Josua 2 - Labrador Inuttitut Heritage Bible

Nautsertortuksâk Rahabemut piulijauvuk.

¹ Josuable Nunib erningata angigutsivlune nautsertortuksâk magguk tillilaukpâk Sittimemit oᴋautilaukpâglo: Aileritik nuna nautsertoritikko Jericholo. Tapkoa aivuk, tikkilutiglo anguniarpaktub Rahabemik attiggub iglunganut, sinniktarlutiglo tapsomane.

² Tagva attannak Jerichome oᴋautsauvok: Ahâk, unuarme tamattomane tikkitoᴋarpok ovunga angutinik Israelitinnit nuna nautsertoromavlugo.

³ Tagva Jerichub attanertanga tilliklerpok Rahabemut oᴋautsauᴋolugolo: Angutik tikkituk illingnut iglungnut ᴋaikik; tikkisimangmannik nuna nautsertoromavlugo.

⁴ Arnable tapsoma angutik tapkoa ijertorpâk, oᴋarlunelo imâk: Tikkitoᴋalauralloarpok angutingnik uvamnut, ᴋaujimalungitungale nakit pingmangangnik.

⁵ Upkoaksuillo pallangertaujuksautillugit tâktillugo annilaukpuk, ᴋaujiᴋonanga namut aivingangnik. Erinesukluse udlassigik anguniarapsigik.

⁶ Tapsomale tapkoa majoarᴋovak iglub ᴋânganut, ijertorpaglo ivaluksaijaksat ivingita issivimalauktame iglub ᴋângane attânut.

⁷ Angutille udlatorpakik apᴋosinerme Jordanemut, ikkarvik tikkilugo. Upkoaksoarlo pallangertaulaukpok, taipkoa udlaniktut taipkungninga annilauᴋârtillugit.

⁸ Angutiglo sinniᴋârtinagik, majoarlune iglub ᴋânganut aivigivak,

⁹ Oᴋautivlugiglo: ᴋaujimavunga Nalekab nunamik mattominga tunnitsivigingmasse; kavaksarnerub tupvigingmattigut sivunapsigut, nunablo innungita illunatik tikkitsomârnise maksoajuijutigivât.

¹⁰ Tussalaurapta ᴋannok Nalekab immak immarbingme iviksoatalingme suvlolingnik ipteriliktilaungmago sivunapsigut Egiptenemit aulartilluse, pinniarnerilauktapsingniglo Amoriterit attannigingnut, Sihonemut Ogemullo Jordanib ungatanêtungnut, nungulaurapsigik.

¹¹ Taimangallo tamattominga tussarlaurapta, omattivut mungungavut, maksoarneᴋarungnailunelo nalliane tikkiniarnise pitjutigellugo; Nalegak Gudise Gudeôngmat, tamangne pâne ᴋillangme, attânelo nuname.

¹² Tagva Nalekame angervigitinga manna, napkiningnermik sakᴋertitsivigigaptik illipsatauk atâtama iglomioᴋattinginnut napkiningnermik sakᴋertitsiᴋovluse, nallonaikutamiglo nallonangitomik tunnitsivigitinga,

¹³ Inôᴋogapsigik atâtaga, anânagalo, ᴋattangutikkalo angutit arnallo, tamaitalo illangit, piulilugillo tarnivut toᴋᴋomit.

¹⁴ Angutik tapkoa oᴋarpuk tapsomunga: napkiningnermik nallagornermiglo sakᴋertitsiniangikupta illingnut, Nalekab nunamik ominga tunnitsivigikpattigut, tagva tarnivuk inangêrluse toᴋᴋojuksauvuk, kissiane pinniarᴋojauniptingnik sakᴋertitsiᴋonak.

¹⁵ Tagva igalakut aklunamut ningitipak, iglunga iglugasaksuit avalungita ᴋarmangita tungânelaungmat, ᴋânganelaungmallo.

¹⁶ Tapsomalo oᴋautivak: ᴋaᴋᴋanut aileritik pârsiᴋonagik illiptingnik udlatitik, ijertorlutiglo tagvane uvlut pingasut nâtlugit, utterᴋârtinagit udlatitik, kingorngane apᴋotigijariaᴋartaptingnik agvertaritik.

¹⁷ Angutigle oᴋarpuk tapsomunga: Angermaringnermit tigulauktarnit uvaptingnit ᴋellarudsartaujomavoguk,

¹⁸ Kainiarupta nunamut, aklunaglo aupaluktak una ningitijutigijet uvaptingnik kellaksorlungikungne igalangmut, kattitilungikungnelo iglungnut, atâtat anânallo, ᴋattangutitillo, atâtavillo iglomiokottingit illunaita.

¹⁹ Iglovillo upkoanganit annijub tapsoma aunga niaᴋominut pile, uvaguglo passijaksaungilaguk; illunaitale iglungnetut kialo agganginnut aktortaukpatta, aunget niaᴋuptingnut pijuksauvok.

²⁰ Kimullo sunamik pinniarᴋojauniptingnit tamattomangat oᴋarniaruvit, angermaringnermit, tigulauktarnit uvaptingnit ᴋellarudsartaujomavoguk.

²¹ Tamna oᴋarpok: Taimailerle sorlo oᴋaraptik; aularᴋolugiglo. Tapkoalo aularpuk. Tapsomalo aklunak aupaluktak ᴋellaksorpa igalangmut.

²² Tapkoale aivuk tikkilutiglo ᴋaᴋᴋamut, tagvanêlutiglo uvlunik pingasunik, taipkoa utterᴋârtinagit udlatitingit. Kennerlaungmatta tapkungninga apᴋosinerne tamaine, nachvaratiglo.

²³ Taimak angutik tapkoa utterivuk, attersarlutiglo ᴋaᴋᴋamit, iᴋârlutiglo tikkilarmiglo Josuamut, Nunib erninganut, unipkarlutiglo tamainik, ᴋannok tukkisilauktamingnik,

²⁴ Oᴋarpuglo Josuamut: Nalekab nuna illunât tunnilaukpa aggaptingnut, taimaktauk nunab innungita illunatik maksoajuijutigivâtigut.