Leviticus 14 - Labrador Inuttitut Heritage Bible

¹ Nâlekablo Mosese oᴋarvigivâ, oᴋarlune:

² Tamadja perᴋojak kalaᴋadlartok pivlugo uvlorme inûlijauvingane: ajoᴋertuijomut âtaujuksauvok;

³ Ajoᴋertuijorlo aijuksauvok tupersuit avatânut; ajoᴋertuijorlo ulernairtuijuksauvok, ahâglo, ᴋanimasek kalâluk âᴋikpat kalaᴋadlartome,

⁴ Ajoᴋertuijok tigusiᴋojijuksauvok sujungaititaksak pivlugo tingmiângnik maggûngnik ômajûngnik ivsornaitûngnik, ᴋejungmiglo Sideremik, aupaluktamiglo (merᴋolingmik), isupeniglo (ᴋesertutinik);

⁵ Ajoᴋertuijorlo toᴋotsiᴋojijuksauvok tingmiab aipanganik pôngme maggarme imiub ômanartûb ᴋolâne;

⁶ Tingmiarlo ômajok tigujaksarivâ, ᴋejuglo Sidere, aupaluktorlo, isupelo, misuklugillo, tingmiak ômajok ilagilugo, tingmiab toᴋotaulauktûb imiub ômanartûb ᴋolâne, aunganut;

⁷ Sevenertorlunalo sujungaititaksak kalâlungmit serparsaraksarivâ, sujungaititaunerarlugolo, tingmiarlo ômajok aulartitaksarivâ silamut.

⁸ Sujungaititablo annorâne ergortoraksarivait, nujanalo tamaita salilugit, ubvarlunalo nangminerminik imermut, tagva sujungainiarpok; tungânalo tupertalingmut aijuksauvok, tupermelo silatâne ineᴋartuksauvok uvlunik sevenenik.

⁹ Uvlullo seveningane nujane tamaita niaᴋominêtut, uminginalo, ᴋablonalo, ila, nujane tamaita salijaksarivait;

¹⁰ Uvlullo 8ingane tigusijuksauvok saugârsûngnik angutîngnik ᴋanoetoᴋangitûngnik maggûngnik, saugârsungmiglo arnarmik, atautsemik jârelingmik, ᴋanoetoᴋangitomik, atautsemik, sanaugatsiarmiglo ôktûtinik pingasunik, tunergutiksaujomik nerᴋiksaujomik, orksumut akusimajomik, orᴋsumiglo ôktûtib tatajutinganik.

¹¹ Ajoᴋertuijûblo sujungaititsijûb tâmna sujungaititak, perᴋutillo tâpkoa pititaksarivait Nâlekab sânganut, ilagêktut tupingata sângane;

¹² Ajoᴋertuijûblo saugârsûk angutîk ilangak tigujaksarivâ tunergutigilugolo tunergut pasijaungijutiksak, ôktûtelo orᴋsumik, senervaiᴋitârtilugolo tunergut sanervaiᴋitârtitaujok Nâlekab sângane;

¹³ Saugârsuglo angutik toᴋotaksarivâ tunergutit ajoᴋêrutiksat tunergutillo ôtaksat toᴋotauvingane ivsornaitovingme; tagva sôrlo tunergut ajoᴋêrutiksak ajoᴋertuijûb ningersiaringmago taimâktauk tunergut pasijaungijutiksak pigigivâ; ivsornaitoksôvok;

¹⁴ Ajoᴋertuijûblo tunergutib pasijaungijutiksab aungata ilanga tigujaksarivâ pitilugolo sujungaititaksab siutingata tallerpiub nuvuanut, aggangitalo tallerpit ᴋubluanut, itigangitalo tallerpit puttogunganut;

¹⁵ Ajoᴋertuijûblo orᴋsûb ôktûtemêtûb ilanga tigujaksarivâ kovilugolo aggangme saumiata itimanganut;

¹⁶ Ajoᴋertuijûblo tikerne tallerpik misugaksarivâ orᴋsumut aggangminêtomut saumingme, sevenertorlunalo orᴋsuᴋ serᴋerautigijaksarivâ tikerminut Nâlekab sângane;

¹⁷ Orᴋsûblo aggangminêtûb amiakoata ilanga ajoᴋertuijûb pititaksarivâ sujungaititaksab siutingata tallerpiub nuvuanut, aggangitalo tallerpit itimanganut, itigangitalo tallerpit puttogunganut, tunergutiksab pasijaungijutiksab aungata ᴋânganut;

¹⁸ Orᴋsûblo ajoᴋertuijûb agganginêtûb amiakoa pititaksarivâ sujungaititaksab niaᴋoanut; ajoᴋertuijûblo ulapirᴋsaraksarivâ Nâlekab sângane.

