Josua 17 - Labrador Inuttitut Heritage Bible

Manasekut ikkupiangat kiglilervingallo.

¹ Imeraullo nallaulaukpok kinguvarênut Mannassekunut, Josefib erniangoᴋârtoᴋotigilaungmago; nallaulunelo Machiremut Manassib erninganut angajuklermut Gileadib atâtanganut, anguteolaungmat sorsugungnartomik, tamanna pivlugo Gilead Basanelo pilaukpak.

² Mannassible ᴋittorngangita assingit nallautaulaurivut abvakungita akkorngane, tagva Abieserib ᴋittorngangit, Helekib ᴋittorngangit, Asrielib ᴋittorngangit, Sechemib ᴋittorngangit, Heferib ᴋittorngangit, Semidablo ᴋittorngangit. Tamadsa Manassib Josefib erningata ᴋittorngangit, angutit abvakungita akkorngane.

³ Zelafehadele Heferib erninga, Gileadib erningata Machirib erningata, Mannassib erningata ernaᴋalaungilak, pannakartuinarlaukporle, attingillo tapkoangovut: Mahela, Noa, Hagla, Milka, Thirza;

⁴ Kailaukpullo ajochertuijub Eleaserib Josuablo Nunib erningata, angajoᴋaunerojullo sanganut oᴋarlutiglo: Nalekab Mosese perᴋolaukpa kingormgutijaksamik tunnitsivigijaksaringmattigut ᴋattangutipta akkorngane. Tunnitsiviolaukpullo kingormgutijaksamik atâtangata ᴋattangutingita akkorngane, Nalekab perᴋojininga malliklugo.

⁵ Manassekunulle pivut ikkupianik 10 nik, nunab Gileadib Basaniblo, Jordanib ungatânetub assinginik.

⁶ Manassib paningit kingormgutijaksamik illangiutiviᴋaramik erningita akkorngane; nunalo Gileade Manassib ᴋittorngangita assinginut illingalaukpok.

⁷ Manassekullo kiglilervingat pilaukpok Asseremit Michmethatemut, Sechemib sivoranetomut, tallerpingmullo tokpok En-Tapuamut.

⁸ Tapuab nunanga Manassekut pigilaungmatsuk; kiglilerviolunelo Manassekunut Efraimib ᴋittorngangine.

⁹ Tagvangat attersarpok Nahal-Kanamut iglugasaksuit kôngnetut Efraimekut pigijangita. Manassekut iglugasaksoangita akkorngane seᴋᴋernganut; avangalle Manassekut kiglilervingat kongmepok, nâlunelo imarbiksoarme,

¹⁰ Ane Efraimekunut illingavok avanelo Manassekunut, imarbiksoarlo kiglilerviovok; aktuajuksauvorlo avane Asserkunnut unnanelo Isascharekunut.

¹¹ Taimak Manassekut peᴋalaukput Isascharekut Asserekullo akkorngane Beth-Seanemik iglugasanginiglo, Iblaamik iglugasanginiglo, Doremetuniglo iglugasanginiglo, Endoremetuniglo iglugasanginiglo, Taanachemetuniglo iglugasanginiglo, Megiddometuniglo iglugasanginiglo, Nafetiblo pingajuanik.

¹² Manassiblo ᴋittorngangita iglugasaksuit tamakkoa aksarnigarijungnarlaungilait, Kanaaniterille nunaᴋalerlaukput nuname tamattomane.

¹³ Israelible ᴋittorngangit songolerlauramik Kanaaniterit akkilêjuksangortipait aulartinagillo.

¹⁴ Tagva Josefib ᴋittorngangita Josua oᴋarvigivat oᴋarlutiglo: Sôg uvagut immeraumik attausênarmik kingormgutijaksablo ikkupiaktanganik attauseînarmik tunnitsivigilaukpittigut? Inugasaksoangogalloartilluta, sorlo Nalekab saimauserlaungmattigut.

¹⁵ Tagva Josuab oᴋautivait: Innugasaksoangogapse takpaungaleritse nappartunut, kippitsiluselo tagvane Feresiterit innukpaillo nunangane, Efraimekut ᴋaᴋᴋangit nerrokigigapsigik.

¹⁶ Tagva Josefib ᴋittorngangit oᴋarput: ᴋaᴋᴋaᴋattigêt aksarnigarijungnarniangilavut, Kanaaniterit illunatik nunab naksangine nunaᴋartut ᴋamuteᴋangmatta kikkiengnik, tapkoa Beth-Seanemetut iglugasanginetullo, Jesereelemetullo naksangme.

¹⁷ Josua Josefib iglunganut, Efraimekunnut Manassekunullo oᴋarpok: Inugasaksoangôvose, unnuktogapselo immeraumik attausênarmik pekartuksaungilase;

¹⁸ ᴋaᴋᴋalle nappartuggit perkutigijaksarivasse, tapkoa kippisigik, tagva tapkoa imerauᴋotipse nâninganut illinganiarput, Kanaaniterit kikkiengnik ᴋamuteᴋartut songojullo aulartigupsigik.