Jeremiab Ogguarutigijangit 5 - Labrador Inuttitut Heritage Bible

¹ Nalegak, erᴋailaurit sunamut tikitaumangâpta; takosarit, mitautaunivullo ulernaigilauruk.

² Kingormgutijavut (nunavut) tunijauvok takorngartanut, iglovullo nunaᴋatigilungitaptingnut.

³ Iliarsôvogut atâtaᴋaratalo, anânavut uigarnektitut iput.

⁴ Imiksavut imerpavut kênaujanut; ᴋejuksavut niorvgutigijauvok uvaptingnut.

⁵ Udlartivut kinguniptingnêput ᴋanitaptingne; merngortudlarpogut, merngoerserᴋojaungilagullo.

⁶ Aggavut tunilaukpavut Egiptenemiunut Assiriamiunullo, nerᴋiksanut nâmaksititaujomavluta.

⁷ Atâtavut idluitulidlalaukput, itsungnaipullo; uvagullo idluituliningit erᴋsukpavut.

⁸ Kivgaulauktut ataniotivigivâtigut; piuliklertoᴋangilarlo uvaptingnik agganginit.

⁹ Inôsivut nangianartomêtilugit nerᴋiksavut tikiutipavut, saviksoak inuᴋangitomêtok pitjutigilugo.

¹⁰ Amivut ônadlarput kiaksautetut, kângnartoksûb ônartitsininga pitjutigilugo.

¹¹ Arnat Zioneme assiniarvigilaukpait, uigasuillo Judab iglugasaksoanginêtut.

¹² Angajoᴋâksuit nivingartaulaukput aggangitigut: inutoᴋaujullo kênangit opigijaungilat.

¹³ Inôsuktut angutit kaivivit ujaraktanginik akkigartuksaulaukput, sorutsillo ᴋejuktarnermut majangadlalaukput.

¹⁴ Inuᴋoartut iksivajungnaiput upkoaksuit saniane, inôsuktullo angutit tuksialagungnaiput.

¹⁵ Omatipta ᴋuviasungningit sorairput; oᴋigêsernivullo ablatsangortitauvok kiksarnermut.

¹⁶ Niaᴋôtik kataksimavut niaᴋuptingnit. Kapianarmêk uvagut! Idluitulidlalaurapta.

¹⁷ Tamanna pivlugo ômativut ᴋanimavut; tamanna pivlugolo ijivut takpêput;

¹⁸ Zionib ᴋakᴋanga pivlugo, sunairutijok; terrianiangojârtut arvertarvigivât.

¹⁹ Igville, Nâlegak, soᴋosijuitôvotit; iksivautaᴋsuit kinguvârênit kinguvârênut ipok.

²⁰ Sôk puigutsainarpitigût, allarlutalo taimâk akkunertigijomîk?

²¹ Utertilauktigut ilingnut, Nâlegak utersimaniarpogut tagva; uvluvullo natângortilaukit sorlo itsarsoarme.

²² Ajaktormarikpaptigulle, angijomik ningarvigivaptigullo.