¹⁹ Ajoᴋertuijûblo tunergut ajoᴋêrutiksak tunergutigijaksarivâ, sujungaititaksarlo ivsornarnine pivlugo ulapirᴋsaraksarivâ; tungânalo tunergut ôtaksak toᴋotaksarivâ;

²⁰ Ajoᴋertuijûblo tunergut ôtaksak tunergullo nerᴋiksak tunergutigijaksarivâk tunerguservingme; ajoᴋertuijûblo ulapᴋoseraksarivâ, tâmnalo sujungainiarpok.

²¹ Aklujokpallo, taimâglo angitigijomik pijungnarane, tigusijuksauvok saugârsungmik angutimik atautsemik tunergutiksarilugo pasijaungijutiksamik sanervaiᴋitârtitaksamik, ulapirᴋsartaujutiksaminut, sanaugatsiarmiglo ôktûtib efab tallimaujoanik, orᴋsumut akusimajomik, tunergutigilugo nerᴋiksamik, orᴋsumiglo ôktûtimik;

²² Aᴋigeojârtûngniglo maggûngnik, aᴋigearaujârtûngniglônêt maggûngnik, pijungnartanga maliklugo; aipâlo tunergutiksauniarpoᴋ ajoᴋêrutiksak, aipangalo tunergutiksak ôtaksak.

²³ Uvlullo 8ingane âtaksarivait sujungaititauniksaminut ajoᴋertuijomut, ilagêktut tupingata upkoangata sânganut, Nâlekab sânganut.

²⁴ Ajoᴋertuijûblo saugârsuk tunergutiksak pasijaungijutiksak, orᴋsôrlo ôktûtemêtok, tigujaksarivâk, ajoᴋertuijûblo sanervaiᴋitârtitaksarivâk tunergutiksautilugik sanervaiᴋitârtitaujok Nâlekab sângane;

²⁵ Saugârsuglo tunergutiksak pasijaungijutiksak toᴋotaksarivâ, ajoᴋertuijûblo tunergutiksab pasijaungijutiksab aungata ilanga tigujaksarivâ pitilugolo sujungaititaksab siutingata tallerpiub nuvuanut, aggangitalo tallerpit ᴋubluanut, itigangitalo tallerpit puttogunganut;

²⁶ Ajoᴋertuijûblo orᴋsûb ilanga kovijaksarivâ aggangme saumit itimanganut;

²⁷ Ajoᴋertuijûblo orᴋsûb aggangminêtûb saumingme ilanga serᴋerautigijaksarivâ tikerminut tallerpingmut sevenertorlune Nâlekab sângane;

²⁸ Ajoᴋertuijûblo orᴋsûb aggangminêtûb ilanga pititaksarivâ sujungaititaksab siutingata tallerpiub nuvuanut, aggangitalo tallerpit ᴋubluanut, itigangitalo tallerpit puttogunganut, tunergutiksab pasijaungijutiksab aungata ininganut;

²⁹ Orᴋsôrlo amiaᴋojok ajoᴋertuijûb agganginêtok pititaksarivâ sujungaititaksab niaᴋoanut, ulapᴋutiksarilugo tâmna pivlugo Nâlekab sângane.

³⁰ Aᴋigeojârtûblo aᴋigearaujârtûblônêt aipanga, pijungnartanga maliklugo, tunergutigijaksarivâ;

³¹ Ilâ, pijungnartanga maliklugo, aipâ tunergutiksautilugo ajoᴋêrutiksamik, aipangalo tunergutiksautilugo ôtaksamik, tunergutiksak nerᴋiksak ilagilugo; ajoᴋertuijûblo sujungaititaksak ulapᴋoseraksarivâ Nâlekab sângane.

³² Tamadja perᴋojat kalaᴋadlartut pivlugit, sapertut sujungaititaunermingnut ilangajut ilûnaita sakᴋerlugit.

