Leviticus 10 - Labrador Inuttitut Heritage Bible

¹ Aroniblo ernîkita, Nadab Abihublo atunit pujortitsivingne tiguvâkik, ikomatatserlugiglo, isserluanerutiksamiglo ilijivuk ᴋânganut, tunerguserlutiglo ikomamik adseungitomik Nâlekab sângane, tâpsomalo perᴋojijutigilaungitanganik tâpkungnunga.

² Ikomalo anivok Nâlekab sânganit tâpkoalo nungulugik, toᴋovuglo Nâlekab sângane.

³ Mosesiblo Aron oᴋautivâ: Tamadja ila Nâlekab oᴋautigilauktanga, oᴋarlune: Ivsornaititaujomavunga uvamnik najorniktunut, inuillo ilûnatik sângane ânanausijaujomavunga. Aronalo niplingilak.

⁴ Mosesiblo Misael Elsafanalo, Usiêlib Aronib akkangata ernîgik, ᴋaiᴋovâk oᴋautilugiglo: Maungaleritik, ᴋatangutîktiglo âlertikik ivsornaitoviub sânganit tupersuit avatânut.

⁵ Tagvungarpuglo âlugiglo atisimavlutik ulîgingnik tupersuit avatânut, sôrlo Mosese oᴋarmat.

⁶ Mosesiblo Aron ernîgiglo, Eleasare Itamarelo, oᴋautivait: Nessairniarase annorâselo aliktorniarasigik, toᴋoᴋonase, ilagêllo ilûnaita ningarvigilugit perᴋonago; ᴋatangutisele Israêlekut ilûnatik ᴋugviorlit ikitaunek Nâlekab ikitavininga pivlugo.

⁷ Anijuksaungilaselo ilagêktut tupingata upkoanganit, toᴋoᴋonase, orksuk Nâlekab mingoarutâ ilipsingnêmat. Piniarpullo Mosesib oᴋausinga maliklugo.

⁸ Nâlekablo Aron oᴋarvigivâ, oᴋarlune:

⁹ Igvillônêt ernitillônêt vainemik imiksamiglônêt tallanartomik imerniarase ilagêktut tupinganut itilerupse, toᴋoᴋonase; perᴋojak tamanna soᴋosijuituksauvok kinguvârêngnipsingnut ilûnainut:

¹⁰ Adsigêngititsijuksauvoselo ajungitomik ajortomiglo, ivsornartomiglo ivsornaitomiglo;

¹¹ Israêliblo ᴋitorngangit ajoᴋertoraksarivase perᴋojanik tamainik Nâlekab oᴋautigijanginik tâpkonunga Mosesekut.

¹² Mosesiblo Aron ernîgiglo Eleasarelo Itamarelo amiakôjuk oᴋautivait: Tunergutik sanaugak amiakôjok tunergutaujunit Nâlekamut ikomakut tigusiuk nerrilugolo pubjusauteᴋarane tunerguserviub saniane, ivsornaitoksôngmat;

¹³ Ivsornaitovingmelo nerrijaksarivase, igvit ernivillo ilangiusiarigapsiuk tunergutaujunit Nâlekamut ikomakut; taimâk perᴋojaugama.

¹⁴ Sakiarlo sanervaiᴋitârtitaujok tallerlo issârutaujok nerrijaksarivase ivsornaitovingme, igvit ernivillo pannivillo ilagilutit; tunijaungmatta igvit ernivillo ilangiusiarijaksapsingnik Israêlib ᴋitorngangita tunergutinginit ᴋujaliutiksanit.

¹⁵ Talleᴋ issârutaujok sakiarlo sanervaiᴋitârtitaujok ᴋaitaksarivait tunnok tunergutiksak ikomakut ilagilugo sanervaiᴋitârtitauᴋattarᴋovlugo tunergutauvlune sanervaiᴋitârtitaujok Nâlekab sângane; igvit ernivillo perᴋutigijaksarivase, ilangiusiaksase soᴋosijuitok; sôrlo Nâlegak perᴋojingmat.

¹⁶ Mosesiblo katsungaivlune tuktungajok tunergutaujok ajoᴋêrutiksak ᴋenerpâ, ahâglo, ikitaumavok, Eleasarelo Itamarelo Aronib ernîgik amiakôjuk ningarvigivâk, oᴋarlune:

¹⁷ Suna pivlugo tunergut ajoᴋêrutiksak nerrilungikisiûk ivsornaitovingmê? Ivsornaitoksôdlarmat, ilipsingnullo ilingatilaungmago ilagêt idluituliningit erᴋsugaksarigapsigik, ulapirᴋsarlugillo Nâlekab sângane.

¹⁸ Ahâk, tâpsoma aunga âtaungilak ivsornaitovingmut; nerrijaksarilauᴋpase, sôrlo perᴋojilaurama.

¹⁹ Aroniblo Mosese oᴋautivâ: Ahâk, uvlome tunergusilauᴋput tunergutimingnik ajoᴋêrutiksamik tunergutimingniglo ôtaksamik Nâlekab sângane; pijokartullo tamakkoa tikipânga; tunergullo ajoᴋêrutiksak nerrilaurupko uvlome ᴋuvianarajalauᴋâ Nâlekab takkoanê?

²⁰ Mosesiblo tamanna tusaramiuk, ᴋuvianarpoᴋ tâpsoma takkoane.