Josua 5 - Labrador Inuttitut Heritage Bible

Kanaaniterit mungungalerninganik. Israelitit kippijauninginik, nerrininginiglo saugarsungmik aularviksiorutiksamik.

¹ Amoriterit attanningit illunatik Jordanib akkiane kangiane nunaᴋalauktut, Kanaaniterillo attanningit illunatik tussaramik, ᴋannok Nalekab Jordanib iminga ipterilingatilaungmago, Israelib ᴋittorngangita sivorngatigut, akkianut tikkiᴋârtinagit, tagva omattingit mungungalerput maksoanaᴋarungnailunelo tapkonane, Israelib ᴋittorngangit pitjutigellugit,

² Nalliutome taipsomane Nalegak Josuamut oᴋarpok: Savingnik ujarᴋanik sannalerit, kippilugillo ama Israelib ᴋittorngangit.

³ Tagva Josuab savit ujarᴋanik sennavait, Israeliblo ᴋittorngangit kippivait ᴋaᴋᴋarulângme Aralothemik attelingme.

⁴ Tamannalo pitjutaulaukpok suna pivlugo Josuab innugasaksuit illunaita Egiptenemit aularlauktut, angutit, kippilaungmagit; sorsuktuksat illunatik toᴋᴋolaungmatta apᴋomelutik sunaᴋajuitome Egiptenemit aularlutik,

⁵ Inuille illunaita aularlauktut kippimmalaukput, innuille illunaita sunaᴋajuitome erniangolauktut apᴋome, Egipternemit aularlutik, kippijaulaungilat.

⁶ Israelib ᴋittorngangit agvertarlaungmatta, Jarit 40 git nâlugit sunaᴋajuitome, innuit illunaita angutit sorsuktuksat, Egiptenemit aularlauktut nunguᴋârtinagit, tamana pivlugo Nalekab nippinga nalalaungimatsuk; Nalekab oᴋautimarilaungmagit, nuna takkojaksaringimatsuk, Nalekab angerutigilauktanga atâtagijanginnut, tunnijomavlugo uvaptingnut, nuna imungmik igupsaujartullo orksuanik kôlik.

⁷ Tapkoa ᴋittorngangit inangêrlugit innojut, Josuab kippivait; kippimalaungimatta, apᴋome kippijaulaungimatta.

⁸ Inugasaksuillo illunaita kippisimagamik tangmarvingme najortamingnetuarlaukput mamiᴋârtinagit.

⁹ Nalegarlo Josuamut oᴋarpok: Uvlome Egiptenib kangunarninga aksakartilaukpara illipsingnit. Tangmarviglo tamanna Gilgalemik taijaulaukpok, uvlok tamanna tikkilugo.

¹⁰ Israeliblo ᴋittorngangit taimak tangmarsimalutik Gilgaleme, Passamik attorput, takkib taipsoma uvlungita 14 ingata unnuangane, Jerichub naternangane,

¹¹ Nerrivlutiglo nunab ᴋaᴋᴋojaksanginnit, Passab uvlungita aipangane, ᴋaᴋᴋojamik sêrnaᴋangitomik, ᴋaᴋᴋojaksaniglo jarrasimajunnik, uvlorme taipsomane.

¹² Manalo sorailaukpok, nerrivingata nunab ᴋaᴋᴋojaksanginnik uvlungata aipangane, Israelib ᴋittorngangit Mannaᴋarungnaimatta, nerrilaukpulle Kanaanib nunangata ᴋaᴋᴋojaksanginik Jaremit taipsomangât,

¹³ Pijoᴋalaukporlo Josua Jerichub ᴋannitanganêdlune, ijingminut takkosarlaurame, mallugosulerporlo nangertoᴋangmat sakᴋamine angumik, tigumiartomik aggangminut saviksoarmik poksimangitomik. Josuablo aivigivlugo oᴋautiva: Uvaptingnut illingavît, omigijiptingnullonêt?

¹⁴ Tamna oᴋarpok: Aukak, angajoᴋaksoangovungale Nalekab kattimgajoᴋotinginnut, tikkipungalo manna. Tagva Josua kênaminik pûlune nunamut pamakterpok, tuksiarlunelo oᴋautiva: Kannoêtunik Nalegara oᴋausiksaᴋarᴋa kivgaminut?

¹⁵ Angajoᴋaksoarlo Nalekab kattimgajoᴋotinginnut Josuamut oᴋarpok: Ittigagutit pêrkit ittiggangnit; nuna nangervigijat ivsornaimat. Josualo taimailiorpok.