Jeremiab Ogguarutigijangit 3 - Labrador Inuttitut Heritage Bible

¹ Uvangauvunga angut kapiasuktitaujok ningaumajârningata issaᴋautinganut.

² Tessiolaukpânga arvertartilungalo tâksoarme ᴋaumaneᴋangitome.

³ Uvamnut aggane sangutiᴋatarpait akulaitomik uvlok nâvlugo.

⁴ Uviniga amigalo iperᴋakᴋotipâk; saunikka navgorpait.

⁵ Karmaliorvigivânga ilumalungalo sungarnitomut ânilakteradlarnermullo.

⁶ Inôtipânga innene tâktoksôjune, ipkotitunak akunit toᴋungajutitut.

⁷ Avaloᴋsoarnut ilumavânga anijungnarᴋonanga; ᴋelaumgujakkalo oᴋumaitipait.

⁸ Ilâ, ᴋaigarsukkuma ikajortaujomavlunga, tuksiarnera upkoarutivâ.

⁹ Apᴋutiksakka ᴋarmaliorvigivait ujarᴋanik sanamajunik, pisugviksakkalo niungatipait.

¹⁰ Uvamnut ilingavok aklaktut utaᴋijotut, loevetut ijersimajotut.

¹¹ Apᴋotikka tamarnartipait, aliktorpângalo suksaujungnaitilungalo.

¹² Pitiksine ᴋeluvâ, orlertorpângalo ᴋargjuminut.

¹³ ᴋargjuᴋautime pitangit itertipait taᴋtumnut.

¹⁴ Mitautiksangorpunga inôᴋatimnut tamainut, imgertârutigivângalo uvlok nâvlugo.

¹⁵ Ilumerpânga sungarmik, aᴋeartortipângalo perortunut mamaidlartunut.

¹⁶ Kigutikka serᴋomipait ujarakullungnut, argjanullo sauvânga.

¹⁷ Tarniga nûtilaukpat ulapirᴋsaumit; piloringnerlo puigorpara.

¹⁸ Oᴋarpungalo: Pitsartunera nunguvok, neriungneralo Nâlekamik.

¹⁹ Erᴋalaukit kapiasungnera patanganeralo, perortullo mamaidlartut sungarlo.

²⁰ Tarnima erᴋarpait sulle, nênertaudlarpungalo ilumne.

²¹ Tamanna ômamiutarivara, tamanna pivlugo nerriungneᴋarpunga sulle.

²² Nâlekab nâpkiningningit pingmatta keta nungutaumarilungilagut, ilapsugosungningit sorairlungimatta.

²³ Uvlât tamaita nutaulerput; nelâgôrnît angijôdlarpok.

²⁴ Nâlegak piksarsiarivara, tarniga oᴋarpok; tamanna pivlugo nerriugvigivara.

²⁵ Nâlegak avâgosudlarpok utaᴋijiminik, tarnenik ᴋenertunik tâpsominga.

²⁶ Idluadlarpok inuk nerriungmat, ᴋenuesârlunelo utaᴋingmat Nâlekab piuliklerninganik.

²⁷ Idluadlarpok inûb nangmaut nangmarpago inôsungnermine.

²⁸ Inutôvlune nippeᴋaranelo iksivalerle, tâpsoma ilingmago tâpsomunga.

²⁹ Kanine pitiliuk sanningnut, nerriugviksarsiniarmangârme.

³⁰ Ulluane manilerliuk erᴋsartiminut; nâmaktomiglo mitautigilerle nangminerminik.

³¹ Nâlegak ajaktuiniangimat soraijuitomik.

³² Kiksartitsigaloarame, ilapsugosudlarniarpok nâpkigosungnime unuktoᴋsôningit maliklugit.

³³ ᴋuviasumutuinak inuit ᴋitorngangit kapiasuktilunginamigit kiksartilugillônêt.

