Kolossamiunut 4 - Labrador Inuttitut Heritage Bible

ᴋaiblainernik tuksiarᴋojijunik. Salutitsinermik.

¹ Nâlegaujose ilipse, kivgase nâmaktomik idluartomiglo piniarsigik; ilipsetauk nâlegaᴋarapse ᴋilangme ᴋaujilerdluse.

² Soᴋosijuidluse tuksiaritse, taimailiorluselo pigâritse ᴋujalivluse.

³ Taimaktauk pivluta tuksiarmititse, Gûde upkuamik angmailerᴋovlugo oᴋautsinut, Kristûsib nalonarnersoanga oᴋautigijauᴋovlugo; tamanna pivlugo ᴋelaksugauvungatauk;

⁴ Oᴋâlajungnarᴋovlunga, sorlo pijuksaugama.

⁵ Silatujomik taipkoa ilagingitase inôᴋatigisigik; atutsiarlugolo neliutok.

⁶ Tussarominartunik oᴋauseᴋatsainaritse tarêrsimajunik; ilûnainut kiojariaᴋarnipsingnik nalunginiarᴋovluse.

⁷ Uvanga ᴋanoênimnik unipkautijomârpâse tamainik Tiᴋikusib, ᴋatangutib naglingnartub, nertornarlunelo kivgaujub kivgauᴋatauvlune Nâlekame.

⁸ Tamanna pivlugo tâmna tilivara ilipsingnut, nautsertorᴋovlugo, ᴋanok ilingangmangâpse, ômatise nakoksitilugit.

⁹ Ilagilugo nertornartok naglingnartorlo Onesimuse, ilapse ilangat; tâpkoa unipkautiniarpâse ovanêtut ᴋanoeninginik tamainik,

¹⁰ Aristarᴋusib ᴋelaksorsimaᴋatima salutipâse; Markusiblo, Barnabasib ujorungata; tâmna pivlugo perᴋojaulerêrpose piniaraksapsingnik; tikipase ilaliorsiuk.

¹¹ Jêsusiblo Justusemik atipsâliub; tâpkoa kipimajut ilangita. Tâpkoangênait piniaᴋatigivakka Gûdib nâlegauvinga pivlugo, tâpkoa manigorutigivakka.

¹² Salutipâse Epafrasib, ilapse ilangata, Kristûsib kivgangata; tâmna ilungertordlune tuksiatsainarpoᴋ pivluse, nâmakserᴋovluse aulajungnangerdluse ilumertauᴋovluselo Gûdib pijomajanginik tamainik.

¹³ Tâpsominga kigligiutsivunga, angijomik ilungertûtigingmase, Laodizêamêtullo Hiarapolisemêtullo.

¹⁴ Lukasib âniasiortib naglingnartub salutipâse; Dêmasiblo.

¹⁵ ᴋatangutigêt Laodizêamêtut salutisigik; Nimfaselo ilagêllo tâpsoma iglunganêtut.

¹⁶ Aglaillo makkoa atuartauᴋârpatta ilipsingne, Laodizêamêtunuttauk ilagêktunut atuartautingmisigik; ilipsetauk Laodizêamit pijut atuarisigik.

¹⁷ Arᴋippuselo oᴋarvigisiuk: Piniaraksat Nâlekamut perᴋojaumajutigijat kamagitsiaruk, nâmaksitiniarlugo.

¹⁸ Salutitsivunga nangminek aglaklunga uvanga Pauluse. ᴋelaksorsimajunga issumaginiarsinga. Saimanerub ilagilise Amen. Kolossamiunut makkoa aglaktaumavut Rômame, Tiᴋikusib Onesimusiblo neksartangit.