Jûdasib 1 - Labrador Inuttitut Heritage Bible

Uivêriklertut ulloreagijaksauninginik. Okpernerme soᴋᴋosijuerᴋojaunermik.

¹ Jûdase, Jêsusib Kristûsib kivganga Jakôbusiblo nukanga (aglaᴋpunga) ᴋairᴋojaumajunut, ivjornaititaumajunut Gûdemut Atâtamut, saputijaumajunut Jêsuse Kristûsemut.

² Gûdib angijomik nâpkigilise, ullapᴋoserluselo nagligilisetôᴋ.

³ Erdlingnartose, aglagvigigapse piulijauᴋatigêngniptingnik, pijariaᴋarasugivara aglangnut makkonunga kaiblarluse, okperneᴋ ivjornaitunut pititaumajoᴋ serngnigivlugo perᴋovluse.

⁴ Inuit illangit pingitsertorlutik illaungmatta, taipkoa pivlugit sivunivaᴋsoangagut aglaksimavoᴋ, tamattomûna pidlartaujomârmatta; Gûdeᴋaromangitut pivakka, Gûdipta saimarsautâ atornerlukamitsuk kangunartoᴋsoarmut, misiarutigilugolo Nâlegavitôjoᴋ Gûde Nâlegavut Jêsuse Kristûse.

⁵ Erᴋaititsomavapsele, mattominga ᴋaujimagalloartose: Nâlekab inuit piulidlarᴋârlugit Egiptenemit, kingorngagut nungutipait taipkoa okpingitut.

⁶ Engelittauᴋ ataniovingmingnik (sivorlermik) sapkutsijut, iglomingniglo ᴋemaijut, ᴋelerutinut issoᴋangitomut soᴋᴋosijuituksaujunut ᴋumergusiupait uvloᴋsoarmut erᴋartuiviksamut.

⁷ Sôrlotauᴋ Sodoma Gomorralo iglugasaksuillo erᴋânêtut, makkotitunaᴋ ajortulijoᴋsôvlutik, uviningmik assia ikligilugo, maᴋojungnartulidlalauᴋtut, erᴋaraksangortitaungmatta, pidlartauvlutik ikomamut ᴋamisuitomut.

⁸ Taimaigivuttauᴋ sinaktômajut tâpkoa, uviningmingnik ivsornartitsijut, angajoᴋaujunigle nachojut, ataniviksoarniglo mitauteᴋartut.

⁹ Miggailible, Engelit angajoᴋângata, Sâtanase akkerartoramiuk, oᴋautjudlarlugo Môsesib timinga pivlugo, erᴋartorlugo sapperpâ oᴋautsit mitautelît atorlugit, oᴋarporle: Nâlekab pidlarniarlitit!

¹⁰ Tâpkoale mitauteᴋadlarput ᴋaujimangitamingnik; ingergarmik ᴋaujimajamingnele asserorsârutivut ingmingnik, nergjutitut silatuneᴋangitutitut.

¹¹ Kappianamêk tâpkoa! Kainib apᴋotigilauᴋtanga atoramitsuk, Balaamiblo tamârnêrilauᴋtanganut perᴋutiniaromamut katakivut, pikablânermingnelo Kôratut nungutauvut.

¹² Tâpkoa mamaitoᴋsôjut ᴋuviasuluktut nerreᴋatigigangamise iktôratik nerridlarput; nuvujauvut imeᴋangitut, anoremut ingergartitaujut; napârtôvut palliovlutik paungaᴋangitut, maggoertorlutik toᴋungajut, amângerutjaumajut.

¹³ Imarbiub malliksoangititut idlutik ᴋappoalijokut anitsijutitut kangusûtigijaksamingnik; uvloritjat maungatuinaᴋ pijut, taipkonunga tâᴋtoᴋsoaᴋ ᴋaumaneᴋangimariktoᴋ ᴋumergutauvoᴋ issoᴋangitomut.

¹⁴ Enogele aglât, Adamemit 7 iojoᴋ, nelautailerivoᴋ tâpkoninga, oᴋarame: Ahâk, Nâlegaᴋ aggerpoᴋ ivjornaitut unuktoksuit tausendeoᴋattartut illagilugit,

¹⁵ Erᴋartoriartorlugit ilûnaita, Gûdemiglo iperaijomajut tamaita pidlarlugit, piniarningit Gûdemut akkerartortut tamaita pitjutigivlugit, ajortoliksuillo oᴋauseludlalaungningit tâpsominga pitjutigilugit.

¹⁶ Tâpkoa avamudlarlutik passiklitsainarput, ikligunitik maliklugit arvertarlutik; ᴋaningillo piblingaitunik oᴋâladlarput, adsigêngititsivlutik inungnik, perᴋutiniaromamut.

¹⁷ Ilipsele, erdlingnartose, oᴋautsit ipkua erᴋarsigik, Nâlegapta Jêsusib Kristûsib Apôstelingita sivorngagut oᴋauserijangit;

¹⁸ Oᴋarvigingmase, uvlut kingorliksangine mitauteᴋartoᴋaromârmat, ikligunitik maliklugit inôniartunik, Gûde iperarlugo.

¹⁹ Tâpkoa ingmingnik ingmigôlingatitut uvinituinauvut anerneᴋangitut.

²⁰ Ilipsele erdlingnartose, ilipsingnik igloliangotitse okpernipsingnut ivjornainerôjomut, tuksiarluselo Anernikut ajunginikut.

²¹ Gûdiblo naglingninganêtsainaritse, nerriugilugolo Nâlegapta Jêsusib Kristûsib nâpkiningninga inôtsemut nâksaungitomut.

²² Adsigêktiniarnagillo, ilangit nâpkiningnermik piniarvigisigik;

²³ Ilangille sivôrasârdlugit piuliniarsigik, ikomamit nussungniardlugit; ômigilugolo annorâᴋ uviningmut ipeᴋtojoᴋ.

²⁴ Tâmnale ilipsingnik sapputsijungnartoᴋ passijaksaunase, pidlaraksaunaselo saᴋᴋertitsijungnartoᴋ ilipsingnik ᴋuviasukluse;

²⁵ Gûde tâmna, silatujotôjoᴋ, piulijivut, nertortaunermik pile, opigijaunermiglo, pitsartunermiglo, ajugaᴋanginermiglo, mâna issoᴋangitoᴋsoarmullo! Amen.