Kolossamiunut 1 - Labrador Inuttitut Heritage Bible

Paulusib ᴋujalininganik Kolossamiut pivlugit, tuksiarutjininganiglo. Kristûsib oᴋautsillo tussarnertut ânanaunersoanganik, Paulusib ânianginuttauk kivgartorninganullo sakᴋertitaujomik

¹ Pauluse, Jêsusib Kristûsib Apostelinga, Gûdib pijomajanganut, ᴋatangullo Timôteuse, (aglakpoguk)

² Kolossamiunut ivjornaitunut, okpertunullo ᴋatangutigênut Kristûsemêtunut. Gûdib Atâtapta, Nâlekablo Jêsusib Kristûsib saimarsautingata ullapirsautingatalo ilagilisetôk!

³ Gûde Nâlegaptalo Jêsusib Kristûsib Atâtanga ᴋujagidlarpavut, tuksiatsainarpogullo pivluse,

⁴ Okpernipsingnik Kristûse Jêsusemut, nagligosungnermiglo ivjornaitunut tamainut, tussaumagapta;

⁵ Nerriugijaksak pivlugo, ᴋomergutaumajok ilipsingnut piksauvlune ᴋilangme, sivorngagut tussalauktase oᴋautsitigut tussarnertutigut mikseᴋârtutigut.

⁶ Tamakkoa ilipsingnut tikisimangmatta, sorlotauk silaksoarmiunut tamainut, kibligutivlutiglo, ilupsingnetauk uvlormit taimangat tussaumalaurapse tamakkoninga Gûdiblo saimarsautâ nalâgut illitarivlugo.

⁷ Taimâktauk ajoᴋertortauvose nagliktaptingnut Epafrasemut kivgartoᴋatiptingnut; tâmna Kristûsemik nertornarlune kivgartorpok pivluse,

⁸ Uvaptingnik ᴋaujititsilaungmijok naglingnipsingnik Anernermit pijomik.

⁹ Tamanna pivlugo uvaguttauk uvlormit taimangat tussaumalaurapta tamattominga, soraijunata tuksiarpogut pivluse, ᴋenuvlutalo, ilumertaukovluse ilitarsinermik pijomajanganik, ilisimavalliavluselo silatuvalliaᴋovluse taimainik anernilingnik.

¹⁰ Idluartomik arvertarᴋovluse Nâlekamut ᴋuviagijauvluse ilûnâne, pivalliarᴋovluselo ajungitulinerne tamaine;

¹¹ Ilitarsivalliarᴋovluselo Gûdemik nakoksijauᴋovluselo pitsartunernut illûnainut, tâpsoma pitsartuninganut ânanaujomut, ᴋenuersârluse, kamangitsertorluselo tamaine ᴋuviasukluse;

¹² Atâtalo ᴋujagiviklugo, pijungnartilaungmatigut ivsornaitut kingormgujeᴋatigivlugit ᴋaumajome;

¹³ Piulilaungmatigullo tâktub pitsartuninganit, nuktertilutalo Ernerme erdligijame nâlegauvinganut.

¹⁴ Tâpsomane piulijauviksaᴋarapta aunganut, tamadja ajornernit issumagijaujungnainermik.

¹⁵ Tâmna Gûdib takuksaungitub adsiluanga, erniangoᴋârtok pingortitaumajunit ilûnainit.

¹⁶ Tâpsomûna ilûnaita pingortitaungmatta, ᴋilangmêtullo nunamêtullo, takuksaujullo takuksaungitullo, iksivautaksuillo, nâlegauvîllo ataniotinerillo, pitsartujoᴋsuillo; ilûnamatsiatik pingortitaulaukput tâpsomûna tâpsomungalo.

¹⁷ Tamaitaᴋsuillo perᴋârtinagit tâmna ilaukpok, tamaitaksuillo tâpsomunga pairijauvut.

¹⁸ Tâmnalo niaᴋorivâ timib, tamadja ilagêt; tâmna pigiarniovlune erniarngoᴋârtôvok toᴋungajunit, nâlegauᴋovlugo tamainit sivorliovlune.

¹⁹ (Atâtab) idluaringmago pitaᴋaloringnek ilûnane tâpsomanêrᴋovlugo.

²⁰ Tâpsomûnalo ilûnaita ullapᴋosertauᴋovlugit ingminut nunametullo ᴋilangmêtullo, saningajolingme aunganut, saimarsaijomavlune nangminerminut.

²¹ Ilipsetauk, sivorngagut takorngartaulauktose akkerartortiolapselo issumapsigut idluitulinerme;

²² Mânale ullapᴋosersimavase timime uviningata toᴋunganut, ivsornaititsomavluse pidlaraksauᴋonase passijaksauᴋonaselo tâpsoma sângane.

²³ Okpernerme tunganilivluse sôngolerupse sorairase, aulataililuselo oᴋautsit tussarnertut nerriugijauᴋojangine, tussaumajase, oᴋautigijaujut pingortisimajunut tamainut ᴋilaub atânêtunut; tamakkonunga uvanga Pauluse kivgaliarimajunga.

²⁴ Mâna ᴋuviasukpunga kappianartome atortamne pivluse; kappianarnerillo Kristûseme sulle pijariaᴋartut uvinimne nâmaksitiniarpakka timinga pivlugo, tagva ilagêt pivlugit;

²⁵ Tâpkonunga kivgaliarimajunga, Gûdib kivgartortitsininganut, nâmaktomik Gûdib oᴋausingit uvapkut oᴋâlatigijauᴋovlugit akunapsingne;

²⁶ Tamadsa nalonartok imna silaksûb pigiarninganit, kinguvângoᴋatigênullo pijoᴋalauktunut angigutjutaulauktok, mânale nalonairtisimavok ivjornaitoᴋotinginut.

²⁷ Gûdib nelonaijaivigijomangmagit nelonartub tamattoma inornadlarninganik nelojune, tâgva Kristûsemik ilupsingnêtomik, ânanâvaksônermik nerriugutiksaujomik.

²⁸ Tâmna oᴋautigivavut, inuit tamaita ᴋaiblarlugit, ajoᴋertorlugillo inuit tamaita, silatunivut ilûnât atorlugo; inuit ilûnatik atunit nâmaksitiniaromavlugit Kristûse Jêsuseme.

²⁹ Tamattominga sananasuarpungatauk ilungertordlunga, ilupkut pitsartutisijok pitsartutigilugo.