²³ Aktortaujorlo iglinganêkpat iksivavigijanganêkpallônêt aktoatilugo tâpsominga, ivsornarniarpok unnuk tikidlugo.

²⁴ Angutiblo tutikpago, ivsornautigijangalo tâpsomanêkpat, angut ivsornartuksauvok uvlunik sevenenik; iglerlo tutivigijangak ivsornarniarpok.

²⁵ Arnarle pêjaikpat aungmik uvlunik unuktunik naliunerivaktangane, pêjaikpallônêt akuninersamik naliuningata sorairviksanganit, pêjaivingata uvlungit nâvlugit ilinganiarpok sôrlo naliunerivaktangata uvlungine; ivsornarpok.

²⁶ Iglit ilûnatik inangavigijangit uvlut pêjaivigijangit nâvlugit ilinganiarput sôrlo igligijanga naliuneᴋsiortilugo; iksivavigijangillo ilûnatik ivsornarniarput sôrlo naliuneksiorningata ivsornarningatut.

²⁷ Aktoajorlo tâpkoninga ivsornarniarpok, annorânalo ergortoraksarivait, ubvarlunalo nangminerminik imermut, ivsornarniarlunalo unnuk tikidlugo.

²⁸ Aᴋiktaukpalle pêjainerminit, kititsijuksauvok nangminerminut uvlunik sevenenik, tâpkoalo nâkpatta sujungainiarpok.

²⁹ Uvlullo 8ingane tigusijuksauvok aᴋigeojârtûngnik maggûngnik, aᴋigearaujârtûngniglônêt maggûngnik, âlugiglo ajoᴋertuijomut ilagêktut tupingata upkoanganut.

³⁰ Ajoᴋertuijûblo aipâ tunergutigijaksarivâ tunergutiksautilugo ajoᴋêrutiksamik, aipangalo tunergutiksautilugo ôtaksamik; ajoᴋertuijûblo ulapᴋoseraksarivâ Nâlekab sângane, naliuneᴋsiorningata ivsornarninga pivlugo.

³¹ Taimâk Israêlib ᴋitorngangit avitaksarivase ivsornarninginit; toᴋoᴋonagit ivsornarnermingne, sujuitilugit tuperᴋotimnik akornganêtomik.

³² Tamadja perᴋojat korliartoᴋartut pêjaijullo kenakomingnik, ivsornartitaujutigilugit;

³³ Arnarlo naliuneksiortok aungmik pivlugo; korliartoᴋartorlo pivlugo, angullônêt arnarlônêt; angullo tutingniktok arnarmik ivsornartomik pivlugo.