Jeremiab Ogguarutigijangit 2 - Labrador Inuttitut Heritage Bible

¹ Sinaungamek! Nâlekab Zionib paninga uliksimangmago ningaumajârnime nuvujanganut; Israêlib pinnarnarninga egilaukpâ ᴋilangmit nunamut, erᴋaringilâlo itikame ikogganga ningaumajârnime uvlungane.

² Nâlekab nâpkiningneᴋarane Jâkob inigijangit tamaita êvait; ningaumajârnermine Judab paningata iglungit sôngojut serᴋomipait, nunamut oggotilugit; atanioviglo angajoᴋâksoangillo opinarungnaitipait.

³ Ningarnerme ilungertortome Israêlib nakjua tamât kipivâ; aggane talerpît issagungnaipait ômisuktit sânginit; Jâkolo ikipâ, sorlo ikomaksoatut avatâne siamartotut.

⁴ Omisuktotut pitiksine ᴋeluvâ, nangerporlo aggane talerpît issaklugit akkerartortotut, takominartut tamaita toᴋodlugit; ningarninelo kovivâ ikomatut Zionib paningata tuppinganut.

⁵ Nâlegak ômisuktotut ilingavok, Israêl êvâ; igloᴋsoangit tamaita êvait, iglungillo sôngojut asserorlugit; kiksarnartullo ogguarnartullo unuksitipait Judab paningane.

⁶ Aksorotjilune avaloksoanga pêjarpâ, sorlo perorsêvingmut kisiane ilingajotut ilingangmat; katimaviksoangalo asserorpâ; Nâlekab katimaniksat opinartut sabbatillo puigortautipait Zioneme, ningaumajârnimelo ilungertorningane atanerlo ajoᴋertuijorlo naggogivâk.

⁷ Nâlekab tunerguservinga egipâ, katimaviksoangalo arriupâ, igloksoangita ᴋarmangit tunivait ômisuktit agganginut; tâpkoalo pervalungneᴋartitsivut Nâlekab iglungane, sorlo katimaniksab opinartub uvlungane.

⁸ Nâlegak kajusilaukpok Zionib paningata ᴋarmangit asseroromavlugit; noᴋakservalaut issivipâ, agganelo issagungnailungilait asserorsainermit; avaluksoarle ᴋarmaksoarlo ogguartipak; nukkingêrutiᴋatigêkpuglo.

⁹ Upkoaksoangit kivivut nunamut; tâpsoma itârtaugêkutingit asserorpait serᴋomilugillo; ataninga angajoᴋâksoangillo inôᴋatigêksuit perᴋojaᴋangitut akornganêput; ila, nelautaijungit takotitjutesilungilat Nâlekamit.

¹⁰ Zionib paningata angajoᴋângit iksivavut nuname nipangerdlutik; egitsivut sanningnik niaᴋomingnut; pôᴋsajaniglo attivut: Jerusalemib uigasungit niaᴋotik okungatipait nunamut.

¹¹ Ijîkka ᴋugveᴋarungnaipuk, ergavikka kapiasuktitauvut, tinguga nunamut kovijauvok, inôᴋatima paningata asserortauninga pivlugo; sorusiarsuit amâmaktullo ᴋaujimangermatta iglugasaksuit apᴋosineâlungine.

¹² Anânamingnut oᴋarput: Nerᴋiksamiktôk, vainemiglo! ᴋaujimajungnairamik ikilersimajutitut iglugasaksuit apᴋosineâlungine, tarningêramiglo sarliartauvlutik anânamingnut.

¹³ Sunamik kigligiutjuteᴋartuksauvingâ ilingnût? Sunamut adsiutitaksarivagît, igvit, Jerusalemib paningâ? Suna adseᴋartok ilingnut oᴋautigijaksarivigô, manigoiᴋovlunga ilingnik, Zionib paninga uigasôjotît? Asserorsimanît imarbiktut angitigingmat; kia inûlijungnarpâtît?

¹⁴ Pivlutit nelautaijoᴋotitit takolaukput takotitjutit tukkeᴋangitut atutsangitullo pivlugit, nelonaijailungilalle idluitulinernik, utertitaujungnarᴋovlutit aularutijaunernit; nelonaijaivigivâtille takotitjutinik oᴋautsiniglo silainartunik ajaktortaujutigijarnik.

¹⁵ ᴋângertut ilûnatik aggatik pattaᴋatarpait pivlutit; kôkoviarput ileᴋatamarlutiglo Jerusalemib paninga pivlugo, oᴋarlutik: Tamakkoa iglugasaksoangovât inuit taijanginik: tamainit takoranidlarnerpaujunik, nunab ilûnât ᴋuviagijanginîk?

¹⁶ Omigijivît ilûnatik aitangavigivâtit; kôkoviarvigivâtit aglerularpullo; oᴋarput: Elaukpavut ila; tamanna tagga uvlok utaᴋilauktavut, tikivigivavut, takovavut.

¹⁷ Nâlekab kajusijutigilauktane piniarpâ; oᴋausine, itsaksoarme oᴋautigilauktane, nâmaksitipâ; asseroivok naiperᴋutigosulugane; ômisuktorlo ᴋuviasuktilaukpâ pivlutit, ômigijivît nakjunga ᴋagvertipâ.

¹⁸ Judit ômatingit nipliadlarput Nâlekamut; Zionib paningata ᴋarmanga, ᴋugvit korlorlit kôktut uvlôtilugo unnuarmelo; nokᴋarniarnak; ijivît takonârtinga sorainiarane.

¹⁹ Makigit, nipliadlarit unnuarme, pigârvît neliutilerningine; ômatît koviuk imektut Nâlekab kênangata sângane; aggaktit ᴋongmuartikit tâpsomunga sorusearsuvit, apᴋosineâluit ilûnatik issungine perlertut, inôsingit pivlugit.

²⁰ Takosalaurit, Nâlegak, ulernairsilutillo kina taimailiorvigimangângne! Arnat erniarijatik nerrijaksarivagît, nutarârsuit ᴋiggertagalâktitaujut aggangnût? Ajoᴋertuijok nelautaijorlo toᴋotaujuksauvât Nâlekab katimaviksoanganê?

²¹ Inôsuktut inuᴋoartullo nelavut nuname apᴋosineâlungne, uigasukka nullêtukkalo oggotitaumavut saviksoarmut; toᴋosimavatit ningaumajârnivît uvlungane; toᴋorarpatit naiperᴋutigo sungneᴋarnak.

²² Avatimit kapiagijakka ᴋaiᴋolaukpatit, sorlo uvloᴋsiorviub katimaniksanganut, ᴋemâjoᴋalaungilarlo amiakoᴋalaungilarlo Nâlekab ningaumajârningata uvlungane; ᴋiggertagalâktilauktakka peroijakkalo ômigijima nungupait.