Josua 3 - Labrador Inuttitut Heritage Bible

Israelitit pissungninginik Jordanakut.

¹ Josualo uvlarârsukut parngnailerpok, aularlutiglo Sittimemit, tikkilarmiglo Jordanemut, tamna Israeliblo ᴋittorngangit illunatik, tagvanelerlutiglo unnuarme iᴋârᴋâratik.

² Uvlulle pingasut nângmatta angajoᴋajat tangmarvik pissugvigivât,

³ Perᴋolugillo inugasaksuit, oᴋarpullo: Takkoniarupsiuk Nalekab Gudipse angersimaningata iklervinga akkigartautillugo ajochertuijunnut Levitinnit pijunnut, tagva aularitse innigijapsingnit malliklugolo:

⁴ Imagle, akkunapsingne, tapsoma illipselo inniksaᴋarᴋovlugo tallitut 2,000 ditukassait takkitigijomik. Kaglijaksaringilasse, ᴋaujimaᴋovluse apkutit nalliene agvertartuksaumangapse; apkut tamanna sivorngagut agvertarvigilaunginapsiuk.

⁵ Josualo oᴋarpok innugasaksoarnut: Ivsornaitititse Nalegak ᴋaupat tattamnartulliniarmat akkunapsingne.

⁶ Ajochertuijunnullo oᴋarpok: Angersimanerub iklervinga akkigarsiuk ailerluselo innugasaksuit sivornganne. Tagva tapkoa angersimanerub iklervinga akkigarlugolo aivut innugasaksuit sivornganne.

⁷ Nalekablo Josua oᴋautiva: Uvlome pigiaromavunga angijorortilutit Israelitit illunamasiatik sanginne, ᴋaujimaᴋovlugit sorlo Mosese illagilaurapᴋo illagingmigapkit.

⁸ Igvillo ajochertuijut angersimanerub iklervinganik akkigartut, perᴋokit, oᴋalutillo: Tikkikupse Jordanib imingeta sinâta illuanut, tagva nokᴋaritse.

⁹ Josuablo Israelib ᴋittorngangit oᴋautivait: ᴋaititse tussarluselo, Nalekab Gudipse oᴋausinginnik;

¹⁰ Oᴋarlunelo: Tamattomangat tukkisilertuksauvose omartomik Gudeᴋarmat akkonapsingne; aulartitsiniarmallo sivunapsigut Kanaaniterinnik, Hethiterinnik, Heviterinnik, Feresiterinnik, Girgasiterinnik, Amoriterinnik, Jebusiterinniglo.

¹¹ Ahâk, attaniotitub sillaksoarmut tamainut angersimaningata iklerlervinga sivorleriniarpasse Jordanib illuanut.

¹² Tagva manna angutinnik 12 nik tigusileritse Israelib kinguvarêngninginnit, kinguvarêt nallienit attautsemik.

¹³ Mannalo ajochertuijut akkigartut attanniotitub sillaksoarmut tamainut angersimaningata iklervinganik, allutik pitipattigik Jordanib imminganut, tagva immek timânit kôktok avingniarpok, ᴋallerêktilunelo nokᴋarniarpok.

¹⁴ Tagva manna innugasaksuit annitillugit tuppermingnit, Jordan iᴋâromavlugo ajochortuijullo angersimanerub iklervinganik akkigartillugit innugasaksuit sivornganne,

¹⁵ Jordanemullo pitillugit, ittiggamingniglo missuktillugit imermut, (Jordanele ullingalaukpok inninginne tamaine, kattersiviub nalliuninga navlugo.)

¹⁶ Tagva imek timânit kôktok nokᴋarpok ᴋallerêktilunelo, ungasidlartomik, iglugasaksoarnit Adamemik attelingnit Zarthanib sanianetomit; immerle attânut pijok imânut, imânut tarriolingmut kêtaulerpok nungulunelo. Taimak innugasaksuit iᴋârput Jericho sâlugo.

¹⁷ Ajochertuijullo Nalekab angersimaningata iklervinganik akkigartut, nangerput taimak ipterilingajome Jordanib ᴋerᴋane. Israelitillo illuêngarlutik iᴋârput erᴋagut ipterilingajokut, innugasaksuit illunamasiatik Jordanib akkianut tikkiᴋârtinagit.