Josua 22 - Labrador Inuttitut Heritage Bible

Kinguvarêt maggoit ᴋoppaillo angerarᴋojauningit, sannaningallo Altaremik.

¹ Tagva Josuab Rubenakut Gadekullo kinguvarêllo Manassekut ketterᴋangit ᴋaiᴋovait,

² Oᴋautilugillo: Tamainik pinniarlaukpose Mosesib Nalekab kivgangata perᴋolauktanginik illipsingnut, nippimniglo nalatsiarlaukpose tamaine perᴋolauktamne illipsingnut.

³ ᴋattangutise ᴋemmalaungilasse akkunit, uvlok tamanna tikkilugo, ungalaukposelo Nalekab Gudipse perᴋojanganut.

⁴ Nalekab Gudipse manna ᴋattangutise merngoêrservingmut âtsarêrmagit sorlo okarvigilaungmagit, tagva sanguleritse manna, ailuselo iglupsingnut, kingormgutijapse nunanganut, Mosesib Nalekab kivgangata tunnilauktanganut illipsingnut Jordanib akkiane.

⁵ Manale katsungailuse attaruilititse pinniarᴋovluse Nalekab perᴋojanga illusioᴋojangalo, Mosesib Nalekab kivgangata perᴋolauktanga illipsingnut malliklugo, nagliᴋovluse Nalegapsingnik Gudipsingnik, arvertarluselo apᴋosiningine tamaine, malliᴋovluselo perᴋojanginik, ungaluselo tapsomunga, kivgartorᴋovluselo tapsominga, omamut tamanut tarnemullo tamanut.

⁶ Taimak Josuab saimarpait aularᴋolugillo, ailaukpullo iglomingnut.

⁷ Mosesib kinguvarêt Manassekut ketterᴋangit tunnitsivigilaukpait Basaneme, ketterᴋangillo aipaingit Josuab tunitsivigivait ᴋattangutingita akkorngane Jordanib miksâne kangiane. Aularᴋolaungmagillo iglunginut, saimarlauᴋârlugillo,

⁸ Oᴋarpok tapkonunga: Utterpose iglupsingnut perᴋutelijarluse unnuktunik, nergjutinik unnuktunik, Silberemik, Goldemik, kanujarmik, kikkiengmik, anorangniglo; tagva manna omigijipse aksartaujutigijangit aviksigik ᴋattangutipsingnut.

⁹ Taimak Rubenakut Gadekullo, kinguvarêllo Manassekut ketterᴋangit utterput, aularlutiglo Israêlib ᴋittornganginit Silomit, Kanaanib nunanganetomit, aiᴋovlugit nunamut Gileademik attelingmut, nunamut kingormgutijamingnut, kenuarijamingnut Nalekab perᴋojininga malliklugo Mosesekut.

¹⁰ Tikkinamiglo kiglilervingmut Jordaneme Kanaanib nunanganetomut, Rubenakut Gadekullo, kinguvarêllo Manassekut ketterᴋangit sannavut tagvane Jordaneme Altaremik angijomik ânanamik.

¹¹ Israelible ᴋittorngangit tussaramik oᴋartoᴋarmat: Ahâk Rubenib ᴋittorngangit, Gadiblo ᴋittorngangit, kinguvarêllo Manassekut ketterᴋangit Altaremik sennalaukput, nuna Kanaane akkerartorlugo, Jordaneme Israelib ᴋittorngangita miksane,

¹² Tagva kattilerput illagêt illunamasiatik illagilugit Silome unatadlarnermut, aivigijomavlugit.

¹³ Tilliklerpullo tapkonunga nunamut Gileademut, Pinehasemik Eleaserib ajochertuijub erninganik,

¹⁴ Illaᴋartilugolo angajoᴋaunerojunik 10 nik atatamik iglomioᴋattingita akkornganetunik, kinguvarênit illunainit attunit attausemik.

¹⁵ Tikkigamigillo nuname Gileademe, oᴋarᴋattigivait oᴋarlutiglo:

¹⁶ Nalekab illagêktoᴋotingita illunatik imak oᴋautsauᴋovâse: ᴋanok idluitullivise taimak Israelib Gudinganut, tunnulerapse uvlome Nalekamit, sananipsingnut Altaremik, kattakapse Nalekamit?

¹⁷ Peorib idluitullijutigijanga mikkigivittigo? sujungaititaujutigingitavut sulle, uvlok tamanna tikkilugo, kappianartorlo tikkilaukpok Nalekab illagêktoᴋotingita akkornganut.

¹⁸ Illipselo uvlome sangulerpose Nalekamit, uvlomelo Nalegak ᴋemakpasse, uvlome ᴋaupallonêt ningaumajalerᴋovlugo Israelib illagêngningit illunaita pivlugit.