³³ Nâlekablo Mosese Aronalo oᴋarvigivâk, oᴋarlune:

³⁴ Tikisimagupse nunamut Kanaanemut, tunijamnut perᴋutauᴋovlugo ilipsingnut, ᴋanimaserlo kalâluk pitikupko iglomut nunamêtomut perᴋutigijapsingne;

³⁵ Iglûb inuata ajoᴋertuijok oᴋautijartoraksarivâ, oᴋarlune: ᴋanimasekarᴋôrpok iglome;

³⁶ Ajoᴋertuijûblo iglo pitairutijauᴋojaksarivâ ajoᴋertuijok iterᴋârtinago ᴋanimasek ulernairtoromavlugo, iglomêtut ilûnatik ivsornartitauᴋonagit; tungânalo ajoᴋertuijok itertuksauvok iglo ulernairtoromavlugo;

³⁷ ᴋanimaserlo takonârniarpâ, ahâglo, ᴋanimasek iglûb ᴋarmanginêkpat, ilukitunik ᴋopugarlune, ivijângavlune aupalângavlunelônêt, itinersauᴋôrpallo ᴋarmab ilingajuksauninganit;

³⁸ Ajoᴋertuijok anijuksauvok iglûb upkoanganut, iglolo palangairlugo uvlut sevenit nâvlugit;

³⁹ Uvlullo seveningane ajoᴋertuijok takojartortuksaulerivok, ahâglo, ᴋanimasek siamangakpat iglûb ᴋarmangine;

⁴⁰ Ajoᴋertuijûb ujarait ᴋanimasertalit pêjartauᴋojaksarivait, egilugillo ivsornartoᴋautemut iglugasaksuit silatâne;

⁴¹ Iglûblo ilua ilûnane mingoarutâ pêjartaujuksauvok, maggarlo pêjartaujok egitaujuksauvok ivsornartoᴋautemut iglugasaksuit avatânêtomut;

⁴² Ujaraillo tâpkoa assinginik tigusijuksauvut ililugillo pêrtut inigilauktangane; maggarmiglo assianik tigusijuksauvut iglolo mingoarlugo.

⁴³ ᴋanimaserlo sakᴋijârmikpat takuksauniarlunalo iglome, ujarait pêjartauᴋârtilugit, maggarlo pêjartauᴋârtilugo iglolo mingoartaungmitilugo;

⁴⁴ Tagva ajoᴋertuijok itertuksauvok ulernairtuilunalo, ahâglo, ᴋanimasek siamangakpat iglome, ᴋanimasiovok nungutsijok iglome; ivsornarpok.

⁴⁵ Iglolo serᴋomitaksarivâ, ujaraktangillo, ᴋejuktangillo, iglûblo magganga ilûnane âtaksarivait iglugasaksuit avatânut ivsornartoᴋautemut.

⁴⁶ Itertoᴋarpallo iglomut, iglo palangairsimatilugo, tâmna ivsornarpok unnuk tikidlugo.

⁴⁷ Siniktartûblo iglome annorâne ergortoraksarivait; nerrijublo iglome annorâne ergortoraksarivait.

⁴⁸ Ajoᴋertuijorlo iterpat ulernairtuilunalo, ahâglo, ᴋanimasek siamalungilak iglome, iglo mingoartauᴋârtilugo; ajoᴋertuijûb iglo sujungaineraraksarivâ, ᴋanimasek âᴋiksimangmat.

⁴⁹ Iglolo sujungaititsomavlugo tigusijuksauvok tingmiângnik maggûngnik, ᴋejungmiglo Sideremik, aupaluktamiglo (merᴋolingmik), isupeniglo;

⁵⁰ Tingmiablo aipanga toᴋotaksarivâ pôngme maggarme imiub ômanartûb ᴋolâne;

⁵¹ ᴋejuglo Sidere, isupelo, aupaluktarlo, tingmiarlo ômajok tigujaksarivait misuklugillo tingmiab toᴋungajûb aunganut imermullo ômanartomut, iglolo serparsarlugo sevenertorlune;

⁵² Iglolo sujungaititaksarivâ tingmiab aunganut imermullo ômanartomut, tingmiarmullo ômajomut, ᴋejungmullo Sideremut, isupemullo, aupaluktamullo;

⁵³ Tingmiarle ômajok aulartitaksarivâ iglogasaksoarnit silamut; taimaglo iglo ulapᴋoseraksarivâ, sujungainiarporlo.

⁵⁴ Tamadja perᴋojat ᴋanimasek kalâluk, ᴋagleliglo,

⁵⁵ Kalâluglo annorâme, iglomelo,

⁵⁶ Publertorlo, uttuviluglo, ᴋeblertorlo, pivlugit;

⁵⁷ Ajoᴋertuilutik ᴋanga ivsornarmangât, ᴋangalo sujungaimangât; tamadja perᴋojak kalâluk pivlugo.