Leviticus 13 - Labrador Inuttitut Heritage Bible

¹ Nâlekablo Moseselo Aronalo oᴋarvigivak, oᴋarlune:

² Inûb uviningata amingane publertoᴋarpat, ᴋagleᴋarpallônêt uttuvilukpallônêt, kalâlôniarpallo, inuk ᴋaitaujuksauvok Aronemut ajoᴋertuijomut, ajoᴋertuijullônêt erningita ilanganut;

³ Ajoᴋertuijûblo ᴋanimasek uviningata aminganêtok ulernairtoraksarivâ; merᴋullo ᴋanimaserme ᴋaᴋorsimakpatta, ᴋanimasiublo tautua itinersaukpat uviningata aminganit, tagva kalâlôvok; ajoᴋertuijûblo ulernairtoraksarivâ ivsornarnerarlugolo.

⁴ Uttuville ᴋaᴋortaukpat uviningata amingane, tautualo maliklugo itinersaungipat aminganit, merᴋungillo ᴋaᴋorsimangipatta, ajoᴋertuijûb ᴋanimasekartok ingmigolingatitaksarivâ uvlunik sevenenik;

⁵ Uvlullo seveningane ajoᴋertuijûb ulernairtoraksarivâ; tâpsomalo ulernairtuininga maliklugo ᴋanimasek soᴋosingipat, siamalungipallo amingane, ajoᴋertuijûb ingmigolingatitaksarilerivâ uvlunik sevenenik;

⁶ Ajoᴋertuijûblo ulernairtoraksarilerivâ uvlut seveningane; ᴋanimaserlo ᴋunolerpat, siamalungipallo amingane, ajoᴋertuijûb sujungaineraraksarivâ; ᴋagletuinauvok; annorânalo ergortoraksarivait sujungaivlunalo.

⁷ Kaglele siamarpat amingane, ulernairtauᴋârtilugo ajoᴋertuijomut sujungainerartaujomavlune, ulernairtortaujuksaulerivok ajoᴋertuijomut;

⁸ Ajoᴋertuijûblo ulernairtoraksarivâ, ahâglo, ᴋagle siamangalerpat amingane, ajoᴋertuijûb ivsornarneraraksarivâ; kalâlôvok.

⁹ ᴋanimasek kalâluk inungmêpat, âtaujuksauvok ajoᴋertuijomut;

¹⁰ Ajoᴋertuijorlo ulernairtuijuksauvok, ahâgle, ᴋaᴋortamik publertoᴋarpat amerme, merᴋullo ᴋaᴋorsikpatta, uvineᴋarpallo mamisuitomik publertome,

¹¹ Kalâlôvok nutaungitok uviningata amingane, ajoᴋertuijûblo ivsornarneraraksarivâ; parngnanairsoraksarilungilâ; ivsornarmat.

¹² Kalâlugle ᴋaglelimarilerpat amerme, kalaᴋadlartûblo aminga ilûnât ulikpago niaᴋoanit itigangit tikidlugit, sôrlo takuksaungmat ajoᴋertuijomut;

¹³ Ajoᴋertuijok ulernairtuijuksauvok; ahâglo, kalâlûb uvininga ilûnât ulikpago kalaᴋadlartok sujungaineraraksarivâ; ᴋaᴋorsivok ilûnane; sujungaipok.

¹⁴ Uvinigle mamisuitok sakᴋersinnarmikpat ᴋanga, ivsornarnialerivok.

¹⁵ Ajoᴋertuijûblo uvinik mamisuitok ulernairtoraksarivâ, ivsornarnerarlugolo; uvinik mamisuitok ivsornarpoᴋ; kalâlôvok.

¹⁶ Uvinigle mamisuitok ablatsaulerpat ᴋaᴋortangorniarlune, ajoᴋertuijomut aijuksaulerivok.

¹⁷ Ajoᴋertuijûblo ulernairtoraksarivâ; ahâglo, ᴋanimasek ᴋaᴋortangorpat, ajoᴋertuijûb kalaᴋadlartok sujungaineraraksarivâ, sujungaipok.

¹⁸ Ajuaᴋarpallo uviniub amingane, mamikpallo,

¹⁹ Ajuablo iniviningane publertoᴋarpat ᴋaᴋortamik, ᴋeblertoᴋarpallônêt aupalângajomik ᴋaᴋoangajomik, takojautitaujuksauvok ajoᴋertuijomut;

²⁰ Ajoᴋertuijorlo ulernairtuiniarpoᴋ, ahâglo, tautua itinersauᴋôrpat amermit, merᴋungillo ᴋaᴋorsisimakpatta, ajoᴋertuijûb ivsornarneraraksarivâ; kalâlôvok; sakᴋertok ajuakut.

