Josua 8 - Labrador Inuttitut Heritage Bible

Iglugasaksuit Ai salagijauvut. Saimanarnak ominarnerlo oᴋautigijauvuk ᴋaᴋᴋangne Garizimeme Ebalemelo.

¹ Nalegarlo Josuamut oᴋarpok: Sivuraniarnak mungunganaglo. Inuit sorsuktuksat illunaita illasearikit, parngnaîlutillo majorarlutillo takpaunga Aiemut. Tagga ahâk, Aib attannertangat, innuᴋotingit illaliudlugit tunnijarêrpakka aggangnut.

² Aielo, attanertangallo pinniarvigijaksarivattit, sorlo Jericho attanertangallo pinniarvigilaurangne, kissiane aksartaujutigijangit omajoᴋotingillo avigeksarigapsigik illipsingnut. Uttakᴋijoᴋarᴋojilerille terliarsivingmêtunik iglugasaksuit ungatane.

³ Tagva Josua parngnailerpok sorsuktuksallo illunatik majoraromavlutik Aiemut. Josuablo angutit sorsuktuksat 30,000 dit annerivait tillilaitalo unnuarme;

⁴ Perᴋolugillo oᴋarpok: Udsertoritse, illipse uttakkijuksauvose terliarsivingme, iglugasaksuit ungatane; ᴋanningiluartomulle iglugasaksoarnit ainiarase, oppallungersimaluselo illunase.

⁵ Uvangale innugasaksuillo illagijakka ᴋaglileromavogut iglugasaksoarnut. Opaklutalo pachreartorpattigut sivurnganetut ᴋemâjomavavut.

⁶ Udlatuiᴋovlugit uvaptingnik iglugasaksuit sillatânut, âtsiᴋârtinata tapkoninga iglugasaksuit sillatânut. Issumaᴋarniarpulle ᴋemâgaptigik sivurnganetut. Kemâtillutalo tapkoninga,

⁷ Illipse nulertuksauvose terliarsivipsingnit iglugasaksuillo aksarnigarilugit; Nalekab Gudipse tunniniarmagit aggapsingnut.

⁸ Iglugasaksuille aksarnigarijarêrupsigik ikkilersigik ikkomamut, pinniarluselo Nalekab oᴋausingit malliklugit. Ahak perᴋovapse tamattominga.

⁹ Taimak Josua tilliklerpok tagvunga, aivullo terliarsiviksamingnut, nokᴋangavullo Beth-Elib Aiblo akkorngangne, Aib kangiane. Josuale unnuarme innugasaksuit akkornganetualerpok,

¹⁰ Uvlarmelo uvlarârsukut makkijajovok, parngnaitilugillo innugasaksuit, majorarlunelo Israelib angajoᴋangit illagilugit, inugasaksuit sivorlerilugo takpaunga Aimut.

¹¹ Inuillo sorsuktuksat illagijangit majorarlaukput, ᴋaglilutiglo tikkilutiglo iglugasaksuit sakkânut, nokᴋangalutiglo Aib tachane, naksaᴋartuinarmat tapkoa Aiblo akkorngane.

¹² Tiguvaillo angutit 5,000 dikassait pitilugillo terliarsiviksamut Beth-Elib Aiblo akkorngangnut iglugasaksuit kangianut.

¹³ Pitipaillo innugasaksuit kattimgajut illunaita, iglugasaksuit tachanelauktut; kingorlingit pingmatta iglugasaksuit kangia tikkidlugo. Taimak Josua unnuame taipsomane ailaukpok nâksab ᴋerᴋanut.

¹⁴ Aiemiulle attaningat tamattominga takkolaurame, tuavidlalaukput, tuavileᴋullo parngnailerput, iglugasaksuillo angutingit anisarput Iraelitit paromavlugit unatadlarnermut inniksame nallonarungnaititaumajome naternaub miksane, innuᴋotine illunaita illagellugit. ᴋaujimalaunginame uttakkijoᴋarmat tapsominga terliarsivingme iglugasaksuit ungatane.

¹⁵ Josuale Israelitillo illunatik pissertorlutik salauniarsertorput tapkonunga ᴋemâlutiglo apᴋome sunakajuitomut sangmijome.

¹⁶ Tagva iglugasaksoarmiut illunamasiatik niplialerput unangmiklertokarᴋovlugo tapkoninga.

¹⁷ Unangmivâllo Josua, annilutiglo iglugasaksoarnit, angutekarungnailaungmat attautsemiglonêt Aiemê Beth-Elemêlo annilaungitomik Israelitit unangmilugit, iglugasaksuillo pallangersimanagit ᴋemakpait Israelitit unangmilugit.

