Josua 24 - Labrador Inuttitut Heritage Bible

Josuab kingorlerpâmik Israelitit katterᴋovait Sicheme. Tapsomalo Eleaseriblo toᴋᴋonigik.

¹ Josuab Israelib kinguvarêngit illunaita katterᴋovait, ᴋaiᴋolugillo Israelitit angajoᴋangit, angajoᴋaunerôjungillo, idluarsaijungillo, aulatsijungillo. Gudiblo sanganut ablorêrmatta,

² Oᴋarpok inugasaksoarnut illunainut: Imâk Nalegak Israelib Gudinga oᴋarpok: Atatagilauktase nunaᴋalaukput itsaksoarme kôksuit akkiane, Tharah, Abrahamib Nahoriblo atâtangak, kivgartorlutiglo Gudib assinginik (Gudingoanik).

³ Tagva Abraha atatagijase tigulaukpara koksuit akkiane, arvertarᴋolugolo nuname Kanaaneme illunane, unnuksitilugillo kinguvangit, tunitsivigilaukparalo Isaangmik.

⁴ Isaaglo tunnitsivigilaukpara Jakomik Esaumiglo, Esaulo tunnitsivigilaukpara nunaksanganik ᴋaᴋᴋanik, Seiremik attelingnik. Jakole ᴋittorngangillo attersarlaukput Egiptenemut.

⁵ Tagva Mosese Aronelo tillilaukpâka, Egiptenemiullo kappiasuktilaukpakka, sorlo akkorngane pinnialaurama.

⁶ Kingornganelo illipse atâtagijaselo aulartilaukpapse. Imarbingmullo pilaurapse, Egiptenemiullo atâtagijasse udlalaungmattigik aksalloalikutigut horsekutigullo imarbingmut iviksoatalingmut suvlolingnik,

⁷ Tagva Nalekamut nipliadlalaukput, tapsomalo tâksoak pitilaukpa, illipse Egiptenemiullo akkornganut, imarbiksoarlo âlugo ᴋânginut, ullilaukpait. Ijisselo takkolaukput sunamik piniarnerilauktamnik Egipteneme. Illipse nunaᴋalaukpose sunaᴋangitome akkunit.

⁸ Uvangalo âlaukpapse Amoriterit, Jordanib akkiane nunaᴋalauktut, nunanganut; unatadlarvigilaungmasselo tunnilaukpakka aggapsingnut, nunanganik perᴋutisiniarluse; nungutilaukpakkalo sivunipsigut.

⁹ Tagva Balak, Ziporib erninga Moabiterit attaningat opalungailerlaukpok, sorsugvigilugillo Israelitit, tilliklerlunelo ᴋaiᴋojauᴋojilunelo Bileamik Beorib erninganik, ominarsijauᴋojiᴋovlugo illipsingnik;

¹⁰ Uvangale tussaromalaungilara. Saimartilaukpâselo, uvangalo piulilaukpapse taipsoma agganginit;

¹¹ Jordanemiglo ikkartilluse Jerichomullo piluse, Jerichomiut sorsugvigilaukpâse, Amoriterit Feresiterit, Kanaaniterit, Hethiterit, Girgositerit, Heviterit, Jebusiterit, tunnilaukpakka aggapsingnut.

¹² Igupsaksuillo tillilaukpakka sivunipsigut, tapkoa aulartilaukpait sivunipsigut, Amoriterit attannigik, saviksoapsingnuungitok pitiksipsingnuungitorlonêt.

¹³ Nunamiglo tunnitsivigilaukpapse sannavigilaungitapsingnik, iglugasaksoarniglo iglogasalliorlaungitapsingnik, igloᴋarᴋovluse tapkoninga, nerriluselo perorsêvingnit Weineliksatalingnit, perorsêvingnillo orksuksatalingnit, illilaungitapsingnit.

¹⁴ Tagva manna Nalegak sivoragisiuk kivgartorlugolo nertornartomik idluartomiglo, Gudingoallo atâtagijapse kivgartorlauktangit kôksuit akkiane, Egiptenemelo ipperarsigik, kivgartorluselo Nalekamik.

¹⁵ ᴋuviagijaungipalle illipsingnut, Nalegak kivgartorlugo, tagva uvlome annerosugitse kinamik kivgartoromangmangapse, Gudemik tapsominga, atâtagilauktapse kivgartorlauktanganik kôksuit akkiane, Amoriterillônet nunagijapse innungita Gudingoanginik. Uvangale iglomioᴋattimalo Nalegak kivgartoromavavut.

