Kolossamiunut 2 - Labrador Inuttitut Heritage Bible

Pauluse ᴋaiblaivok, Jêsusemik inôjutetôjomik iperaiᴋonagit, tamartitauᴋonagillo ajoᴋertuijunut nalangaitunut.

¹ Nalojungnairᴋovapsele ᴋanok angitigijomik issumajârutigigapse, Laodizêamiullo, ilûnaitalo tautumnik uvinikut takolaungitut.

² Omatingit ᴋaiblartauᴋovlugit ᴋelaksortigêrᴋovlugillo naglingnikut, akluilerᴋovlugillo ilisimajutiksanik tamainik nakimarninangitunik, Gûdemik Atâtamiglo Kristûsemiglo nalonartok illitarilerdlugo.

³ Perᴋutit ilisimajutiksat ilitarsijutiksallo tamaita tâpsomane ijersimangmatta.

⁴ Taimaglo oᴋauseᴋarpunga, oᴋâlanermut kajungersarnartomut uivêrijauᴋonase kimut.

⁵ Timipkut apsimagalloardlunga anernipkulle najorpapse, ᴋuviasuklunga, malugosukama idluarnipsingnik okpernipsingniglo soᴋosijuitomik Kristûsemut.

⁶ Tagva sorlo Kristûse Jêsuse ilaliulaurapsiuk, arvertarniaritse tâpsomane.

⁷ Amâtsiortaulerluselo igloliangomaleritse tâpsomane, okpernerme aulajungnangerdluse, sorlo ajoᴋertortaumagapse, angijomiglo tamattominga ᴋujalivigitse.

⁸ Udjertoritse, aᴋsârtauᴋonase ilisimajôjarnermut tamartitsinermullo tukkeᴋangitomut, inuit ajoᴋertûsetuinanginit, silaksûblo inungita perᴋojinikullunginit, Kristûsib ajoᴋertûsinganiungitok pijomut.

⁹ Gûdionek ilûnane tâpsomanêmaringmat timeᴋardlune.

¹⁰ Ilipselo nâmaksivose tâpsomane, nâlegauvîllo pitsartunerillo ilûnamatsiatik niaᴋorijangane.

¹¹ Tâpsomanetauk kipimavose, kipijaunermut aggangnu-ungitok, time ajortolik uviningmêtok pêjarapsiuk, tagva Kristûsib kipititsininganut;

¹² Ilijartortauᴋatigimagapsiuk baptijutikut, tâpsomanetauk makeᴋataumagivose okpernermut, Gûdib pititsininganut, (Kristûsemik) toᴋungajunit tupaktitsijub.

¹³ Ilipsetauk ajornipsingne uvinipselo kipimanginingane toᴋungajose, ômartilaukpâse tâmna ilagilugo, ajornise tamaita issumagijungnairamigit,

¹⁴ Aglaillo pivluta pijut iluserᴋortoᴋojijut, uvaptingnik erᴋartuijut atorungnaitilugit pêjalaukpait, saningajolingmut kikiaktoramigit.

¹⁵ Nâlegauvîllo pitsartujoksuillo sakkuêlaukpait, sakᴋertilugillo ilûnatik takoane, ajugaujotit aulartinamigit nangminermigut.

¹⁶ Taimaimat erᴋartortaujariaᴋatsangilase kimut nerᴋiksarlônêt imiksarlônêt pivlugik, uvloksiorvîllônêt, takᴋêlaillônêt, Sabatillônêt pivlugit.

¹⁷ Tamakkoa tachatuinaungmatta tikituksamut; timele nangminek Kristûsemêpok.

¹⁸ Torâraksapsingnit nûtitauniarase kimut, issumaminik sakᴋertomut manigotijôjârlune, Engelitullo ajungitôjârlune; taimaitomik takolaungigalloarame, sulinanelo pimariuterpok uviningme issumangagut;

¹⁹ Ataviginago niaᴋok; tâpsomangat time iluitok navgoanut nukkingnullo ikajortauvok nukkeᴋarlerdlune, katitaularmelo, aglivalliavlunelo Gûdib aglivalliatitsininganut.

²⁰ Tagva Kristûse ilagivlugo silaksûb inungita ilusioᴋojanginit, toᴋolerapse, sôk oᴋumaititaulerpisê ilusioᴋojaujunut, sorlo silaksoarme sulle inônajarupsetût?

²¹ Oᴋartut: Tamanna aktorniarnago pît ôngniarnagolônêt, tiguniarnagolônêt.

²² Tamakkoa tamaita atortaukpatta nunguniarput, inuit perᴋovait ajoᴋertûserilaitalo;

²³ Taimaitut ilisimajôjârput, issumamingnik kivgartoromagamik manigotijôjârlutik, timelo ivlerinago pigamik, issumaginagolo uviniub pijariaᴋarninga.