Josua 6 - Labrador Inuttitut Heritage Bible

Jerichub asserortauninganik.

¹ Jerichole pallangersimalaukpok, udsertortaulunelo Israelib ᴋittorngangit pitjutigallugit, annijoᴋarungnarᴋonnago, ittertoᴋarungnarᴋonagolonêt.

² Nalekable Josua oᴋautiva: Tagga ahâk, Jericho, attanertangallo sorsuksoaᴋotingillo illaliudlugit, tunnimavakka aggangnut.

³ Angutit sorsuktuksat pissukokit iglugasaksuit avatâtigut attausiarlutik taimailiorlutillo uvlunne 6 inne.

⁴ Uvlulle 7 ingane ajochertuijut Jarib nertordlernartub tiptulautingit 7 it tigulerligit iklerviub sivorngane; uvlullo 7 ingane tamattomane 7 êrtorluse aileritse iglugasaksuit avatâtigut, ajochertuijullo tiptulautit tiptulausijautigiligit.

⁵ Jariblo nertordlernartub tiptulautinga tiptulausijartaukpat, imiatitaukpallo, tiptulautit tussarupsigik, tagva innugasaksuit illunamasiatik unatadlarnerub nippevaksoanganik pijuksauvut, tagva iglugasaksuit avalungita ᴋarmangit ochoniarput innugasaksuillo ittertuksauvut illunatik attunit sivumut.

⁶ Tagva Josuab Nunib erningata ajochertuijut ᴋaiᴋovait oᴋautivlugillo: Angersimanerub iklervinga akkigarsiuk, ajochertuijullo 7 it naksarlit Jarib nertordlernartub tiptulautinginnik 7 nik Nalekab iklervingata sivorngane.

⁷ Inugasaksoarnulle oᴋarpok: Aileritse pissukluselo iglugasaksuit avatâtigut; oppalungersimajullo ailerlit Nalekab iklervingata sivorngane.

⁸ Josuab innugasaksuit tamattominga oᴋautijarêrlaungmagit, ajochertuijut 7 it Jarib nertordlernartub tiptulautinginik 7 nik akjarsivut Nalekab iklervingata sivorngane tiptulausijarlutiglo; Nalekablo angersimaningata iklervinga mallikpok tapkoninga.

⁹ Oppalungersimajullo ajochertuijut tiptulausijartut sivorngane pisulaukput; innugasaksuillo mallikput iklervingmik, ajochertuijullo sivumuarlutik tiptulausijarput.

¹⁰ Josuable innugasaksuit perᴋovait oᴋarlunelo: Unatadlarnerub nippivaksoanganik pijuksaungilase, nippiselonêt tussartauᴋojaksaringilasse, annititsinaselonêt oᴋautsemik attautsemik ᴋannipsingnit, uvlok tamna tikkilugo oᴋarviga illipsingnut: Unatadlarnerub nippivaksoanganik pileritse; tagva unatadlarnerub nippivaksoanganik pileritse.

¹¹ Taimak Nalekab iklervinga ingergavok attausiarlune iglugasaksuit avatâtigut, ᴋailutiglo tangmarvingmut, nokkarlutiglo tagvane.

¹² Josuale uvlarme uvlarârsukut makkijongolaukpok, ajochertuijullo Nalekab iklervinga akkigarpât.

¹³ Taimak ajochertuijut 7 it Jarib nertordlernartub tiptulautinginik 7 nik akjarsivut Nalekab iklervingata sivorngane, sivumuarlutiglo tiptulausijarput; oppalungersimajullo sivorlerivait, innugasaksuillo mallikput Nalekab iklervinganik, ajochertuijullo sivumuarlutik tiptulausijarput.

¹⁴ Uvlub aipanganetauk attausiarlutik ailaukput iglugasaksuit avatâtigut uttermilutiglo tangmarvingmut. Taimailiorlaukput uvlunne pingasujortunne.

¹⁵ Uvlulle 7 ingane ᴋaub aupallungninga nuilertillugo, uvlarârsukut aularlaukput, ailutiglo illusek tamanna malliklugo 7 êrtorlutik iglugasaksuit avatâtigut; taimak uvlorme attautseme taipsomane 7 êrtorlutik iglugasaksuit avatâtigut pivut.

¹⁶ 7 inganelo ajochertuijut tiptulausijartillugit, Josuab innugasaksuit oᴋautivait: Unatadlarnerub nippivaksoanganik pileritse, Nalekab tunnitsivigingmasse iglugasaksoarnik.

¹⁷ Iglugasaksuille tamakkoa illuanêtullo tamaita nungutuksauvut Nalegak pivlugo. Anguniarpaktok Rahabe kissime innojuksauvok, iglomioᴋattingillo illunatik; nautsertortuksâk tillilauktâkput ijertorlaungmagik.

¹⁸ Kissiane illimasugitse nungutaksanik, nungutaksautiᴋonnasse, nungutaksat illangit tigugupsigik, nungutaksautilugolo Israelib tangmarvinga, pitilugolo ogguarnartomut.

¹⁹ Silberele, Goldelo tamaita, illulerkutit kannujat kikkiello illaliudlugit ivsornaititaksauvut Nalekamut, pilerᴋovlugit Nalekab ivlernartoᴋotinginnut.

²⁰ Tagva inugasaksuit unatadlarnerub nippivaksoanganik pilerput, ajochertuijut tiptulausijartillugit. Inugasaksuille tiptulautib nippinganik tussaleramik unnatadlarnerub nippivaksoanganik pivut; avalullo ᴋarmait ochovut, innugasaksuillo ittarput iglugasaksoarnut attunnit sivumuarlutik. Taimak iglugasaksuit salagivait.

²¹ Asserorlugillo iglugasaksoarnêtut tamaita saviksub kênanganut, tamarmik angutit arnallo, innuosuktut innutoᴋaujullo, tuktuvaillo saukello siuteᴋoktojullo.

²² Josuable angutik nautsertoriartorlauktuk nunamik oᴋautivak: Itteritik anguniarpaktub iglunganut, arnarlo tamna annitikko tagvangat pigijangit tamaita illaliudlugit, sorlo angervigimarilauraptikko.

²³ Tagva innuosuktuk nautsertoriarlauktuk itterpuk annitilugolo Rahabe, atâtanga, anânangalo, ᴋattangutingillo illaliudlugit, pigijangillo tamaita, illagijangillo illunaita, ᴋemaklugillo Israelib tangmarvingata sillatanut.

²⁴ Iglugasaksuille ikkipait ikkomamut, illuanetullo tamaita illaliudlugit. Silberele Goldelo, illulerᴋutillo kannujat kikkiello pitipait ivlernartunnut Nalekab iglunganut.

²⁵ Rahabele anguniarpaktok, atâtangata iglomioᴋattingit illaliudlugit, pigijangillo tamaita, innoᴋojaulaukput Josuamut. Nunaᴋarporlo Israeleme uvlok tamanna tikkilugo, tamanna pivlugo, tillijaujuk Josuab tillilauktagik Jerichomut, nautsertoriarᴋovlugik ijertorlaungmagik.

²⁶ Nalliutome taipsomane Josua kigligiudsimarilaukpok oᴋarlunelo: Ominarsijaule angut taimna Nalekab sângane, nappartitsijok igloliortorlo iglugasaksoarnik Jerichomik ukkuninga. Illiguniuk tungavingat erninga angajuklek pijaule, upkoaksoangillo illigunigit erninga nukᴋârdlek pijaule.

²⁷ Taimak Nalekab Josua illagiva, oᴋautigijaulaungmat nunane illunaine.