¹⁶ Tagva innugasaksuit kiovlutiglo oᴋarput: Tamanna ungasigle uvaptingnit, ᴋemailuta Nalekamik, kivgartorlutalo Gudib assinginik Gudingoanik.

¹⁷ Nalekab Gudipta uvagut atatagijavullo tassiorlaungmattigut Egiptenemit kippaloviub iglunganit, ijiptalo sângine nallonaikutakartitsilaukpok angijunik, sapputilaukpâtigullo apᴋome ingergarvigilauktaptingne illunane, innuᴋattigêksuillo illunatik akkorngane tapkutiguna apᴋosarutigilauktapta;

¹⁸ Sivunipsigullo innuᴋattigêksuit Amoriterit illunaita nunaᴋalauktut nuname pingujarlaukpait: Tamanna pivlugo Nalegak kivgartoromavavuttauk; Gudigigaptigo.

¹⁹ Josua Inugasaksoarnut oᴋarpok: Nalegak kivgartorungnangilasse; Gudeôngmat heiligeojok, Gudeôngmallo illungertortok, tappanipsingnik ajornipsingniglo pitlartautitsitailiniangitok.

²⁰ Nalegarle ᴋemmagupsiuk, Gude takkorngartak kivgartorlugo pigupse, tagva allarniarpok, kappiasuktiniarluselo nungutiniarpâselo ajungitullivigilauᴋârluse.

²¹ Innugasaksuillo Josuamut oᴋarput: Taimangolungitok, Nalegarle kivgartoromavavut.

²² Tagva Josua innugasaksoarnut oᴋarpok: Illipse kigligiudsijôvose pivluse, Nalegak annerigapsiuk kivgartoromavlugo. Tapkoalo oᴋarput: Ahaila.

²³ Tagva manna Gudingoat takkorngartat akkonapsingnêtut pêjarsigik illipsingnit, omattiselo mannisigik Nalekamut Israelib Gudinganut.

²⁴ Innugasaksuillo Josuamut oᴋarput: Nalegak Gudivut kivgartoromavavut nippingalo nalagomavavut.

²⁵ Taimak Josuab uvlorme taipsomane inugasaksuit angerᴋattigivait, mannijivigilugillo Sichememe perᴋojanik idluarᴋutaunerniglo.

²⁶ Josuablo tamakkoa tamaita aglalaukpait Gudib aglaᴋotinginut perᴋojaktalingnut; tigusilunelo ujarᴋamik angijomik, nappartilugolo tagvane, nappartub Eichemik attiggub Nalekab ivsornaitoviᴋotingata ᴋanitanganêtub attâne.

²⁷ Oᴋarlunelo innugasaksoarnut illunainut: Ahâk ujarak una kigligiudsijojuksauvok akkonaptingne; tussarlaurame Nalekab oᴋalaninginik tamainik, oᴋauserilauktanginik uvaptingnut; kigligiudsijojuksauvorlo pivluse, missiarᴋonnase Gudipsingnik.

²⁸ Taimak Josuab innugasaksuit aularᴋovait, illunaita attunit kingormgutijanginut.

²⁹ Pijoᴋartullo tamakkoa kingorngane pijoᴋalaukpok Josua, Nunib erninga toᴋᴋolaungmat Jareᴋarlune 110 nik.

³⁰ Illijartortaulaukporlo kingormgutijame kiglilervingane, Thimnath Serahme, Efraimib ᴋaᴋᴋanginetome, ᴋaᴋᴋab Gaasemik attiggub tachâne.

³¹ Israelitillo Nalegak taimak akkunêrtigijomik kivgartorlaukpât Josua innotillugo, angajoᴋajallo akkunit Josuab kingorngagut innôlauktut, ᴋaujimalauktullo Nalekab pinniarninginik tamainik, pinniarnerilauktanginik Israelitinut, innôtillugit.

³² Josefib timinga Israelib ᴋittorngangita naksarlauktangat Egiptenemit illijartorpât Sicheme, natername Jakob pissiarilauktangane Hemorib, atâtaulauktub Sichememut ᴋittornganginit, kênaujanut 100 dinut, kingormgutijaulaukporlo Josefib ᴋittornganginut.

³³ Eleaserelo Aronib erninga toᴋᴋolaurivok, illijartorpâllo Gibeame, erningata Pinehasib pigijangane tunergusearilauktangane Efraimib ᴋaᴋᴋangine.