³⁴ Nuname parngnanairsortaujut tamaita itikame atânut serᴋomilugit,

³⁵ Inûb idluarsartaujutiksanga mumiklugo poktonerpângojûb kênangata sângane,

³⁶ Inûb pitjutinga asserorlugo, Nâlekab ᴋuviagingilait.

³⁷ Kina oᴋarungnarᴋâ nelautsiniartomik, Nâlegak perᴋojingipat tamattomingâ?

³⁸ Ajortorlo ajungitorlo anilungilâk poktonerpângojûb ᴋaninganît?

³⁹ Sôk inuk inôvlune ârusukâ? Inuk inôjok ajornerminê?

⁴⁰ Apᴋotigijavut nautsertorlavut ôktolugillo, sâgiarmilutalo Nâlekamut.

⁴¹ Omativut aggavullo ᴋongmuartilavut Gudemut ᴋilangmêtomut.

⁴² Uvagut tappalaukpogut akkerartorlutalo; igvit issumagijungnainilungilatit.

⁴³ Ningarnermut uliklutit nangminernik malilaukpaptigut, toᴋotsilaukpotit takopsoalaungilatillo.

⁴⁴ Nuvujamut ulilaukpotit nangminernik, ᴋenunivut apᴋotiksaᴋarᴋonago.

⁴⁵ Aktarnerlukkungortilaukpaptigut maᴋojungnartungortilutalo inôᴋatigêksuit akorngane.

⁴⁶ Omigijipta ilûnatik ᴋanitik aitadlarpait uvaptingnut.

⁴⁷ Erᴋsinerub itersâlublo tikipâtigut, asseroinerub nungutsinerublo.

⁴⁸ Kugvit kôkput ijîmnit, inôᴋatima paningata nungutauninga pivlugo.

⁴⁹ Ijîkka kôgênarpuk nokᴋaratik, sorairviksaᴋanginamik,

⁵⁰ Nâlegak takosarᴋârtinago tautuᴋârtinagolo ᴋilangmit.

⁵¹ Ijima tarniga kiksartipâ iglugasaksoaᴋotima paningit ilûnaita pivlugit.

⁵² Akkerama unangmidlalaukpânga angijomik tingmiatut, pitjuteᴋaratigle.

⁵³ Inôsera kipivât iglome itersâlungmêtome, ujaraᴋsoarlo pitilugo ᴋâmnut.

⁵⁴ Imît niaᴋora ullilaukpât; oᴋalaukpunga: Kipijauvunga.

⁵⁵ Attît ᴋaigarsugvigilaukpara, Nâlegak, itersâlub itinerpânganit.

⁵⁶ Nippiga tusalaukpat; siutît simingniarnagotôk anersauminimnut nipliadlarnimnullo.

⁵⁷ ᴋanitamnôrlaukpotit uvlorme ᴋaigarsugvigijamne ilingnut; oᴋalaukpotit: Sivôraniarnak.

⁵⁸ Nâlegak, tarnima pitjutingit kamagilaukpatit, igvit, inôsera piulivat.

⁵⁹ Nâlegak, takonâlaukpotit idluitulivionimnik, pitjutiga idluarsalauruk.

⁶⁰ Takovotit akkiniarutigijanginik uvamnik kajusijutigijanginiglo tamainik uvanga pivlunga.

⁶¹ Tusalaukpotit mitauteᴋarninginik, Nâlegak, kajusijutigijanginiglo uvanga pivlunga.

⁶² Akkerartortima ᴋangasinânginik, issumertûtinginiglo pivlunga uvlok nâvlugo.

⁶³ Kamalaurit iksivaninginik nikovininginiglo, uvanga imgitârutigivânga.

⁶⁴ Akkiniarvigilârpatit, Nâlegak, aggangita sulijangit maliklugit.

⁶⁵ Tunitjivigilârpatit ômatingita tâlutaksanginik, ôminarsiᴋojinernik pilerlit.

⁶⁶ Udlalârpatit ningarnerme, ᴋilaublo Nâlekab pingata atânit pêjarlugit.