Jeremiab Ogguarutigijangit 4 - Labrador Inuttitut Heritage Bible

¹ Kappe! Golde ᴋeblerungnaidlarpok! Goldesiak ilaᴋangitok takominaitungorpok! Katimaviksûb ujaraktangit egitauvut apᴋosineâluit ilûnatik issungine.

² Zionib erningit pivianartut, goldetut ilaᴋangitotut ivlernartigivut, issumagijauvut imektautiktitut maggaujûtitut, maggaliortib aggangita sanamajangititut!

³ Terrianiangojârtut iviangitik mannimavait, piaratik amâmaktilugit: inuᴋotimale paninga takopsoajuitungorsimavoᴋ, sorlo tingmiaksuit strausit inuᴋangitome.

⁴ Amâmaktub oᴋanga ᴋêlernermut nipingalerpok ᴋilanganut; sorusiarsuit ᴋennuvut nerᴋiksamik, aituijoᴋangilarle taimaitomik tâpkonunga.

⁵ Mamaktunik nerrisôngolauktut perlilerput apᴋosineâlungne; aupaloriktomullo imujaumalauktut mâna uningârput atsivingnik.

⁶ Inuᴋotima paningata idluituliningata pidlartauninga anginersaungmat Sôdômab idluituliningata pidlartauninganit, tâmna tagvainârtomik asserortaulaungmat, aggangnulle annaujaungilak.

⁷ Gudemut angertaumajungit apumit ivsornainersaulaukput, imungmit ᴋaᴋortauluarput, tautumikut aupalungnersaulaukput ujaratsianit pivianartoᴋutaujunit, ᴋalliningit sorlo ujarait ᴋebleriktut.

⁸ Mânale tautungit ᴋernernersauvut aumâlungnit; ilitarnalungilat apᴋosineâlungne; amingit nipingavut sauninginut; pannerput, ᴋejuktut idlutik.

⁹ Saviksoarmut toᴋotaumajut piloriluarput ᴋângnermut toᴋosimajunit; tâpkoa sallulerpaliangmatta, kapijaumajutitut sorlo, ajoksarnermut perorsêviub perorsianginik.

¹⁰ Arnat nagligosungnerpaujut nangminek aggangmingnut ᴋitorngatik igavait; tâpkoa nerᴋiksatuarilaukpait inuᴋotima paningata asserortauningane.

¹¹ Nâlekab ningaumajârnine nâmaksitilaukpâ, ningarnersoane kovilaukpâ; Zionemelo ikitsivok ikomamik nungutsijomik tungavinginik.

¹² Nunaᴋsûb ataningit silaksoarmiullônet okpilaungilat akkerartortit ômigijillo itârniarmatta Jerusalemib upkoaksoangitigut.

¹³ Nelautaijungita idluituliningit ajoᴋertuijungitalo nâmangituliningit, kovisilauktut idluartut aunginik iglugasaksuit iluane, pivlugit taimailingavok.

¹⁴ Tâpkoa arvertarput apᴋosineâlungne tautungitutitut, aungmut salumaidlarput, inuit aktuijungnangilallônêt annorânginik.

¹⁵ ᴋaigarsugvigivait: Pêritse, ivjornartose; pêritse, pêritse, aktorniaratigut! ᴋemâgamik avâlaklutiglo, oᴋartoᴋarpok nelojut akorngane: Tamâne nunaᴋartuksaungilat.

¹⁶ Nâlekab kênangata siamangatilaukpait, kamagijomairpaillo; opigosulaungimatta ajoᴋertuijunik, ilaliulaungimattalo angajoᴋaujunik.

¹⁷ Ijivut takpêlerput sulle ᴋenernermut ikajortiksaptingnik sulingitunik; ᴋenerniptingne ᴋenitsainalaukpogut inôᴋatigêksoarnik piuliklerungnangitunik.

¹⁸ Tupjarpâtigut, arvertartailitipâtigullo apᴋosineâluptingne; nâniksavut ᴋanipok; uvluvut nâmavut; naggatiksavut tikisimangmat.

¹⁹ Udlartivut sukalinersaulaukput nektoralingnit ᴋilaub ikianganêtunit; tupjalaukpâtigut ᴋakᴋaksoarne, terlialaukpâtigullo inuᴋajuitome.

²⁰ Kingapta anerningat, Nâlekab mingoartanga, pijaulaukpok itersaliangine, tâmna pivlugo oᴋalaukpogut: Tâpsoma taggaliningane inôlârpogut inôᴋatigêksuit akorngane.

²¹ Erᴋiertorit ᴋuviasudlarlutillo, igvit Edomib paninga, nunaᴋartotit nuname Uzeme; ᴋajûtak ilingnuttauk pijomârpok; tallalârpotit, ussingatilârpotillo nangminernik.

²² Idluitulinivît pidlartauninga nâvok, Zionib pania; aularutijungnainiarpâtit; nelipsaijomârpok idluitulinernik, Edomib pania; ajornitillo sakᴋertitsomârpait.