Josua 4 - Labrador Inuttitut Heritage Bible

Ujarᴋet erᴋaumajaujuksat Jordanib saniane iminganelo.

¹ Nalekablo Josua oᴋautiva:

² Angutinnik 12 nik tigusilerit, kinguvarêt nalliênit attautsemik,

³ Perᴋolugillo oᴋaritselo: Jordanib illuanit, ajochertuijut ittiggangita nangervinganit, ujarᴋanik 12 nik kiviksileritse, naksarluselo tapkoninga tamaunga, ᴋemaktauᴋovlugit sinniktarvipsingnut unnuarme tamattomane.

⁴ Tagva Josuab angutit 12 it ᴋaiᴋovait, Israelib ᴋittornganginnut annerijaumalauktut, kinguvarêt nalliennit attausek,

⁵ Oᴋautilugillo: Aileritse Nalekab Gudipse iklervingata sânganut, Jordanib ᴋerᴋânut; attunnillo ujarak attausek kivik siuk, illilugillo tuipsingnut, Israelib ᴋittorngangita kinguvarêngita unnurningit malliklugit;

⁶ Nallunaikutauᴋovlugit akkunapsingne. ᴋittorngarijapse kingorngagut atâtatik apperijomâjarangagit oᴋarlutiglo: ᴋannok ujarᴋat ukkua tagvane sullidlarᴋât?

⁷ Oᴋarᴋovluse tagva tapkonunga, ᴋannok Jordanib iminga avilaungmat Nalekab iklervingata sivorngagut, Jordanakut akkigartautillugo, ujarᴋat ukkua erᴋaumajaksauᴋovlugit soraijuitomik Israelib ᴋittornganginut.

⁸ Tagva Israelib ᴋittorngangit taimailiorput, sorlo Josuamut perᴋojaulauramik, ujarᴋello 12 it tiguvait Jordanib ᴋerᴋanit, sorlo Nalekab Josua oᴋautilaungmago, Israelib ᴋittorngangita kinguvarêngita unnurningit malliklugit, naksarpaillo sinniktarvingmut, tagvanakolugillo.

⁹ Josuablo ujarᴋat 12 it nappartipait Jordanib ᴋerᴋâne, ajochertuijut, angersimanerub iklervinganik akkigartut ittiggangita nangervigilauktangane, tagvanepullo sulle uvlok tamanna tikkilugo.

¹⁰ Ajochertuijut iklervingmik akkigartut nangermatta Jordanib ᴋerᴋâne, tamaita sorartitauᴋârtinnagit Nalekab perᴋolauktangit Josuamut, innungnut oᴋauserilugit; sorlo Mosesib Josua perᴋolaungmago. Innuillo tuavilukarput ailutiglo akkianut.

¹¹ Innugasaksuillo illuêngarlutik akkianut pilauᴋârtillugit, Nalekab iklervinga akkigartaugivok akkianut, innugasaksuillo ajochertuijut sivorlerivait.

¹² Rubenikullo Gadikullo, kinguvarêllo Manassekut ketterᴋangit, sakkolijarlutik Israelib ᴋittorngangita sivorlerilaukpait, sorlo Mosesib oᴋautilaungmagit;

¹³ 40,000 diokassait oppalungersimavlutik unnatadlarnermut, ailaukput Nalekab sângane sorsungnermut Jerichub naternangane.

¹⁴ Uvlorme taipsomane Nalekab Josua angijorortipa Israelitit illunamasiatik sângane; sivoragivâllo sorlo Mosese sivoragilaungmatsuk innosinga nâlugo.

¹⁵ Nalekablo Josua oᴋautiva:

¹⁶ Ajochertuijut kigligiudsinerit iklerviktanganik akkigartut perᴋokit, ᴋakkiᴋovlugit Jordanemit.

¹⁷ Taimak Josuab ajochertuijut perᴋovait oᴋarlunelo: Jordanemit ᴋaᴋᴋileritse.

¹⁸ Ajochertuijullo Nalekab angersimaningata iklervinganik akkigartut ᴋakkitillugit Jordanemit, tuttitillugillo allumingnut pannertomut, Jordanib iminga pilaurivok innigivaktaminut, kolunelo sivornganetut siksangangne illunane.

¹⁹ Takkib sivorlerpangata uvlungita 10 ninganne innugasaksuit ᴋakkilaukput Jordanemit, tangmârlutiglo Gilgaleme, iglugasaksuit Jerichub kittâne.

²⁰ Ujarᴋallo 12 it Jordanemit tigulauktangit Josuab nappartipait Gilgaleme,

²¹ Oᴋarlunelo Israelib ᴋittornganginnut: ᴋittorngarijapse atâtatik mattoma kingorngagut apperijomâjarangagit, oᴋarlutiglo: Ujarᴋat ukkua suksauvat?

²² Tagva ᴋaujititaksarivasse oᴋautilugillo: Israelitit ipterilingajokut pissulaukput Jordanakut;

²³ Nalekab Gudipse Jordanib iminga ipteriliktilaungmago sivunapsigut ikârᴋârtinase; sorlo Nalegak Gudise pinniarlaungmat imarbingme iviksoatalingme suvlolingnik, ipteriliktilauktanga sivunaptigut ikkârᴋârtinnata.

²⁴ Nunaᴋattigêksuit nunamêtut illunatik illitarksilerᴋovlugit Nalekab agganginnik, ᴋannok pitsartunaᴋarninginnik; sivuraᴋovluse Nalekamik Gudipsingnik soraijuitomik.