Josua 9 - Labrador Inuttitut Heritage Bible

Gibeonemiut pingitsertorninginik.

¹ Manna attannit, Jordanib ungatane ᴋaᴋᴋane naksanallo, imârbiksublo siksangane nunaᴋalauktut, tapkoatauk ᴋaᴋᴋab Libanonib sanianelauktut, imaitut, Hethiterit Amoriterillo, Kanaaniterillo, Feresiterillo, Heviterillo, Jebusiterillo, tamattominga tussaramik;

² Kattimalerput illajêklutik unatadlaromavlutik Josuamut Israelitinnullo.

³ Iglugasaksuille Gibeonemik attiggit innungit tussaramik sunamik Josuab pinniarnerilauktanganik Jerichomut Aiemullo issumasivut pingitsertornermik.

⁴ Aivut tilliklerlutiglo oᴋausijartortuksanik, tigusilutiglo pôngnik nutaungitunik siuteᴋoktojoᴋotimingnut,

⁵ Weinaᴋautiniglo nutaungitunik alliktorsimalauktunik illarsimajuniglo, ittiggagutiniglo nutaungitunik illarsimajuniglo ittikkamingnut, attilugillo anorângnik nutaungitunik, niaᴋojallo naksartangit illunatik sittijolaukput sapᴋaulutiglo.

⁶ Aivullo Josuamut tangmarvingmut Gilgalemut, oᴋarlutiglo tapsomunga Israelitinullo illunainut: Kaivogut nunnanit ᴋanningitunnit, tagva manna angerᴋattigêngnermik pileritse uvaptingnut.

⁷ Tagva Israelitit illunatik Hethiterinut oᴋarput: Imakka akkonaptingne nunakarungnarajarpose, ᴋannok tagva angerᴋattigêngnermik pijungnarᴋita illipsingnut?

⁸ Tapkoale oᴋarput Josuamut: Kivgaksauvogut illingnut. Josuable oᴋautivit: Kikuvise, nakillo pivise?

⁹ Tapkoa oᴋarput: Kivgattit nunnanit ᴋanningitoksoarnit tikkiput Nalekab Gudivit attinga pivlugo; tussaumajauninga tussarlauraptigo, tamaitalo pinniarnerilauktangit Egipteneme.

¹⁰ Tamaitalo pinniarnerilauktangit Amoriterit attanningangnut maggungnut Jordanib ungatanetungnut, Sihonemut Hesbonib attanertanganut, Ogemullo Basanib attannertanganut, Astharotheme nunaᴋalauktomut.

¹¹ Tamanna pivlugo angajoᴋavut nunagijaptalo innungit illunatik oᴋarput: Toᴋᴋoaksamik naksaritse ingerganermut, ailuselo pachrerarlugit, oᴋautilugillo: Kivgauvogut illipsingnut. Taimak mana angerᴋattigêngnermik pileritse uvaptingnut.

¹² Niaᴋojavut ukkua, nerᴋiksaptingnut igluptingnit naksarlauktavut, nutaumarilaukput aulartilluta illipsingnut, manale ahâk, sittijovut sapᴋaᴋalutiglo;

¹³ Weinaᴋautillo ukkua nutangotillugit immerlaukpavut, ahâglo alliktorsimavut; annoravullo ukkua ittiggagutivullo nutaungitolerput ingerganermut sivitojomut.

¹⁴ Tagva angajoᴋajat tapkoa nerᴋingit illalliorpait, appertsoratiglo Nalekab ᴋanninganik.

¹⁵ Josuablo ullapirsauteᴋarᴋattigilerpait angerᴋattigêngnermiglo pilune tapkonunga, innojuksaungmatta. Illagêktullo angajoᴋangita angervigimarikpait.

¹⁶ Uvlulle pingasut nâlermatta, angerᴋattigêngnermik pilauᴋârlutik, tussarput taipkoa ᴋanidlarmatta akkonermingnelo nunaᴋarniarmatta.

¹⁷ Israelible ᴋittorngangit aularamik uvluk pingajuangne tikkiput taipkoa iglugasaksoaᴋotinginut, atteᴋartunut Gibeonemik, Kafiramiglo, Beerotemiglo, Kiriat-Jearimemiglo.

¹⁸ Ullimarlaungilaillo, tamanna pivlugo Israelitit angajoᴋangita angervigimarilaungmattigik Nalekame Israelib Gudingane. Illagêktulle illunamasiatik oᴋalokingmatta angajoᴋajanut,

¹⁹ Illagêktut illunamasiatik angajoᴋangit oᴋarput: Angervigimarilaukpavut Nalekame Israelib Gudingane; tamanna pivlugo aktorungnangilavut.

²⁰ Imaitomigle pinniarvigijomavavut: Innôᴋosigik ningautsemik pijoᴋarᴋonago uvaptingnut, angermaringnak angerutigilauktavut tapkonunga pivlugo.

²¹ Angajoᴋajallo oᴋautivait: Innôᴋosigik ᴋitsiorteolerᴋovlugit immertarteolerᴋovlugillo illagêktunut illunainut, sorlo angajoᴋajat angervigilaungmattigik.

²² Tagva Josuab ᴋaiᴋoveit oᴋarᴋattigilugillo oᴋarpok: Sôg terliarlaukpittigut, oᴋarluselo ᴋaningidlarapse uvaptingnit nunaᴋaralloartilluse akkonaptingne?

²³ Tamanna pivlugo ominarnerartaujuksauvose, akkonapsingne sorailerᴋonagit kivget, ᴋitsiortut imertartullo Gudima iglunganut.

²⁴ Tapkoa Josua kiovât oᴋarlutiglo: Kivgattit oᴋautsaulaukput, Nalekab Gudivit kivgane Mosese perᴋolaungmago nuna illuêngarlune tunnijomangmago illipsingnut, nunablo innungit illunamasiatik nungutsomangmagit sivunapsingne. Tagva innôtsivut pivlugit sivoragidlalaukpapse, taimailiorlutalo.

²⁵ Mannale takkoit aggangnêpogut; namanasugijarnik idluarasugijarniglo pinniarvigiluta, tamattominga piniarlaurit.

²⁶ Tapsomalo taimak piniarvigivait, piulilugillo Israelib ᴋittorngangita agganginit toᴋᴋotsiᴋonagit tapkoninga.

²⁷ Taimak Josuab uvlorme taipsomane ᴋitsiortungortilaukpait, imertartungortilugillo illagêktunut, Nalekablo Altaringanut uvlok tamanna tikkilugo, iniksame anneriniartamine (Altaremut).