Josua 13 - Labrador Inuttitut Heritage Bible

Josuab perᴋojauninganik nuna aviklugo.

¹ Josua mana îtodlartillugo uvloᴋartillugolo unnuktunik, Nalekab oᴋautiva: Innutoᴋauvotit uvloᴋarlutillo unnuktunik, amiakoᴋarporlo sulle nunnanik unuktunik aksarnigaujariaᴋartunik.

² Tagva Filisterit Galileaᴋotingat illunât, Gesurillo illunât,

³ Sihoremit kôktomit Egiptenib sângagut, Ekronib kiglilervinga tikkilugo, avane, kittitaumajok Kanaaniterinut, Filisterit angajoᴋangit tallimat, Gasamiut, Asdodemiut, Askalonemiut, Gethemiut, Ekronemiut, Avimiullo.

⁴ Anget Kanaaniterit nunangat illunât, Mearalo Zidonemiunut illingajok Afek tikkilugo Amoriterit kiglilervingat tikkilugo;

⁵ Taimaktauk Gibliterit nunangat illunât, Libanonelo illunât, kittane Baal-Gademit ᴋaᴋᴋab Hermonib attânetomit Hamatib itterviat tikkilugo;

⁶ Tapkoa illunaita ᴋaᴋᴋane nunaᴋartut Libanonemit puailavit onartut tikkilugit, Zidonerillo illunaita. Pejaromavakka Israelib ᴋittorngangita sivorngane; imerautigituinarkit, aviklugit Israelitinut, sorlo perᴋolaurapkit.

⁷ Tagva manna nuna tamanna aviguk kingormgutijaksauvlune kinguvarênut 9 enut, kinguvarênullo Manassekut ᴋetterᴋanginut.

⁸ Rubenakut Gadekullo kingormgutijamingnik pijarêrlaungmatta kinguvarêt Manassekut ketterᴋangit, aipaingit illagilugit Mosesib tunnilauktanganik tapkonunga Jordanib akkiane kittanê; sorlo Mosesib Nalekab kivgangata tamanna tunnilaungmago tapkonunga.

⁹ Aroeremit kôb Arnoneme kôktub siksanganetomit, iglugasaksoarnillo kôb ᴋerᴋanetunit, Medbadiblo erkâ illunat Dibone tikkilugo;

¹⁰ Sihoniblo Amoriterit attaningata Hesbonemelauktub iglugasaksoaᴋotingit tamaita, Amonib ᴋittorngangita kiglilervingat tikkilugo.

¹¹ Tappilugillo Gilead, Gesuriblo Maachatiblo kiglilervigik, ᴋaᴋᴋarlo Hermon illunât, Basanelo illunât Salcha tikkilugo;

¹² Ogiblo Basanib attanertanga, Astaroteme Edreimelo nunaᴋalauktub, amiakolauktub sulle innukpanit attaniovinga illunât. Mosesible ullimârlugillo pingujarlaukpait.

¹³ Israelible ᴋittorngangita Gesuremiut Maachatemiullo aulartilaungilait; tamarmigle Gesuremiut Maachatemiullo nunaᴋarput Israelitit akkorngane uvlok tamanna tikkilugo.

¹⁴ Kinguvarêlle Levikut kingormgutijaksamik tunnitsivigilaungilait; Nalekab Israelib Gudingata tunnergusiarijangit kingormgutigingmattigik, sorlo oᴋautilaungmagit.

¹⁵ Taimak Mosesib kinguvarêt Rubenib ᴋittorngangit tunnitsivigivait abvakungit malliklugit;

¹⁶ Kiglilervingat pilaungmat Aroeremit kôb Arnonemetub siksanganetomit, iglugasaksuillo kôb ᴋerᴋanêtut, naternangat illunât, illaliudlugo Medba tikkilugo;

¹⁷ Hesbon iglugasaksoangillo tamaita naternametut; Dibon, Bamoth-Baal, Beth-Baal-Meonelo,

¹⁸ Jahza, Kedemot, Mefathelo,

¹⁹ Kiriataim, Sibma, Zeret-Sahar naksarme ᴋaᴋᴋametome,

²⁰ Beth Peor, kôt Pisgamit pijut Beth-Jesimotelo,

²¹ Iglugasaksuillo tamaita naternamêtut Sihoniblo Amoriterit attaningata, Hesbonemelauktub, Mosesib ullimarlauktangata attaniovinga illunât Midianib, Eviblo, Rekemiblo, Zuriblo, Huriblo, Rebablo angajoᴋangit, Sihonib pitsartuneliᴋotingit, nuname nunaᴋalauktut illaliudlugit.

²² Bileamelo Beorib erninga nallautaijok Israelib ᴋittorngangita toᴋᴋoᴋassiutilaurivat saviksoarmut ullimarsimajut illaliudlugit.

²³ Rubeniblo ᴋittorngangita kiglilervingat Jordaneôlaukpok. Tamana Rubenib ᴋittorngangita kingormgutijangat abvakungit malliklugit iglugasaksuit iglugasaillo.

²⁴ Mosesib kinguvarêt Gadib ᴋittorngangit, abvakungita akkorngane tunnitsivivait,

²⁵ Kiglilervingat Jaesereôlaungmat, iglugasaksuillo illunaita Gileademetut, Amoniblo ᴋittorngangita nunangata ketterᴋanga Aroer Rabbab sivoranetok tikkilugo.

²⁶ Hesbonemit Ramat-Mizpe Betonimelo tikkilugik, Mahanaimillo Debirib kiglilervinga tikkilugo.

²⁷ Naksarmele Beth-Haram, Beth-Nimra, Suchot Zafonelo, amiakolauktut Sihonib Hesbonib attanertangata attaniovinganit, Jordan kiglilerviolaungmat; Cineretib imanga tikkidlugo Jordanib miksane kittane.

²⁸ Tamanna Gadib ᴋittorngangita kingormgutijangat abvakungine, iglugasaksoangit iglugasaingillo.

²⁹ Mosesiblo kinguvarêt Manassib ᴋittorngangita ketterᴋangit, tunitsivigivait abvakungit malliklugit,

³⁰ Kiglilervingit pilaungmatta Mahanaimemit Basan illunât, Ogib Basanib attanertangata attaniovinga illunât, Jairiblo iglugasaingit Basanemetut illunaita, iglugasaksuit 60 git.

³¹ Gileadiblo ketterᴋanga, Astarot, Edrei, Ogib Basanib attanertangata iglugasaksoagilauktangit, tunnijauvut Machirib ᴋittornganginut, Manassib erningata, tagva Machirib ᴋittorngangita ketterᴋanginut abvakungit malliklugit.

³² Tamadsa Mosesib avilauktanga, Moabiterit naternangane, Jordanib akkiane Jerichub sângane kittane.

³³ Kinguvarêlle Levikut Mosesib kingormgutijaksamik tunnitsivigilaungilait; Nalegak Israelib Gudingât kingormgutigingmatsuk sorlo oᴋautilaungmagit.