Kolossamiunut 3 - Labrador Inuttitut Heritage Bible

Maligaksanik sunatuinarnik ilunainut, aipalingnullo, ᴋitornganullo, angajoᴋânullo, kivganullo ilingajunik.

¹ Kristûse tagva makeᴋatigimagupsiuk, pânêtut piniarsigik, Kristûse takpânêngmat, Gûdib talerpiata tungâne iksivavlune.

² Pânêtut pinasuarsigik, nunamêtut pinagit.

³ Toᴋomagapse, inôsiselo Kristûse ilagivlugo ijersimavoᴋ Gûdeme.

⁴ Kristûsele inôtigijase sakᴋerpat, ilipsetauk sakᴋeᴋatigijomârivase pinnarnartoksôjome.

⁵ Tamanna pivlugo avatise nunamêtut toᴋoniarsigik, imaitut: assiniarnek, maᴋojungnartulinek, kangunartomik êgiangusâdlarnek, ikligunek, pijomatudlarnerlo, Gûdiungitunik kivgartorniojok tamanna.

⁶ Taimaitut pivlugit Gûdib ningausinga okpinginerub ᴋitornganginut pivok.

⁷ Tamakkoa ilipsetauk atulaukpase sivorngane, taipkonane inôtiluse.

⁸ Mânale ilipsetauk iperarsigik makkoa tamaita, ningarnerlo, kassênerlo, ômisungnerlo, mitauteᴋarnerlo, oᴋausilungnerlo ᴋanipsingnit.

⁹ Sagloᴋitsiniarase ilapsingnik; inutoᴋak ilusingillo iperarsigik.

¹⁰ Inuktârle atilersiuk, nutângolertok ilisimaneᴋartuksauvlune, pingortitine adsigivlugo.

¹¹ Tamattomane pitsangilat Grîᴋillo, Jûdillo, kipimajullo, kipimangitullo, Grîᴋiungitullo, Skitillo, kivgallo, kivgaungitullo: Kristûsele tamaitaksoarnik tamaine pitôvok.

¹² Taimaimat, Gûdub anerimajangititut ivsornaitutitullo, naglingnartutitullo, atinialeritse ômamut nâpkigosungnermik, inôtsiarnermiglo, piojoringinermiglo, ᴋenuênermiglo, kamangitsertornermiglo;

¹³ Ilipsingnut ilannârêkluse, issumagijungnaitigêgitse, nalise erᴋartuitiksaᴋarune assiminut; sorlo Kristûsib issumagijungnaivigilaungmase, taimaktauk ilipse pititse.

¹⁴ Tamakkoale tamaita ᴋângitigut atiniarsiuk naglingnek, tagva nâmaksinerub ᴋelaksûtâ.

¹⁵ Ullapirsaullo Gûdemit pijok ataniotênarle ômatipsingne, tamattomunga ᴋaiᴋojaumagivose atautsemik timeoᴋovluse ᴋujalivigitselo.

¹⁶ Kristûsib oᴋausingit ineᴋartisigik angijomik ilipsingne, ilisimanartunut tamainut (ilingavluse); ajoᴋertortigêgitse erᴋaititsijigêkluselo imgerutinut nertordlerutiksanut, tuksiarutsinullo anernelingnut, imgerluselo tussarnertunut ômatipsigut tuksiarluse Nâlekamut.

¹⁷ Tamaitalo piniarnise, oᴋarangapselônêt piniarangapselônêt, ilûnaita piniarsigik Nâlekab Jêsusib atingane, ᴋujalivluselo Gûdemik Atâtamiglo tâpsomûna.

¹⁸ Uilit ilipse, uise nâleksigik Nâlekame, taimâk pijariaᴋarmat.

¹⁹ Nulialit ilipse, nuliase nagligisigik, kassêniaraselo tâpkonunga.

²⁰ Sorutsit ilipse, angajoᴋâse ilûnainik nâleksigik Nâlekab tamanna idluaringmago.

²¹ Atâtaujose ilipse, ᴋitorngase ningaksarniarasigik, ilerasuluarᴋonagit.

²² Kivgaujose ilipse, nâlegase nunamêtut ilûnainik nâleksigik; kivgartornek inuit takoane, inungnut idluarijaujomavluse, pinago, ômamulle issumalingasuerdluse, Gûde nâleklugo.

²³ Tamaitalo piniarnise ômamut piniarsigik, sorlo Nâlekamut, inungnu-ungitok.

²⁴ ᴋaujimavluselo kingormgutijaksamik akkilertaujomârapse Nâlekamut; Nâlegak Kristûse kivgartorapsiuk.

²⁵ Idluitulijorle pititsiviojomârpok idluitulinine akkiniarlugo; inûb kinausinga kamagijaungimat.