Josua 20 - Labrador Inuttitut Heritage Bible

Iglugasaksuit pitlartaujungnaivit unertutigijauningat.

¹ Nalekablo Josua oᴋarvigiva oᴋarlunelo:

² Israelib ᴋittorngangit oᴋautikit: Akkunapsingne iglugasaksoarnik pitlartaujungnairvingnik tunnijititse, Mosesekut oᴋautigilauktamnik illipsingnut;

³ Toᴋᴋotsijut kemâviksanginik, kinamik pijarinane ᴋaujimananelo toᴋᴋotsijok, akkonapsingne pijauᴋonagit aungmik akkiniartemut.

⁴ Kemâjorlo iglugasaksuit tapkoa illanganut nangertuksauvok sillatâne iglugasaksuit upkoaksoangata sângane, oᴋartuksaulunelo illinganerminik iglugasaksuit angajoᴋaunerôjungita sângane; tagvalo illallioraksarivât ingmingnut iglugasaksoarnut, inniksaᴋartilugolo, tagvane nunaᴋarᴋovlugo.

⁵ Aungmiglo akkiniartib unangmikpago, tagva unnertutigijaksaringilât tapsoma agganginut, pijarinane innuᴋattine anaulaungmago omiginagolo sivorngagut.

⁶ Taimak iglugasaksoarne tamakkonane nunaᴋartuksauvok, nangerᴋârtinago illagêt sângane erᴋartuivingme, ajochertuijoksoak toᴋᴋoᴋârtinnago ajochertuijoksoangojok nalliutome taipsomane; tagva toᴋᴋotsijok ᴋaijuksaugivok iglugasaksoaminut iglominullo, iglugasaksoarnut ᴋemâlauktaminut.

⁷ Tagva unertutigivait, Kedes Galilaame Naftalib ᴋaᴋᴋangine, Sechemelo Efraimib ᴋaᴋᴋangine, Kiriat-Arba tagva Hebron, Judab ᴋaᴋᴋangine.

⁸ Jordaniblo akkiane Jerichomit nuijarviub nellâne, tunnilaukpait Bezer sunakangitome natername, kinguvarênit Rubenakunit, Ramothelo Gileademe kinguvarênit Gadekunit, Golanelo Basaneme, kinguvarênit Manassekunit.

⁹ Tamadsa, iglugasaksuit unertutigijaumajut Israelib ᴋittornganginut illunainut, tujormitsanullo illunainut tapkoa akkorngane nunakartunut, kemâvigilugit toᴋᴋotsijub kimik pijarinane, toᴋᴋotauᴋonnago aungmik akkiniartemut, nangerᴋârtinago illagêt sângine.