Josua 16 - Labrador Inuttitut Heritage Bible

Josefib ᴋittorngangita ikkupiangat, piluartomik Efraimekut kiglilervingat.

¹ Imeraullo nallaulaukpok Josefib ᴋittornganginut Jordanemit Jerichub sivuranetomit, kôk Jerichometok tikkilugo kittânit, sunaᴋangitorlo sangmijok takpaunga Jerichomit Bethelib ᴋaᴋᴋangitigut;

² Bethelemillo tikkipok Lusemut, ailunelo Archi-Atharotib kiglilervingagut;

³ Sangmilunelo kannunga paunga Jafletib kiglilervinganut, Beth-Horonib atsiktub kiglilervia tikkidlugo, Gaserelo tikkilugo, nâningalo imarbingmepok.

⁴ Tamattominga Josefib ᴋittorngangit Manassekullo Efraimekullo pilaukput kingormgutijaksamingnut.

⁵ Efraimib ᴋittorngangita kingormgutijangata kiglilervingat abvakungita akkorngane imailaukpok: kittâne Atharot-Adaremit, Beth-Horon kôgvasinerpak tikkilugo;

⁶ Ailunelo Michmeteme avanetome avunga; tagvane sangulerpok iglugasaksuit Thaenat-Silomik attiggit kittânut tapkutigunalo pilune unungat aivok Janohamut;

⁷ Attersarlunelo Janohamit Atharotemut Naaratemullo aktoalunelo Jerichomut nâlunelo Jordaneme.

⁸ Thapuamit aivok paunga Nahal-Kanamut; nâningalo imarbingmepok. Tamadsa kinguvarêt Efraim ᴋittorngangita kingormgutijangit abvakungita akkorngane.

⁹ Efraimiblo ᴋittorngangita kiglilervingita iglugasaksoangit, iglugasangit illagilugit akkusimalaukput Manassib ᴋittorngangita kingormgutijangata akkorngane.

¹⁰ Aulartilaungilaillo Kanaaniterit Gaserme nunaᴋalauktut. Taimak Kanaaniterit Efraimekut akkornganetualaukput uvlok tamanna tikkilugo, akkilejuksangortitaulutiglo.