Josua 7 - Labrador Inuttitut Heritage Bible

Achanib tiglingnak pivlugo pitlartauninganik.

¹ Israelitille tammarlaukput tigusinermut nungutaksamik; Achan Karmib erninga, Sabdib erningata, Serab erningata, Judab kinguvânginnit, tigusilaungmat nungutaksat illanginnik. Tagva Nalekab ningausingata Israelib ᴋittorngangit illungertorutigivait.

² Tagva mana Josuab, angutit tillingmagit Jerichomit Aimut, Beth-Avenemetomut Bethelib kittanetomut oᴋautilugillo: Takpaunga majorarluselo nuna nautsertorsiuk; majorarlauramiglo Ailo nautsertorlauᴋârlugit,

³ Utterput Josuamut oᴋautivlugolo: Inugasaksuit illuêngarlutik majorarᴋoniarnagit, angutille 2,000 dikasait 3,000 dillonêt majorarlit, ullimarniᴋovlugit Aimik, innugasaksuit illuêngarlutik sullijaksaᴋartitauᴋonagit tapkonunga, ikkitotuinaungmatta.

⁴ Taimak innugasaksoarnit angutit 3,000 dikasait majorarput, ᴋemâvullo angutinik Aimiunik.

⁵ Aimiullo ullimarpait tapkonangat 36 it ᴋemâtilaitalo upkoaksoarmit Sebarim tikkilugo, ullimarlugillo attersartillugit. Tagva innugasaksuit omatingit mungungalerput, imektut îlerdlutik.

⁶ Josuab annorâne alliktorpait pamakterlunelo kênaminik pûlune nunamut Nalekab iklervingata sânganut, unnuk tikkidlugo Israelitit angajoᴋangit illagilugit, sannillo egipait niaᴋomingnut.

⁷ Josualo oᴋarpok: Nalegak, Nalegak sôg innugasaksuit ukkua tassiorlaukpigît Jordanib akkianut, unnertutigiluta Amoriterit agganginnut, toᴋᴋoluta? ᴋanoktôk Jordanib akkianetsainarlaurupta, sorlo pigialaurapta.

⁸ Nalegara ᴋanoêtunik oᴋauseᴋartuksauvik, Israelitit tunnungmatta omigijimingnit?

⁹ Kanaaniterillo nunamiullo illunatik tamattominga tussarunik, illuniarpâtigut, attivullo pejarniarpait nunamit. Sunamiglo pinniaromavît atterne angijome?

¹⁰ Tagva Nalegak Josuamut oᴋarpok: Makkitit! sôg taimak pamangavit kenêt pûlugo?

¹¹ Israelitit idluitulilaukput, angersimaneralo perᴋolauktara tapkonunga tappagilaukpât; tigusilauramik nungutaksamik, tiglilaukpullo taimak, missiarlutiglo, illijilutiglo perᴋutigijamik akkornganut.

¹² Israelib ᴋittorngangit nangerungnangilet omigijimik sanginne, tunnuleriaᴋarpaille omigijitik; ominautiksaᴋaramik. Mannamit illaginiangilapse, ominautiksak pêjarniangikupsiuk illipsingnit.

¹³ Makkitit innugasaksuillo ivsornaitikit, oᴋarlutillo: Ivsornaititse ᴋaupamut. Nalegak Israelib Gudinga imak oᴋarmat: Ominautiksaᴋarpok akkonapsingne Israelitiojose; taimaimat nangerungnangilase omigijipse sanginne ominautiksak pejartauᴋârtinago illipsingnit.

¹⁴ Uvlakullo ᴋaijuksauvose, kinguvarêt nalleᴋârlutik; kinguvarêllo Nalekab nallauniartangita abvakungit nallekarlutik ᴋaijuksauvut; abvakullo Nalekab nallauniartangita iglomiuᴋattingit nelleᴋârlutik ᴋaijuksauvut; iglomiuᴋattillo Nalekab nallauniartangita angajoᴋangit nalleᴋârlutik ᴋaijuksauvut.

¹⁵ Nachvartauniartorlo ominautiksaᴋarlune tamna ikkitaujuksauvok ikkomamut, pigijane tamaita illaliudlugit, tamanna pivlugo, Nalekab angersimaninga tappagilaungmago sillainermiglo pinniarlaungmat Israeleme.

¹⁶ Tagva Josua uvlarme uvlarâsukut makkijajovok, âtsilunelo Israelitinnik, kinguvarêt nalleᴋârlutik; Judablo kinguvarêngit nallautaulaukput.

¹⁷ Judablo abvakungit âlaungmagit, Serab abvakungit nallautaulaukput. Serablo abvakungit âlaungmagit iglut angajoᴋangit nalleᴋârlutik, Sabdi nallautaulaukpok.

¹⁸ Iglomiukattingillo âlaungmagit, angutit nalleᴋârlutik, Achan nallautaulaukpok, Karmib erninga, Sabdib erningata Serab erningata Judab kinguvarênginit.

¹⁹ Josualo Achanemut oᴋarpok: Ernîk nertordlernermik tunnijilerit Nalekamut Israelib Gudinganut, nakorilugolo pît, oᴋautilungalo, sunamik pinialaukât? missiarviginangalo sunamik.

²⁰ Tagva Achanib Josua kiova, oᴋarlunelo: Ahamarik Nalegak Israelib Gudinga idluitullivigilaukpara; imâk imâglo pinniarlaukpunga.

²¹ Aksarnigaujat akkorngane takkolaukpunga ullingmik pivianartomik Babelemiomik, Silberemiglo Sekelenik 200 dinnik, oᴋangoamiglo Goldemik Sekeletut 50 gitut oᴋumaitigijomik, tapkoninga ikligulaukpunga tigusilungalo. Ahaglo saumavlutik ijersimavut nuname tuppimne, Silberelo akkornganepok.

²² Tagva Josua nautsertortuksanik tilliklerpok, tapkoa akpangerput tuppermut; ahâglo, ijersimalaukput tuppingane, Silberelo akkornganêdlune.

²³ Tiguvaillo tuppermit âlugillo Josuamut, Israeliblo ᴋittornganginut illunainut, navilaitalo Nalekab sânganut.

²⁴ Tagva Josuab Israelitillo illunatik Achan Serab erninga tiguvât, Silberelo, ulliglo, oᴋangoarlo Golde, erningillo panningillo, tuktuvaᴋotingillo, siuteᴋoktojoᴋotingillo, saugaᴋotingillo tuppingalo, tamaitalo pigijangit illaliudlugit, tassiorpaillo paunga naksamut Achoremik attelingmut.

²⁵ Josualo oᴋarpok: Kiksartilauraptigut Nalekab kiksartilitit uvlorme tamattomane. Israelitillo illunatik millorpât, ikkilugillo ikkomanut. Millorêramigillo,

²⁶ Ujarᴋat unnuktut perorliutivait ᴋanginnut, tapkoa tagvaneput sulle uvlok tamanna tikkilugo. Tagva Nalegak ningautsime illungertorninganit allarpok. Tamanna pivlugo nuna tamanna taijauvok, Achorib naksanganik uvlok tamannatikkilugo.