²¹ Ajoᴋertuijûble ulernairpago, ahâglo, merᴋoᴋangipat ᴋaᴋortanik, itinersaulungipallo amermit, ᴋeblerungnairpallo, ajoᴋertuijûb parngnanairsoraksarivâ uvlunik sevenenik;

²² Siamarpallo amerme, ajoᴋertuijûb ivsornarneraraksarivâ; ᴋanimasiovok.

²³ Keblertorle nûngipat iniminit, siamalungipallo, killerôvok ajuarmit; ajoᴋertuijûblo sujungaineraraksarivâ.

²⁴ Uviniglonet ôneᴋarpat amingane, ônerublo uvininga ᴋeblilerpat, aupalângavlune ᴋaᴋoangavlune, ᴋaᴋortaulerlunelônêt;

²⁵ Ajoᴋertuijûb ulernairtoraksarivâ, ahâglo, merᴋut ᴋeblertome ᴋaᴋorsisimakpatta, tautualo itinersaukpat amermit, kalâlôvok, sakᴋertok ônerme; ajoᴋertuijûblo ivsornarneraraksarivâ; ᴋanimaseovok kalâluk.

²⁶ Ajoᴋertuijûble ulernairpago, ahâglo, ᴋaᴋortanik merᴋoᴋangipat ᴋeblertome, itinersaulungipallo amermit, ᴋeblerungnaiporle; ajoᴋertuijûb parngnanairsoraksarivâ uvlunik sevenenik;

²⁷ Ajoᴋertuijûblo ulernairtoraksarivâ uvlut seveningane; siamangalerpat amerme, ajoᴋertuijûb ivsornarneraraksarivâ; ᴋanimaseovok kalâluk.

²⁸ Keblertorle nûngipat iniminit, siamalugane amerme, ᴋeblerungnailunalo; publertotuinauvok ônermit, ajoᴋertuijûblo sujungaineraraksarivâ, killerôvok ônermit.

²⁹ Angullo arnarlônêt ᴋanimasekarpat niaᴋoane uminganelônêt,

³⁰ Ajoᴋertuijûb ᴋanimasek ulernairtoraksarivâ, ahâglo, tautua itinersaukpat amermit, ᴋorᴋsutaniglo amituniglo nujaᴋarpat, ajoᴋertuijûb ivsornarneraraksarivâ; ᴋagleliovok, kalâlôvok niaᴋome umingmelônêt.

³¹ Ajoᴋertuijûblo ᴋanimasek ᴋaglelik ulernairtorpago, ahâglo, tautua itinersaulungipat amermit, nujaᴋangipallo ᴋernertanik, ajoᴋertuijûb ᴋanimaselik ᴋaglelingmik parngnanairsoraksarivâ uvlunik sevenenik;

³² Uvlullo seveningane ajoᴋertuijûb ulernairtoraksarivâ, ahâglo, ᴋaglelik siamalungipat, ᴋorᴋsutaniglo nujaᴋangipat tâpsomane, ᴋaglelijûblo tautua itinersaungipat amermit,

³³ Salijaujuksauvok, ᴋagleligle salinago; ajoᴋertuijûblo parngnanairsoraksarivâ uvlunik sevenenik sulle;

³⁴ Uvlullo seveningane ajoᴋertuijûb ᴋaglelik ulernairtoraksarivâ; ahâglo, ᴋaglelik siamangalungipat amerme, tautualo itinersaulungipat amermit, ajoᴋertuijûb sujungaineraraksarivâ; annorânalo ergortoraksarivait sujungainiarlunalo.

³⁵ Kagleligle siamarpat amerme sujungaiᴋârlune;

³⁶ Ajoᴋertuijûb ulernairtoraksarivâ; ahâglo, ᴋaglelik siamangakpat amerme, ajoᴋertuijok ᴋenertuksaungilak nujanik ᴋorᴋsutanik; ivsornarpok.

³⁷ Ijîngminulle ᴋaglelik soᴋosingipat, nujallo ᴋernertat nuilerpatta tagvane, ᴋaglelik âkᴋikpok, sujungaiporlo; ajoᴋertuijûblo sujungaineraraksarivâ.

³⁸ Angullo arnarlônêt ᴋeblertoᴋarpat uviningata amingane, tagva ᴋeblertunik ᴋaᴋortanik;

³⁹ Ajoᴋertuijok ulernairtuijuksauvok, ahâglo, ᴋeblertut uviningata amingane ᴋaᴋoangajôkpatta, puiᴋatteovok sakᴋertok amerme, sujungaipok.

⁴⁰ Inublo nujangit pêjarpatta niaᴋoanit, merᴋoêrongne liovok; sullele sujungaipok.

