Josua 14 - Labrador Inuttitut Heritage Bible

Nunab Kanaanib immerautigijauninga, Kaleb kingormgutijaksanga.

¹ Tamannauvorle Israelib ᴋittorngangita aksarnigarilauktangat nuname Kanaanene, ajochertuijub Eleaserib, Josuablo Nunib erningata, atatallo angajoᴋaunerojut Israelib ᴋittorngangita kinguvârengningita akkorngane, avilauktangat tapkonunga,

² Avilaukpalle tapkonunga imerautigivlugo, sorlo Nalegak Mosesekut perᴋojilaungmat, kinguvarêt 9 it koppangalo tunnitsivigilugit.

³ Kinguvarêlle maggoit kinguvarêllo attautsit ketterᴋangit Mosesib kingormgutijaksamik tunnitsivigilaukpait Jordanib akkiane. Levitille kingormgutijaksamik tunnitsivigilaungilait tapkoa akkorngane.

⁴ Josefib ᴋittorngangit kinguvarêngolermatta maggoit, Manasse Efraimelo: tamanna pivlugo Levitit illangiutiviᴋartilaungilait nunamik, iglugasaksoarnigle iglogijaksanginik, aiparuserniglo iglugasaksuit avatanê nergjuteᴋotinginut perᴋutinginullo.

⁵ Sorlo Nalekab Mosese perᴋolaungmago, taimailiorlaukput Israelib ᴋittorngangit, aviklugolo nuna.

⁶ Tagva Judab ᴋittorngangit ᴋaivut Josuamut Gilgaleme, Kaleblo Jefunib erningata Kenesikunit pijub oᴋautiva: ᴋaujimavotit kanoêtunik Nalekab oᴋauserilauktanginik, Mosesemut Gudib anguteᴋotinganut Kades-Barneame pivlunga, pivlutillo.

⁷ Jareᴋalaukpunga 40 ginik Mosesib Nalekab kivgangata tillilaungmanga Kades Barneamit, nuna nautsertoriartorlugo, oᴋautilaungmigapᴋolo issumagilauktakka malliklugit.

⁸ ᴋattangutimale takpaunga majorarᴋattigilauktama innugasaksuit omattingit mungungatilaukpait; uvangale Nalegak Gudiga mallilaukpara illuêngarlunga.

⁹ Tagva Mosese uvlorme taipsomane angermarilaukpok oᴋarlunelo: Nuna tullerarvigilauktat ittiggangnut, kingormgutijaksauvok illingnut ᴋittorngangnullo soraijuitomik; tamana pivlugo Nalegak Gudiga mallilaurangne nertornartomik.

¹⁰ Mannalo takkoit, Nalekab innôᴋolaukpânga, sorlo oᴋalaurame. Jareôvut manna 45 git Nalekab oᴋarvianit taimaitomik Mosesemut, Israelitit arvertarvigilauktangit sunaᴋajuitome. Mannalo takkoit, uvlome Jareᴋarpunga 85 ginik,

¹¹ Uvlomelo sulle, uvlorme tamattomane taimak sangitigijovunga uvlutut taipsomanetut Mosesib tilliklervianetut uvamnik; sorlo nukkeᴋarnera îlaungmat taipsomane, taimainivok sulle, sorsuklunga, aularlungalo, itterlungalo.

¹² Tagva tunnitsivigilaunga manna ᴋaᴋᴋanik ukkuninga, Nalekab oᴋautigilauktanginik uvlorme taipsomane; igvit tussarlaurangne uvlorme taipsomane. Enakimit nunaᴋarmatta takpâne, iglugasaksoaᴋarlutiglo angijunik songojuniglo; Nalekab illaginiarmangangma, aulartitsiᴋovlunga tapkoninga, sorlo Nalegak oᴋalaungmat.

¹³ Tagva Josuab saimartipa tunitsivigivalo Kale Jefunib Erninga Hebronemik kingormgutijaksamut.

¹⁴ Tamanna pivlugo Hebron kingormgutijaulaukpok uvlok tamanna tikkilugo Kalemut Jefunib erninganut, Kenesikunnut illingajomut, Nalegak Israelib Gudinga mallilauramiuk nertornartomik.

¹⁵ Hebronele sivorngane atteᴋalaukpok Kiriath-Arbamik, tamna innukpangolaukpok Enakimit akkorngane. Nunalo unatadlarnaᴋarungnailaukpok.