¹⁸ Tagva Nalegak Josuamut oᴋarpok: Kallugiak aggangnetok issautiuk Aiemut tunnijomagapkit aggangnut. Josuablo kallugiak issautingmago iglugasaksoarnut.

¹⁹ Tagva terliarsivingmetut aularsarput innigijamingnit akpangerlutiglo, aggangit issalauᴋârlugit, tikkilutiglo iglugasaksoarnut sâlagilugillo, tuavilaukpullo, ikkilaitalo ikkomamut.

²⁰ Angutillo Aiemiut keviarput, takkosarlutiglo uttimut, takkolutiglo iglugasaksuit isserlunganik kôngmuartomik ᴋillangmut, kemâviksakangilello ikkungalonêt tagvungalonêt. Innuillo sunnakajuitomut kemâjut tunnulerput udlatorlugit.

²¹ Josuale, Israelitillo illunatik takkogamik, terliarsivingmelauktut iglugasaksuit aksarnigaringmattigik, iglugasaksuit isserlunga kongmuarmat, utterivut ullimarlugillo angutit Aiemiut.

²² Tapkoalo iglugasaksoarnetut anilaurivut pârlugit, taimak Israelitit akkornganemarilaungmatta, ikkangat ovangallo ullimarpaillo pitaᴋarungnaiᴋârtinago, tapkonangat nallienik, ᴋemâjoᴋarungnarᴋonagolonêt.

²³ Aiblo attannertanga tiguvât innotillugo âlâlo Josuamut.

²⁴ Israelitillo Aiemiut illunaita naternamelauktut, sunnaᴋajuitomelauktullo udlalauktatik toᴋᴋojarêrmattigik, ochojarêrmattalo saviksub kênanganut, illunatik nunguᴋârtinagit, tagva Israelitit illuêngarlutik salerput Aiemut, ullimârlugillo saviksub kênanganut.

²⁵ Illunatiglo ocholauktut uvlorme taipsomane tamarmik angutit arnallo 12,000 diolaukput, illunatik Aiemiut.

²⁶ Josuablo aggane ᴋallugiarmik issaktijutigijane erᴋitilaungilait nunguᴋârtinnagit Aiemiut illunaita.

²⁷ Iglugasaksuille nergjutingit aksartaujutigijangillo Israelitit avitipait ingminut, Nalekab oᴋausingit, Josuamut perᴋolauktangit malliklugit.

²⁸ Josuablo Ai nungutimarikpait ikkomamut, katsiktungortilaitalo soraijuitomik, tagvanetomik sulle uvlome.

²⁹ Aiemiullo attanningat nivingatauᴋova nappartomut unnuk tikkilugo. Seᴋᴋinerle nippijarêrmat, perᴋojivok timinga anernangêrtok akᴋartitauᴋovlugo nappartomik, egipâllo iglugasaksuit itterviksoanganut, ujarᴋallo unuktut perorliutivait ᴋânganut, uvlok tamanna tikkilugo tagvanetut.

³⁰ Tagva Josuab Altare sannava Nalekamut Israelib Gudinganut, ᴋaᴋᴋame Ebalemik attelingme;

³¹ Sorlo Mosesib Nalekab kivgangata Israelib ᴋittorngangit perᴋolaungmagit, sorlo aglaksimangmat Mosesib aglanginne perᴋojaktalingne, Altare ujarᴋanit illuitunnit, kikkiengmut ullimartaulungitunnit; tunnergutiksaniglo otaksanik ᴋujalijutiksaniglo tunnijivok Nalekamut.

³² Aglaklunelo tagvane ujarᴋanut, perᴋojat adsinginik, Mosesib Israelitinut perᴋolauktanginik.

³³ Israelitillo illuêngarlutik, angajoᴋajatik, aulatsijitiglo idluarsaijitiglo illagilugit nangerput iklerviub sanneragingne tamangne, ajochertuijut Levitillo Nalekab angersimaningata iklervinganik akkigartut sanginne, tujormijat illagijangillo, ketterᴋangit aipaingit ᴋaᴋᴋab Grisimemik attigub sanniane, aipaingillo ᴋaᴋᴋab Ebalemik attiggub sanniane, sorlo Mosese Nalekab kivganga sivorngane perᴋojilaungmat, innugasaksuit Israelitit saimartilugit.

³⁴ Kingorngane perᴋojat oᴋausertangit illunaita, oᴋartut saimanermik ominarnermiglo ᴋaigarsuktauᴋoveit, sorlo aglangne perᴋojaktalingne aglaksimangmat.

³⁵ Oᴋauseᴋalaungilak attautsemiglonêt perᴋojaulauktomik Mosesemut, Josuab ᴋaigarsuktauᴋolaungitanganik illagektut Israelitit illunatik takkoane arnallo sorrutsillo tujormijallo, agvertartut tapkoa akkorngane takkoane.