Leviticus 1 - Labrador Inuttitut Heritage Bible

¹ Nâlekablo Mosese ᴋaigarsugvigivâ, oᴋautilugolo ilagêktut tupinganit, oᴋarlune:

² Israêlib ᴋitorngangit oᴋarvigikit, oᴋautilugillo: Naliat akunapsingne tunergumik tunerguseromakpat Nâlekamut, tunergutiksarsijuksauvok nergjutinit, tuktuvangnit sauganillônêt.

³ Tunergutiksak ôtaksaukpat tuktuvangnit, tunergusertuksauvok angusâlormik ᴋanoêtoᴋangitomik: tunergutigijaksarivâ ilagêktut tupingata upkoangata sângane, ᴋuviagijauᴋovlugo Nâlekamut.

⁴ Otaksablo niaᴋoa patigaksarivâ aggangminut: nâmagijauniarpok tagva ulapirksautauvlune tâpsomunga.

⁵ Tuktuvaglo toᴋotaksarivâ Nâlekab sângane; Aroniblo erningita, ajoᴋertuijut, auk âtaksarivât serᴋerautigilugolo tunerguserviub avatânut, ilagêktut tupingata upkoangata sânganêtomut.

⁶ Otaksarlo âktoraksarivâ avgorlugolo.

⁷ Aroniblo ajoᴋertuijûb erningita tunerguservik ikomaᴋartitaksarivât ᴋejuklugolo:

⁸ Aroniblo erningita ajoᴋertuijut avgoat, niaᴋok tunnorlo, ilijaksarivakik âkᴋiksorsimavlutik ᴋejuit ᴋânganut, ikomamêtonut tunerguservingmêtomut:

⁹ Erᴋavingille niungillo ergortoraksarivait imermut; ajoᴋertuijûblo ôtitaksarivâ ilûnât tunerguservingme, tunergutautilugillo ôtaksamik, tunergut ikomakut, tipitsiariktoᴋutaujok Nâlekamut.

¹⁰ Tunergutiksangalo ôtaksak sauganit tuktungajunillônêt pikpat: tunergutigijaksarivâ angusâlok ᴋanoêtoᴋangitok.

¹¹ Toᴋotaksarivâlo tunerguserviub saniane taggâne Nâlekab sângane; Aroniblo erningita, ajoᴋertuijut, aunga serᴋerautigijaksarivât tunerguserviub avatânut.

¹² Avigaksarivâgiglo niaᴋoalo tunnungalo: ajoᴋertuijûblo ilijaksarivâk âkᴋiksorsimatilugik ᴋejuit ᴋânganut ikomamêtunut tunerguservingme:

¹³ Erᴋaville niullo ergortoraksarivait imermut: ajoᴋertuijûblo tunergutigijaksarivâ ilûnât, ôtilugolo tunerguservingme: tunergutauvok ôtâk, tunergut ikomakut, tipitsiariktoᴋutaujok Nâlekamut.

¹⁴ Tunergutiksangalo Nâlekamut tunergutiksaukpat ôtaksamik tingmianik, tagva akᴋigiojârulangnik akᴋigiojârtuniglônêt tunergutiksaᴋartuksauvok.

¹⁵ Ajoᴋertuijûblo âtaksarivâ tunerguservingmut niaᴋoêjarlugolo, ôtilugolo tunerguservingme, aungalo kovijaujuksauvok tunerguserviub saneranganut:

¹⁶ Puviangalo merᴋungillo pêjaraksarivait egilugillo tunerguserviub sanianut killermut, argjaᴋôvingmut:

¹⁷ Isarokullo ᴋopijaksarivâ avgornagole: ajoᴋertuijûblo ôtitaksarivâ tunerguservingme, ᴋejuit ikomamêtut ᴋângane: tunergutauvok ôtâk, tunergut ikomakut, tipitsiariktoᴋutaujok Nâlekamut.