⁴¹ Nujairsimakpallo niaᴋoata kabjinganit, merᴋoêrongneliovok kabjingane; sullele sujungaipok.

⁴² Niaᴋoatale nujairsimaningane, kabjingatalônêt nujairsimaningane ᴋanimasekarpat aupalângajomik ᴋaᴋoangajomik, kalâlôvok sakᴋertok niaᴋoata nujairsimaningane, kabjingatalônêt nujairsimaningane.

⁴³ Ajoᴋertuijûblo ulernairtoraksarivâ; ahâglo, ᴋanimasiub publerninga niaᴋoata nujairsimaningane, kabjingatalônêt nujairsimaningane aupalângakpat ᴋaᴋoangavlune kalâlûb tautuatut uviningata amingane;

⁴⁴ Kalaᴋadlartôvok, ivsornarporlo; ajoᴋertuijûblo ivsornarneraraksarivâ; ᴋanimasekarpok niaᴋoane.

⁴⁵ Kalaᴋadlartublo ᴋanimaseliub annorângit aliktortaujuksauvut, nessalijartuksaungilarlo, ᴋangasinânalo mattujaksarivâ, ᴋaigarsuktuksauvorlo: Ivsornartomik, ivsornartomik.

⁴⁶ ᴋanimasekarningatalo uvlungit nâvlugit ivsornartuksauvok; ivsornarpok, inutôvlune igloᴋartuksauvok; tupersuit avatâne ineᴋartuksauvok.

⁴⁷ Annorarlo ᴋanimaselik merᴋoliomangât uvineruksajaumangâllônêt;

⁴⁸ Pergaimajômangât tajaliogaumangâllônêt, ivaloksajaumangâllônêt merᴋoliomangâllônêt; ᴋisingmêmangât, ᴋisijarmêmangâllônêt;

⁴⁹ ᴋanimasek iviujangakpat aupalângakpallônêt annorâme, ᴋisingmelônêt, ivaloksajamelônêt, tajaliogarmelônêt, sunamelônêt ᴋisingmit sanamajome, ᴋanimasiovok kalâluk unertutijaujuksauvorlo ajoᴋertuijomut;

⁵⁰ Ajoᴋertuijûblo ᴋanimasek ulernairtoraksarivâ, ᴋanimaseliglo ingmigolingatitaksarivâ uvlunik sevenenik;

⁵¹ Uvlullo seveningane ᴋanimasek ulernairtoraksarivâ; ᴋanimaserlo siamangakpat annorâme pergaimajome tajaliogarmelônêt ᴋisingmelônêt, ᴋisik sunamut atoraloarmangât, ᴋanimasiovok ungilangnartok; ivsornarporlo.

⁵² Annorârlo ᴋanimaselik ôtitaksarivâ pergaimajômangat tajaliogaumangâllônêt, merᴋolingme ivaloksajarmelônêt, ᴋisijarmelônêt; ᴋanimaseongmat ungilangnartok; ikomamut ôtitaujuksauvok.

⁵³ Ajoᴋertuijorlo ulernairtuikpat, ahâglo, ᴋanimasek siamangilak annorârme, pergaimajome, tajaliogarmelônêt, ᴋisijarmelônêt;

⁵⁴ Ajoᴋertuijûb annorâk ᴋanimaselik ergortortauᴋojaksarivâ, ingmigolingatitaksarivâlo uvlunik sevenenik sulle;

⁵⁵ Ajoᴋertuijorlo ulernairtuijuksauvok ᴋanimaselik ergortortauᴋârtilugo, ahâglo, ᴋanimasiub tautua soᴋosingipat, siamangipallo, ivsornarpoᴋ; ikomamut ôtitaksarivat; ungilangnartôvok, pêjartaunangitok.

⁵⁶ Ajoᴋertuijorlo ulernairtuikpat, ahâglo, ergortortauᴋârlune ᴋanimasek ᴋunolerpok, pêjaraksarivâ annorâmit, ᴋisijarmit, pergaimajomillônêt, tajaliogarmillônêt;

⁵⁷ Takuksaukpallo sulle annorâme, pergaimajome, tajaliogarmelônêt, ᴋisijarmelônêt, nuilerivok; ᴋanimaseliglo ôtitaksarivat ikomamut.

⁵⁸ Annorârlo, pergaimajak, tajaliogarlônêt, ᴋisijarlônêt ergortortak, ᴋanimasêrutijaukpat, aipanganik ergortortaujuksauvok, sujungainiarporlo.

⁵⁹ Tamadja perᴋojak ᴋanimasek kalâluk pivlugo, annorâme merᴋolingme ivaloksajarmelônêt, pergaimajome tajaliogarmelônêt, ᴋisijarmelônêt, sujungaitônerarlugolônêt ivsornarnerarlugolônêt.