¹⁹ Kingormgutijapse nunangat ivsornarasugigupsiuk, tagva ᴋaileritse akkianut, nunamut Nalekab pigijanganut, Nalekab iglungata nangervigijanganut, kingormgujileritselo akkonaptingne, Nalegarlo ᴋemangniarassiuk, ᴋemangniaratigullo, sannanipsingnut Altaremik illipsingnut, Nalekab Gudipta Altareᴋotingata assianik.

²⁰ Achan Serab erninga idluitullilaungilâk nungutaksat pitjutigallugit, ningaumajarnerlo pivok illagêktunut illunainut? kissiovlunelo pejartaulaungilak idluitullinine pivlugo.

²¹ Tagva Rubenib ᴋittorngangit, Gadiblo ᴋittorngangit, kinguvarêllo Manassekut ketterᴋangit kiovut, oᴋarlutiglo, Israelib angajoᴋanginut anginerojunginullo:

²² Gude pitsartujok, Nalegak, Gude pitsartujok, Nalegak tamna ᴋaujimavok, Israelitillo ᴋaujimagivut kattakupta, idluitulliguptalonêt Nalekamut; tagva ikkajorniaranittigut uvlome!

²³ Tamana pivlugo Altaremik sanalaurupta sangujomagapta Nalekamit, tunergutinik otaksanik, tunergutiniglonêt nerrijaksanik tunijijomavluta ᴋângane, tunnerguteniglonêt ᴋujalijutiksanik illijiluta ᴋângane Nalekab sângane, tagva tamna nangminak akkiortaujomalerle!

²⁴ Piniangârlaungikuptalo illimasungnermut, imaitomik oᴋarapta: Uvlojomârtune ᴋittorngase oᴋarajarmatta ᴋittorngaptingnut: Sunamik illangiutiviᴋarᴋise Nalekamik Israelib Gudinganik?

²⁵ Nalekab Jordane kiglilervingortilaukpa uvagut illipselo Rubenib Gadiblo ᴋittorngangita akkonaptingnut; illangiutivikangilase Nalekamik. Taimailiornermut ᴋittorngapse ᴋittorngavut nûtinajarpait sivoranermit Nalekamik.

²⁶ Tamana pivlugo oᴋalaukpogut: Altaremik sanalerta, tunergutiksamuungitok, tunnergutiksanullonêt otaksanut:

²⁷ Kigligiudsijoᴋovlugole akkonaptingne akkonapsingnelo, kinguvârijomârtaptalo akkorngane, Nalegak kivgartorungnarlugo sângane, tunnergutiksaptingnut otaksanut, tunnergutiksaptingnullo ᴋujalijutiksanut, tunnergutiptalo assinginut; ᴋittorngase, nalliutsomârtome oᴋarungnarᴋonagit: Illangiutivikangilase Nalekamik.

²⁸ Taimagle oᴋarajarpatta, kinguvaptingnullonêt nalliutsomârtome, tagva oᴋarungnarajarput: Takkoleritse Nalekab Altaringata adsinganik, atatagijapta sanalauktanganik, tunnergutiksamuungitok, tunnergutingnullonêt otaksanik, kigligiudsijomulle akkonaptingne pivluse pivlutalo.

²⁹ Tamana ungasigle uvaptingnit ᴋemainivut Nalekamik, uvlome sangujomagapta tapsomangat, Altaremiglo sanajomagapta tunnergutiksanut otaksanik, tunnergutiksanullo nerrijaksanik, tunergutiksanullonêt assinginut, Nalekab Gudipta Altaringata iglungata sânganetub assianik.

³⁰ Pinehasible ajochertuijub, illagêktullo angajoᴋangita, Israelitit attaniotijungita, tapsoma illagijangita, oᴋautsit makkoa tussaramigit, Rubenib, Gadiblo, Manassiblo ᴋittorngangita oᴋauserijangit, namagivait.

³¹ Pinehaselo Eleaserib ajochertuijub erninga oᴋarpok Rubenib Gadiblo Manassiblo ᴋittornganginut: Uvlome tukkisivogut Nalekab akkonaptingneninganik, idluitullilaunginipsingnik Nalekamut piniarnermut mattomunga. Manna Israelib ᴋittorngangit piulilaukpasse Nalekab agganginit.

³² Tagva Pinehas Eleaserib ajochertuijub erninga angajoᴋajallo aularput nunamit Gileademit Rubenib Gadiblo ᴋittornganginit, nunamut Kanaanemut Israelib ᴋittornganginut, oᴋarlutiglo tamattominga tapkonunga.

³³ Israeliblo ᴋittorngangita tamana idluarivât, Israeliblo ᴋittorngangita Gudingat naᴋorivât, oᴋarungnailutiglo takpaungaromagamik kattimgajunut unatadlarvigijomavlugit, nuna asseroromavlugo Rubenib Gadiblo ᴋittorngangita innigijangat.

³⁴ Rubeniblo Gadiblo ᴋittorngangita Altare tamna taivât: kigligiudsijoᴋovlugo akkonaptingne pivluta, pivluselo, Nalegarlo Gudeôngmat.